সাঁওতা বুনিয়ৗদ হারা রাকাবরে হুডিঞ হাপড়াঃ কৗরি ক চেতান উইহৗর ভাবনা
সারি ধরম হাঁসদা
নেঃএ হালেগে তারাফেনী গাডা দাঃ হিঁজরৗও বোহেল চালাও আকানা। নেঃএ হালেগে ডুলুং গাডা দাঃ ডুলুং ডুলুং লিঁগি বোহেল কাতে ছিলকৗ ছিলকি আতে কাতা ধারেন মারে অঁজরা অৗরুপ ফারচা ইদি আকানা। তেয়ার রাকাব কানা বির দিসম রেনাঃ কৗঁসৗই কুঁয়ৗরি নৗই কাতা ধারেন অত হাসারে তেজান উরবর সতেজ চাষ হাসা। হিজুঃআ বিরদিসম চৗসি কওয়াঃ মনে জিউয়ীরে হৗঁস রৗসকৗ। সেরমা পুরৗও জমআঃ ঞুআঃ সাঁওতি সাঞ্চায় দহ রেনা রৗসকৗ। নওয়া বিরদিসম রেদ ঞেলঃ আ শতকরা ৯৫% হড়গে অত হাসারে ভর কাতে জিয়ন জিউয়ী ক খেমাও অৗগু আকাদা। মিৎ কাথাতে মেন লেখান কৃষিজীবি হড়। নওয়া কৃষিজীবি জিয়ন খনগে গালাং রাকাব আকানা-- অৗডি লেকান হুডিঞ হাপড়াঃ আপাসুলঃ রেনাঃ অড়াঃ কৗরি ( কুটির শিল্প) তিতে তেয়ারআন কৗরি ( হস্ত শিল্প) অড়াঃ অৗসুল জিব জিয়ৗলি ( গৃহ পালিত প্রানী ) পালাও জিয়ন হরা। বাজকম বাবের উঞতেয়ার, তেরেল সাকাম হেজ্ কাতে বিঁডৗ, আনাজ চাষ বাড়গে তেয়ার, কাঠরেনাঃ লাঃরঃ কৗরি-- এমান এমান।
নওয়া কৗমি কদ ঝতগে অৗডি খৗটৗলি রেনাঃ কৗমি কানা। কৗমি সাঁওতে দাম রেনাঃ সঠিক হিসৗব জখা বৗনুঃআ। চেদাঃ সে বাং নওয়া কৗমি ক সাঁওতে দেকো মহাজন কওয়াঃ কিরিঞ অৗকরিঞ সে লেনদেন কারবার মেনাঃআ। অনা খৗতির অৗডি অকতে হাপ দামতেহঁ চালাক চৗতুর মাহাজন ঠেন ক এড়ে হচঃ কানা। নওয়া কৗটিজ কৗটিজ কৗরি ক খন যে মিৎবার কৗওডি বৗড়তি ঞাম কাতে জিয়ন জিউয়ী আপাসুলঃরে জম ঞু সাঁওতে সাঞ্চাও গড়ো রেনাঃ ভরসা ঞামঃআ। অনা হঁ বাং তাঁহেন কানা। অনাতে তেয়ারঃ কানা---"জম কৗমি জং জিয়ন" রেনাঃ হালত চিতৗর, অৗডি অকতে ঞেল আকানা।
আতো দিসম পাড়ারেন হড় দ কুঠিন খৗটৗলি হড়ম দাড়ে খাটাও কাতে যাহা কৗরি ( শিল্প ) ক তেয়ার এদা। অনা দ আক ঠেন বেগার খৗটৗলি হোয়োঃ কান লেকাগে। এনতে রেহঁ রেগেজ জালা আর উপৗয় বৗনুঃ খৗতির কৗমি ইদিগে হোয়োঃ কান তাকওয়া। উনকু দ দিনৗম ক এড়ে হচঃ কান রেহঁ ঞেল দোঃ রেন অকয় হড় গে বৗনুঃ কওয়া। বৗনুঃ অনা লৗগিৎ লাড়ওনা গড়ো। বৗনুঃআ সংগঠন সমিতি। সানামগে ক মেনা আমাঃ জিনিস আমতে কিরিঞ অৗকরিঞ তাম। নংকা নেহাল মনে খৗতির হাট বাজাররেন মহাজন কদ অৗত ক ঞামান লেকা। সরফা দামতে হর ডাহার করে আকওয়াঃ তেয়ার জিনিস রেরেজ ক এহব এনা। নংকা কাতে আতো দিসম পাড়ারেন রেঁগেজ অরেজ হড়আঃ কৗওডি অৗরি আরজাও খেমতা হঁ লিচৗড়ঃ কানা। নওয়া রেনাঃ অৗসলি সুসি দ ( মুল কারন) হোয়োঃ কানা-- অসংগঠিত শ্রম নীতি।
