(হুডিঞ মাছা কৗহ্নি)
জানগুরু লেদেম
রামলাল টুডু
লেদেমদ বাড়হোয় এ তাঁহেকানা। কাঠরেয়াঃ নাহেল, আঁড়গম, কাপাট, পারকম সানামাঃ গেয় বেনাওকেয়া। তবে উনিয়াঃ দোষদ ঞাপাম হড় তুলুচ্ দমেয় গালমারাওআ। গালমারাওগে বাং তপাগঃ তায়তে অক্তরেয়াঃ জম-ঞু আর কৗমি কাজ হঁয় ঢিলৗউ ইদিকেদা। লেদেমাঃ ঢিলৗউ কৗমি বেজারতে আয়মা হড়গে হানাটলা বাড়হোয় ঠেনখন ইসি, আঁড়ার, কাঁড়বা এমান কদক বেনাও অৗগুয়া। দিন দিনতে লেদেমাঃ কৗমিদ অৗধিয়েনতে বৗগিতেয় বড়হেয়েনা। কৗমি আর বাম কৗমি জমদ লাগাঃ গেয়া। মিৎদিনদ আচকাগে লেদেম আতোখনে দৗড়কেদা। দাঁড়া দাঁড়াতে অৗডি সৗঁগিঞ মিৎ আতোরেয় চালাও রাকাব্ এনা। হড়ক তুলুচ রপড়তেয় বুঝৗউ কেদা বাংমা অঁডেনক হড়দক লেলহা ঞঃ গেয়া আর সোর-সোপোর অঝা,ডাক্তরহঁ বৗনুঃ কোআ। অনাতে থড়াদিন তায়ম 'কম কৗমিতে সাঁগে কুড়ৗই' আশতে অনা আতো জাপাঃ রেগে লেদেমদ জানগুরু মেনতেয় ছৗটয়ৗর এনা।
মিৎদিনদ আচকাগে মিৎহড় লাচ্ হাসো খৗতিরক অৗগু আকাদেয়া। লেদেমদ দাঃ আর বুলুং মানতার পাড়হাও কাতেয় ঞু আদেখান উনিয়াঃ হাসোহঁ চাবায়েনা। নংকা-নংকাতে ভুত ছাডাও,ডৗন পাঁজা গটা লৗইতে অৗডিসৗঁগিঞ আতোকরে খন গৗডিভাড়া কাতে লেদেম ঠেনক হিজুঃআ। গটা পাকাড় জানগুরু লেদেমাঃ ঞুতুম পাসনাও এনা।
মড়েটলারেন মিৎটাংগে মৗঝি যেমন হড়ম অনকাগে আড়াংতায়। উনি আতোমৗঝিগে মিৎদিনদ জানগুরু লেদেমে তলাশ্ কেদেয়া। লেদেম বতর আর ভৗবিৎতে নৗঁডরি রহড়েন তায়া ; এন্তেরেহঁ চালাঃদ লাগাও এ গেয়া। আরাঃ ধুতি,দৗহড়ি,মলং পেরেচ সিঁদুর,ঝুনুর সাবল ঠেঁগা আতে চালাও এনায় মৗঝিবাবা ঠেন। চালাওকাতে জহারসালাঃ --- আমেম খজ আকাদিঞৗ মৗঝিবা ?
হোয় গুরুবাবা দেলা নতেগে দুড়ুবমে। গুরুবা, আঁজম কিদৗঞ আয়মা হড়গেম রান বেশ এৎ কোআ ?
লেদেমদ লাজাওতেয় তুঁবুৎ থির আকানা।
মৗঝিবাবায় লৗইএদা , বার-পে মাহাখন মৗঝি বুড়হিয় রুওয়ৗ হাসোঃ কানা। নঃঅয় সাকাম আর সুনুম ; ঘাসাওকাতে মাসে লগন লৗই অৗঞমে নোআ মড়েটলারে তিনৗঃগান আর অকয়ক ডৗন মেনাঃ কোআ ? তিহিঞগে উনকু দলে হানাপুরি কোআ।
নংকান হালত রেয় পাড়াঃআ লেদেমদ বায় ভৗবিত আকানা। উপৗয় বাংতে মৗঝিবাবাআঃ বানার জাঁগা সাবকাতে আয়াঃ সানাম কাথা লৗই পসাঃ কাতে ইকৗয় খজ এনা।
মৗঝিবাবাদ সেটের আকান আতোহড়ক উনিয়াঃ বহঃ মুঁডরৗ কাতে আকো তলহাট খন অৗডিসৗঁগিঞ লাগা ঞিরে হুকুম আৎ কোআ উনি এড়ে 'জানগুরু লেদেম' ।
.webp)
