আবোওয়া ডিজিটাল ডেস্ক- পারমেন ২১ জুন মঁড়ে গটাং পনৎ রেন সাঁগে আদিবাসী চৗকরি হড়াঃ কুশ পুতলা সেঁগেলতে আতার রঁগঁ রেনাঃ চিতৗর ঝালকাও রাকাব এনা।
বাডায় আকানা বাংমা সেঁগেল অভিযান আঃ আঁগরা সেঁগেল তে সাঁগে আদিবাসী চৗকরি হড়াঃ কুশ পুতলা ল তরজ্ এনা। অজে লেকাতে বাডায় আকানা বাংমা কাথায় আয়মা সাঁগে চৗকরি-বৗকরি হড় সমাজ, জৗতি, ধরম, হাসা, ভাষা , ইজ্জত , আবাদি বাঞ্চাও লৗগিৎ গড় বাংকো এমঃ কানা। ওনকো চৗকরি-বৗকরি হড় আকোওয়াঃ ঘাঁরঞ্জ আর আকোরেন গিদৗর-পিদৗর লৗগিৎ গেকো উইহৗরেদা মেনতে সেঁগেল অভিযান পাহটা খন অভিযোগ এ আগু আকাদা। চেদাঃ বাংমা ওনকো দ আদিবাসী কাস্ট সার্টিফিকেট ঞাম খৗতির গে তেহেঞ সরকারি চৗকরি-বৗকরি কানাকো মেনতেহঁ কাথায় রাকাব আকাদা। নোওয়া ইদিকাতে বিন চৗকরি-বৗকরি হড় মুদ্রে আদম কদক মেমেন কানা সেঁগেল আতার তে চৗকরি-বৗকরি হড়াঃ মচা-লুটি ল-য়েন তাকোতে পালেন আকো ঞুতুম তে কুশ পুতলা রঁগঁয়েন রেহঁ চেৎহঁ রড় দারাম রেনাঃ চিতৗর বাং ঝালকাও রাকাব লেনা।
নঁতে ঞেল আকানা সেঁগেল অভিযান সেঁগেল দাড়েতে মিৎ মিৎ তে ঝাড়খন্ড রেন মুখিয়ৗমন্ত্রী, রাজ্যপাল, নেতা-মন্ত্রী, দিশমরেন মাঝি-মাপাজি, এমন চেৎ দিশম রেন মারাং মন্ত্রীয়াঃ কুশ পুতলা হঁয় আতার আকাদা। মিৎ-বার হড়াঃ মচারেদ আঁজমঃ কান গেয়া বৗকি মেনতেদ তাঁহেয়েনায় দিশম রেন রাষ্ট্রপতি।
নঁতে আবোরেন খবরিয়ৗ পছিম বাংলারেনাঃ হাপড়া হাপড়া সংগঠন করে খন বাডায় ঞাম কেদা বাংমা আয়মা চৗকরি-বৗকরি হড় গে আয়মা সেনতে সমাজ লাহান্তিরে গড় কো এমঃ কানা। ওয়েস্ট বেঙ্গল ট্রাইবাল ওয়েল ফেয়ার অ্যাসোসিয়েশন রেন সভাপতি মানতান বালকরাম সরেন লৗই সদর আকাদা বাংমা চৗকরি-বৗকরি হড়াঃ গড় সপহৎ বাং তাঁহেলেনখান আদিবাসী সংগঠন চালাও মুশকিল গেয়া। অল ইন্ডিয়া রাইটার্স অ্যাসোসিয়েশন পছিম বাংলা চাঁগা রেন জেনারেল সেক্রেটারী মানতান দ্বিজপদ হাঁসদা গোমকেয়াঃ কাথারে বাডায় আকানা বাংমা চৗকরি-বৗকরি হড়াঃ গড় খৗতির গে তেহেঞ গাঁওতা রেনাঃ লাহান্তি হোয় ইদি কানা। ভারত জাকাত মাঝি পারগানা যুওয়ৗন মহল পুরুলিয়া জেলারেন সভাপতি মানতান রাজেন টুডু গোমকে লৗই সদর আকাদায় বাংমা চৗকরি-বৗকরি হড়াঃ গড়-সপহৎ বেগর সংগঠন রেনাঃ অকা কৗমিগে বাং লাহাঃআ। মানতান টুডু গোমকে আরহঁয় লৗই তরা কেদা জে জাঁহারেগেকো চালাও আকান অকয় চৗকরি হড় গে একেন তিতে বাংকো রুওয়ৗড় আকাৎ কওয়া। বরং সংগঠন আঃ গে মিৎ লেকান দুর্বলতা লৗই গানঃআ জে- সানাম চৗকরিয়ৗন হড় ঠেন বায় সেটের দাড়েয়াকাদা।