মহাজন কওয়াঃ এড়ে সুঁড়জ খন লাড়া দোগোঃ তেখান সংগঠিত শ্রমিক সংগঠন তেয়ার জৗরুড় মেনাঃআ। অৗডি অকতে ঞেল আকানা। কৗমি কৗসনি সে কিরিঞ অৗকরিঞ তালারে বারয়া হরা মেনাঃআ। মিৎ দ সংগঠিত শ্রমিক সংগঠন। দসার দ অসংগঠিত শ্রমিক সংগঠন। নওয়া বারয়া বার লেকান কিরিঞ অৗকরিঞ রেনাঃ রুপরাহা ঞেলঃআ। সংগঠিত শ্রমিক সংগঠন রেদ কিরিঞ অৗকরিঞ তালাতে জিনিস ক রেনাঃ ঠিকৗ দাম রপড় গটা তাহেনা। তেয়ার রাকাবআ-- সমিতি, কো- অপারেটিভ, সাঞ্চায় দহ রেনাঃ এনেপেম দাড়ে। যাহা দ এড়ে সুঁড়জ মহাজন কওয়াঃ তি খনে বাঁঞ্চাও আ।
অসংগঠিত সংগঠন রেদ-- আমতে আমাঃ জিনিসেম অৗকরিঞা। অডেদ আমাঃ তেয়ার আকাৎ জিনিস ক রেনাঃ ঠিকৗ দাম বাং বাডায় খৗতির মহাজন কওয়াঃ কবজারে পাড়াও কাতে সরফা দামতেগে ক এড়ে হচঃআ। নংকাগে চালাঃ কানা আতো দিসম তালারে। রৗপুদ ধিঁগৗল সাঁগালঃ কানা রেঁগেজ অরেজ হড়আঃ কৗওডি অৗরি।
নতে আতো দিসম তালারে অৗডি লেকান সংগঠন তেয়ারঃ কান রেহঁ রেঁগেজ হড়াঃ মুল হালত বাং মেৎ লুতুর খৗতির অৗসলি হালত দ ডামাডোল হরারে তাঁহে ইদি আকান গেয়া। বাডায় ঞামঃআ--আতো অড়াঃরেনাঃ হুডিঞ হপড়াঃ কৗরি কারবার খন সেরমারে শতকরা ২৫--৩০% কৗওডি অৗরি অরয়ানঃ কানা। নওয়াতেদ মহাজন আড়ৎদার কগে ক লাভবানঃ কানা। অৗত্ উমৗলি ( সুযোগ সন্ধানি) কদক বাডায়া। নওয়া এলাকারে মেনাঃ ক মৗনমি দ লাগচার দুলৗড়িয়ৗ মৗনমি। সাঁওতা লাগচার চেতান রেগে লেতাড় লাবাধিয়ৗও ক তাঁহেনা। সঁগে জম সঁগে জিয়ন। হাপেন লৗগিৎ সাঁওতি দহ রেনাঃ উইহৗর ভাবনা বৗনুঃআ। অকা ক্লাব বাংখান সংগঠন সমিতি হঁ নওয়া ক চেতান দিস হুদিস গড়ো সে উইহৗর ভাবনা চালরেন হড় বৗনুঃ কওয়া। বাডায় মাবন-- আতো দিসমরেন রেঁগেজ অরেজ হড় দ নওয়া কৗটিজ কৗটিজ কৗরি কারবার খন দোঃ বেরেৎ কাতে সাঁওতি সাঞ্চায়রে মনে জিউয়ী গৗঢয়ৗও লেতা ক খান আর সাঁওতি সাঞ্চায়রে ইন্টারেষ্ট দাড়ে চাল আক খান মৗনমিয়াঃ জিয়ন সংস্কৃতি রুপগে পালটাও উতৗর কঃআ। হৗঁডি ভৗটি করে হঁ বাং ক এহের জিকি কঃআ। সংসাররে জমআঃ তাঁহেন খান যাঁহানাঃ সাঁওতা কৗমিরেহঁ উদগৗও গড়ো তাহে কঃআ মেন্তে পৗতয়ৗও। খল হড়মতেদ আন্দোলন করে দ তিনদিন গড়ো তাহেনা ? নওয়া ক চেতান উইহৗর ভাবনা রেনাঃ অক্ত সেটের আকানা মেন্তে মনে হোয়োঃ কানা।
.webp)
