ᱦᱟᱯᱮ

 (ᱦᱩᱰᱤᱧ ᱢᱟᱪᱷᱟ ᱠᱟ.ᱦᱱᱤ)

 ᱦᱟᱯᱮ

ᱜᱳᱯᱮᱥᱣᱚᱨ ᱢᱟᱱᱰᱤ

 

ᱥᱚᱲᱚᱠᱰᱤ ᱨᱮᱱ ᱨᱟᱢ ᱴᱩᱰᱩ ᱥᱚᱲᱚᱠ ᱜᱷᱩᱴᱩ ᱟᱛᱳ ᱨᱮᱱ ᱞᱚᱫᱟᱢ ᱴᱷᱮᱱ ᱵᱟᱲᱜᱮ ᱠᱤᱨᱤᱧ ᱠᱟᱛᱮ ᱚᱲᱟᱜ ᱫᱩᱣᱟ.ᱨ ᱮ ᱵᱮᱱᱟᱣ ᱡᱚᱝ ᱟᱱᱟ ᱾ ᱥᱚᱲᱚᱠᱰᱤ ᱟᱨ ᱥᱚᱲᱚᱠ ᱜᱷᱩᱴᱩ ᱟᱛᱳ  ᱫᱚ ᱥᱩᱨ ᱥᱩᱯᱩᱨ ᱜᱮᱭᱟ ᱾ ᱨᱟᱢ ᱴᱩᱰᱩ ᱵᱟᱲᱜᱮ ᱦᱟᱥᱟ ᱨᱮᱱᱟᱜ ᱯᱚᱭᱥᱟ ᱠᱚ ᱫᱚᱭ ᱮᱢ ᱪᱟᱵᱟᱣ ᱟᱠᱟᱫᱟ ᱾ ᱢᱮᱱᱠᱷᱟᱱ Reg. ᱫᱚ ᱵᱟᱝ ᱮ ᱠᱚᱨᱟᱣ ᱞᱮᱫᱟ ᱾ ᱨᱟᱢ ᱴᱩᱰᱩ ᱫᱚᱭ ᱢᱮᱱ ᱞᱮᱫ ᱜᱮᱭᱟ Reg. ᱭᱟ.ᱧ ᱢᱮ ᱾ ᱢᱮᱱᱠᱷᱟᱱ ᱞᱚᱫᱟᱢ ᱮ ᱢᱮᱱ ᱠᱮᱫᱟ ᱚᱲᱟᱜ ᱫᱩᱣᱟ.ᱨ ᱞᱮᱢ ᱨᱮᱡᱮᱥᱴᱨᱤᱭᱟᱢ ᱜᱮᱭᱟ.ᱧ ᱪᱮᱫ ᱨᱮᱱᱟᱜ ᱩᱱᱟ.ᱜ ᱪᱟᱲ ? ᱢᱤᱱᱟ.ᱧ ᱜᱮᱭᱟ ᱥᱮ ᱵᱟ.ᱧ ᱜᱚᱡ ᱜᱚᱫᱚᱜ ᱠᱟᱱᱟ ᱦᱟᱸᱜ ᱾ ᱚᱱᱠᱟᱭ ᱢᱮᱱ ᱵᱟᱲᱟᱣ ᱟᱫᱮ ᱠᱷᱟᱱ ᱵᱟᱝ ᱮ Reg. ᱡᱚᱝ ᱟᱱᱟ ᱾ ᱦᱟᱯᱮ ᱠᱟᱛᱷᱟ ᱦᱟᱯᱮ ᱨᱮᱜᱮ ᱛᱟᱸᱦᱮᱭ ᱮᱱᱟ ᱾ ᱚᱲᱟᱜ ᱫᱩᱣᱟ.ᱨ ᱵᱮᱱᱟᱣ ᱠᱟᱛᱮ ᱮ ᱜᱤᱨᱟ. ᱵᱟ.ᱥᱤᱭ ᱮᱱᱟ ᱾

  