নঁতে আদিবাসী সাঁওতা সেচেৎ লাকচার সেমলেৎ, পছিম বাংলা রেন জেনারেল সেক্রেটারী মানতান সুবোধ হাঁসদা আবোরেন খবরিয়ৗয় বাডায় অচো আকাদেয়া জে সাধারন হড় যাঁহালেকা গড় কো এমা অনকাগে আয়মা সাঁগে চৗকরি-বৗকরি হড় সংগঠন রে তাঁহে কাতে সংগঠন কো চালাও এদা সাঁওতে গড়-সপহৎ হঁক এম চালাও এদা। নোওয়া সাঁওতে আরহঁয় লৗই তরা কেদা বাংমা যাঁহায় সংগঠন নোওয়া দাবীয় রাকাব এদা বাংমা চৗকরি-বৗকরি হড় তেহেঞ সমাজ কৗমিরে গড় বাংকো এম এদা এনখান উনি সংগঠন আঃ (অকা সংগঠন রেনাঃহঁ ঞুতুম বাং কাতে) বাডায় লৗগতি কান তায়া জে আয়া অনা সংগঠন ওনকো চৗকরি-বৗকরি হড় বাংকো কুশিয়াঃআ কানা। অনাবেগর আরহঁয় রড় তরা কেদা বাংমা অকয় চৗকরি-বৗকরি হড় গড়য় এমঃ কানা সে বায় এমঃ কানা অনা মেনতে অকা সংগঠন আঃ গে গড় সপহৎ কয় রেনাঃ আইদৗর দ বৗনুঃ আকাৎ তায়া, অনকাগে অকা সংগঠন আঃ কুশ পুতলা রাপাঃ রেনাহঁ আইদৗর বৗনুঃ আকাদা। মানতান হাঁসদা গোমকেয়াঃ রড় খন বাডায়েনা- লাহাতে হড়দ সংগঠন আঃ অ্যাজেন্ডা কো ঞেলা অনা তায়ম গড় এমঃ লৗগিৎ কো লাহা হিজূঃআ।
নংকাগে আয়মা হুডিঞ মারাং সংগঠন পাহ্টা খনগে বাডায় আকানা বাংমা তেহেঞ চৗকরি-বৗকরি হড় মেনাঃ কতেগে নিৎহঁ সংগঠন ক লাড়াওনা রেগে মেনাঃ আকাদ্ কোওয়া। আয়মা সংগঠন ক নোওয়া হঁক দাবীয়াকাদা বাংমা আয়মা সাঁগে চৗকরি-বৗকরি হড় আকোওয়াঃ ঘাঁরঞ্জ রে আডি কম অক্ত এম কাতে, আকোরেন গিদৗর-পিদৗর ক নাপায় সাঁহিচ্ বাং ঞেল কাতে সংগঠন রে তাঁহে কাতে হামাল ভৗরয়ৗ তাঁরেন রে গঃ কাতে আদিবাসী সমাজ লৗগিৎ কো কৗমি কানা। মিৎ-বার সংগঠন কদ নোওয়া হঁক সদর উতৗর আকাদা বাংমা চৗকরি-বৗকরি হড়াঃ গড়-সপহৎ বাং তাঁহে লেনখান যাঁহা লেকান আদিবাসী আন্দোড় গে তালা হররে হাঁসড়ুং ঞুর কঃআ।
তবে চেদাঃ চেৎ খৗতির তেহেঞ আদিবাসী সমাজ কুশ পুতলা লেকান মিৎ নিরঘিন রাপাঃ রঁগঁ চিতৗর এ ঞেল আ? কুকলি দ সমাজ রেন হড়াঃ মচা খনগে রাকাব কানা। নোওয়া কাথাহঁ বাডায়ঃ কানা বাংমা আদিবাসী সমাজ উনবিদৗল দ সেঁগেল জোহার, সেঁগেল মাঝি এমান শাবাদ্ কহঁ বায় আঁজম আগু আকাদা। তবে চেৎ নংকা কাতে সানামাঃরে সেঁগেল লাগাও লাগাও তে মিৎ দিন রিলৗমালা আদিবাসী সানতাড় সমাজ ল-তরজঃআ? আদম হড়াঃ কুকলি তাঁহেয়েন গেয়া।
.webp)