ᱢᱤᱫ ᱫᱷᱟᱣ ᱥᱟᱱ ᱵᱚᱸᱜᱟ ᱨᱟᱢ ᱴᱩᱰᱩ ᱵᱟ.ᱥᱭᱟ.ᱢ ᱵᱮᱲᱟ ᱟ.ᱣᱨᱤᱭᱟ ᱟᱡᱟᱨ ᱛᱮ ᱫᱟᱜ ᱠᱷᱮᱛ ᱨᱮ ᱱᱟᱦᱮᱞ ᱥᱤ ᱛᱩᱞᱩᱡ ᱛᱟᱵᱮᱨ ᱠᱟᱛᱮ ᱮ ᱩᱞᱴᱟ.ᱣ ᱮᱱᱟ ᱾ ᱢᱩ,ᱢᱚᱪᱟ ᱨᱮ ᱫᱟᱜ ᱵᱚᱞᱚᱣ ᱟᱫᱮᱭᱟ ᱾ ᱥᱟᱸᱦᱮᱫ ᱵᱟᱝ ᱮ ᱦᱟᱛᱟᱣ ᱫᱟᱲᱮᱭᱟᱫᱟ ᱾ ᱟᱫᱚ ᱚᱸᱰᱮ ᱜᱮᱭ ᱵᱚᱸᱜᱟ ᱛᱟᱞᱟ ᱮᱱᱟᱭ ᱾ ᱟᱡ ᱨᱮᱱ ᱵᱟ.ᱦᱩ ᱜᱤᱫᱽᱨᱟ. ᱫᱟᱭᱟ ᱜᱮᱭ ᱟᱣᱟ  ᱴᱟᱯᱟ ᱚᱴᱚ ᱠᱟᱫ ᱠᱚᱣᱟᱭ ᱾ ᱨᱟᱢ ᱴᱩᱰᱩ ᱨᱮᱱ ᱟᱡ ᱵᱚᱭᱦᱟ ᱞᱚᱴᱚ ᱨᱮᱞ ᱨᱮᱭ ᱪᱟ.ᱠᱨᱤ ᱠᱟᱱ ᱛᱟᱸᱦᱮ ᱠᱟᱱᱟ ᱾ ᱚᱱᱟ ᱛᱮ ᱟᱫᱚ ᱟᱡ ᱫᱟᱫᱟ ᱨᱮᱱ ᱢᱤᱫ ᱠᱚᱲᱟ ᱟᱨ ᱢᱤᱫ ᱠᱩᱲᱤ ᱜᱤᱫᱽᱨᱟ. ᱦᱟᱨᱟ ᱵᱩᱨᱩ ᱠᱟᱛᱮ ᱡᱟᱢᱟᱭ,ᱵᱟ.ᱦᱩᱭᱟᱫ ᱠᱤᱱᱟᱭ ᱾

ᱢᱮᱱᱠᱷᱟᱱ ᱚᱞᱚᱜ ᱯᱟᱲᱦᱟᱣ ᱠᱷᱚᱱ ᱫᱚ ᱯᱷᱟᱨᱟᱠ ᱨᱮᱭ ᱫᱚᱦᱚ ᱠᱟᱫ ᱠᱤᱱᱟ ᱾ 

  

ᱨᱟᱢ ᱴᱩᱰᱩ ᱨᱮᱱ ᱜᱤᱫᱽᱨᱟ. ᱥᱚᱱᱚᱛ ᱴᱩᱰᱩ ᱵᱟ.ᱦᱩᱭᱟᱫᱮ ᱠᱷᱟᱱ,ᱟᱡ ᱵᱟᱵᱟᱣᱟᱜ ᱢᱟᱨᱮ ᱵᱷᱤᱴᱟ. ᱚᱲᱟᱜ ᱨᱮᱭ ᱨᱩᱣᱟ.ᱲ ᱦᱮᱡ ᱮᱱᱟ ᱾ ᱜᱤᱫᱟ.ᱨ ᱯᱤᱫᱟ.ᱨ ᱠᱚ ᱦᱩᱭᱮᱱ ᱛᱟᱭᱟ ᱾ ᱦᱟᱨᱟ ᱤᱫᱤᱜ ᱠᱟᱱᱟ ᱠᱚ ᱾ ᱩᱱ ᱚᱠᱛᱚ ᱠᱚᱨᱮ ᱜᱮ ᱟᱡ ᱵᱟᱵᱟᱣᱟᱜ ᱦᱟᱥᱟ ᱡᱟᱭᱜᱟ,ᱟᱡ ᱦᱚᱯᱚᱱ ᱵᱟ ᱴᱷᱮᱱ ᱠᱷᱚᱱ ᱦᱟ.ᱴᱤᱧ ᱦᱟᱛᱟᱣ ᱞᱟ.ᱜᱤᱫᱼᱮ ᱠᱩᱨᱩ ᱢᱩᱴᱩ ᱠᱮᱫᱟ ᱾ ᱟᱡ ᱦᱚᱯᱚᱱ ᱵᱟ ᱫᱚ ᱨᱟ.ᱜᱤ ᱛᱮᱭ ᱠᱤᱥ ᱠᱤᱥᱟ.ᱜ ᱠᱟᱱᱟ ᱾ ᱢᱮᱱ ᱮᱫᱟᱭ ᱵᱟ.ᱧ ᱦᱟ.ᱴᱤᱧ ᱚᱪᱚᱣᱟᱜᱼᱟ ᱾ ᱢᱮᱱᱠᱷᱟᱱ ᱥᱚᱱᱚᱛ ᱴᱩᱰᱩ ᱫᱚ ᱟᱡ ᱦᱚᱯᱚᱱ ᱵᱟᱣᱟᱜ ᱠᱟᱛᱷᱟ ᱵᱟᱝ ᱟᱸᱡᱚᱢ ᱠᱟᱛᱮ ᱥᱳᱞᱳ ᱟᱱᱟᱭ ᱡᱟᱣᱨᱟ ᱠᱮᱫ ᱠᱚᱣᱟ ᱟᱨ ᱟᱡ ᱵᱟᱵᱟᱣᱟᱜ ᱦᱟᱥᱟ ᱡᱟᱭᱜᱟ ᱛᱩᱫ ᱡᱚᱝ ᱟᱱᱟᱭ ᱾ ᱟᱫᱚ ᱱᱟᱯᱟᱭ ᱞᱮᱠᱟ ᱪᱟᱥ ᱠᱟᱛᱮ ᱥᱩᱞᱩᱠ ᱛᱮ ᱥᱚᱝᱥᱟᱨ ᱮ ᱞᱟᱜᱟᱭ ᱮᱫᱟ ᱾

 

  ᱟ.ᱰᱤ ᱫᱤᱱ ᱯᱟᱨᱚᱢ ᱪᱟᱞᱟᱣ ᱮᱱᱟ ᱾ ᱩᱱ ᱛᱮᱫᱚ ᱞᱚᱫᱟᱢ ᱮ ᱵᱚᱸᱜᱟ ᱛᱟᱞᱟᱣ ᱟᱠᱟᱱᱟ ᱾ ᱥᱮᱫᱟᱭ ᱨᱮ ᱞᱚᱴᱚ ᱟᱡ ᱫᱟᱫᱟ ᱵᱟᱲᱜᱮᱭ ᱠᱤᱨᱤᱧ ᱦᱟᱛᱟᱣ ᱞᱮᱫ,ᱵᱟᱝ ᱮ ᱨᱮᱡᱮᱥᱴᱨᱤ ᱟᱠᱟᱫ ᱾ ᱚᱱᱟ ᱠᱟᱛᱷᱟ ᱞᱚᱴᱚ ᱫᱚ ᱞᱮᱫᱮᱢ ᱨᱮᱱ ᱜᱤᱫᱽᱨᱟ. ᱠᱚᱝᱠᱟ ᱨᱟᱢ ᱴᱷᱮᱱᱮ ᱞᱟ.ᱭ ᱠᱮᱫᱟ ᱾ ᱱᱚᱣᱟ ᱠᱟᱛᱷᱟ ᱠᱚᱝᱠᱟ ᱨᱟᱢᱟᱜ ᱵᱟᱰᱟᱭ ᱵᱟᱝ ᱛᱟᱸᱦᱮ ᱠᱟᱱ ᱛᱟᱭᱟ ᱾ ᱩᱱ ᱫᱚ ᱠᱚᱝᱠᱟᱨᱟᱢ ᱟᱫᱚ ᱥᱚᱱᱚᱛ ᱴᱷᱮᱱ ᱡᱟᱭᱜᱟ ᱨᱮᱱᱟᱜ ᱫᱚᱞᱤᱞ ᱩᱫᱩᱜ ᱮ ᱢᱮᱛᱟᱣ ᱟᱫᱮᱭᱟ ᱾ ᱵᱟ.ᱱᱩᱜ ᱨᱮ ᱫᱚ ᱯᱚᱭᱥᱟ ᱟᱨ ᱵᱟᱝ ᱠᱷᱟᱱ  ᱚᱸᱰᱮ ᱠᱷᱚᱱ ᱥᱟᱦᱟᱜ ᱨᱮᱱᱟᱜ ᱮ ᱢᱮᱛᱟᱣ ᱟᱫᱮᱭᱟ ᱾ ᱥᱚᱱᱚᱛ ᱟᱡ ᱵᱟᱵᱟ ᱯᱚᱭᱥᱟᱭ ᱮᱢ ᱟᱠᱟᱫ ᱵᱟᱰᱟᱭ ᱦᱚᱲ ᱦᱚᱸ ᱫᱟᱭᱟ ᱜᱮ ᱟᱡ ᱥᱮᱡ ᱵᱟᱝ ᱠᱚ ᱛᱤᱸᱜᱩᱱ ᱠᱟᱱᱟ ᱾ ᱨᱮᱸᱜᱮᱡ ᱦᱚᱲ ᱯᱚᱭᱥᱟᱭ ᱧᱟᱢᱟ ᱳᱠᱟ ᱨᱮ ? ᱩᱱᱟ.ᱜ ᱯᱚᱭᱥᱟ ᱡᱳᱜᱟᱲ ᱠᱮᱭᱟᱭ ᱥᱮᱭ ᱮᱢᱚᱜ ᱼᱟ ! ᱚᱱᱟᱛᱮ ᱠᱚᱝᱠᱟᱨᱟᱢ ᱫᱚ ᱥᱚᱱᱚᱛᱟᱜ ᱚᱲᱟᱜ ᱨᱮ ᱦᱮᱡ ᱠᱟᱛᱮ ᱧᱤᱫᱟ. ᱧᱩᱛᱮ ᱜᱤᱛᱤᱞ,ᱫᱷᱤᱨᱤ ᱛᱮ ᱨᱟᱪᱟ ᱥᱟ.ᱲᱤᱢ ᱠᱚᱨᱮᱭ ᱮᱨᱟᱭ ᱟᱨᱮ ᱪᱟᱯᱟᱫᱟᱭ ᱾ ᱢᱤᱦᱩ ᱢᱮᱨᱚᱢ ᱠᱚᱭ ᱟᱲᱟᱜ ᱜᱤᱰᱤ ᱠᱟᱠᱚᱣᱟ ᱾ ᱱᱚᱝᱠᱟ ᱞᱮᱠᱟ ᱫᱟᱭᱟ ᱜᱮ ᱠᱚ ᱥᱟᱛᱟᱣ ᱮ ᱛᱟᱸᱦᱮ ᱠᱟᱱᱟ ᱾ ᱚᱠᱚᱭ ᱜᱮ ᱟᱛᱳ ᱨᱮᱱ ᱦᱚᱲ ᱵᱟᱝ ᱠᱚ ᱛᱤᱸᱜᱩ ᱫᱟᱨᱟᱢᱚᱜᱼᱟ ᱾ 

  

ᱢᱤᱫ ᱫᱤᱱ ᱛᱤᱠᱤᱱ ᱵᱮᱲᱟ ᱟᱛᱳ ᱨᱮᱱ ᱢᱤᱫ ᱦᱚᱲ ᱫᱚᱨᱠᱷᱟᱥᱛᱚᱭ ᱚᱞ ᱚᱪᱚ ᱠᱮᱫᱮᱭᱟᱭ ᱾ ᱢᱮᱱ ᱫᱚ ᱟᱞᱮ ᱟ.ᱰᱤ ᱥᱮᱫᱟᱭ ᱵᱟ.ᱯᱩ ᱦᱟᱲᱟᱢ ᱟᱢᱚᱞ ᱠᱷᱚᱱ ᱜᱤᱨᱟ. ᱵᱟ.ᱥᱤ ᱚᱲᱟᱜ ᱫᱩᱣᱟ.ᱨ ᱠᱟᱛᱮ ᱢᱮᱱᱟᱜ ᱟᱠᱟᱫ ᱞᱮᱭᱟ ᱾ ᱢᱮᱱ ᱠᱷᱟᱱ ᱮᱴᱟᱜ ᱦᱚᱲᱟᱜ ᱧᱩᱛᱩᱢ ᱨᱮ ᱡᱟᱭᱜᱟ ᱫᱚ ᱢᱮᱱᱟᱜᱼᱟ ᱾ ᱥᱮᱫᱟᱭ ᱨᱮ ᱠᱤᱨᱤᱧ ᱠᱟᱛᱮ ᱵᱟᱝ ᱠᱚ ᱨᱮᱡᱮᱥᱴᱨᱤᱣ ᱟᱠᱟᱫᱟ ᱾ ᱱᱤᱛᱚᱜ ᱚᱱᱟ ᱡᱟᱭᱜᱟ ᱠᱷᱚᱱ ᱟᱞᱮ ᱠᱚ ᱞᱟᱜᱟᱭᱮᱫ ᱞᱮᱭᱟ ᱾ ᱡᱟᱛᱮ ᱵᱟᱝ ᱠᱚ ᱞᱟᱜᱟ ᱫᱟᱲᱮᱣᱟᱞᱮ,ᱚᱱᱟ ᱨᱮᱱᱟᱜ ᱵᱮᱵᱚᱥᱛᱷᱟ ᱦᱟᱛᱟᱣ ᱞᱟ.ᱜᱤᱫ BLRO ᱴᱷᱮᱱ ᱫᱚᱨᱠᱷᱟᱥᱛᱚᱭ ᱡᱚᱢᱟ ᱠᱮᱫᱟ ᱾

  

ᱵᱟᱨᱯᱮ ᱪᱟᱸᱫᱚ ᱛᱟᱭᱚᱢ inquary ᱠᱚ ᱦᱮᱡ ᱮᱱᱟ ᱾ ᱧᱮᱞ ᱠᱮᱫᱟ ᱠᱚ ᱥᱟ.ᱨᱤ ᱜᱮ ᱟ.ᱰᱤ ᱥᱮᱫᱟᱭ ᱠᱷᱚᱱ ᱚᱲᱟᱜ ᱫᱩᱣᱟ.ᱨ ᱠᱟᱛᱮ ᱢᱮᱱᱟᱭ ᱟᱠᱟᱫ ᱠᱚᱣᱟ ᱾ ᱩᱱ ᱫᱚ ᱟᱫᱚ ᱥᱚᱱᱚᱛ ᱟᱨ  ᱠᱚᱝᱠᱟ ᱨᱟᱢ ᱢᱤᱫ ᱵᱟᱨ ᱫᱤᱱ ᱛᱟᱭᱚᱢ BLRO ᱴᱷᱮᱱ ᱠᱚ ᱦᱚᱦᱚᱣᱟᱫ ᱠᱤᱱᱟ ᱟᱨ ᱚᱲᱟᱜ ᱮᱥᱮᱫ ᱟᱠᱟᱫ ᱡᱟᱭᱜᱟ ᱫᱚ ᱠᱚ ᱥᱚᱱᱚᱛᱟᱜ ᱧᱩᱛᱩᱢ ᱛᱮ ᱠᱚ ᱨᱮᱠᱳᱨᱰ ᱠᱟᱫᱟ ᱟᱨ ᱧᱩᱛᱩᱢ ᱞᱮᱠᱟ ᱠᱚᱝᱠᱟ ᱨᱟᱢ ᱯᱚᱭᱥᱟ ᱠᱚ ᱠᱷᱚᱭ ᱟᱫᱮᱭᱟ ᱾ ᱟᱫᱚ ᱥᱚᱱᱚᱛ ᱥᱟᱱᱛᱤ ᱛᱮ ᱜᱤᱨᱟ. ᱵᱟ.ᱥᱤ ᱠᱟᱛᱮ ᱮ ᱛᱟᱸᱦᱮ ᱮᱱᱟᱭ ᱾