মিৎ করোনা লৗড়হৗইয়ৗঞ মেনেদা
ডাঃ সুরেন্দ্রনাথ মানডি
জোহার। ইঞদ সুরেন্দ্রনাথ মানডি। পুরুব মিদিনপুর জিলৗ রেয়াঃ তমলুক রে পুরিবার আতিঞ তাঁহেনা। পারমেন ২৭/২৮ এপ্রিল সেচ্ আলে পুরিবার রেন সানাম কলে খুঃ-মাদা-রুওয়ৗ-হড়ম হাসো ঞাম কেৎ লেয়া। সাঁও সাঁও তেগে ডাকতর ঠেন লে ঞেল অচয়েনা। মিৎ হাপ্তা রেনাঃ রান এ অলাৎ লেয়া, সাঁওতে করোনা রেনাঃ পুরিক্ষা অচয় মেতাৎ লেয়া, আর এ মেতাৎ লেয়া করোনা পজিটিভ রেহঁ আলপে বতরঃ আ,আলপে হুলৗসভাঁগা আ। RT PCR পুরিক্ষারে ইঞ আর বৗবু তৗলিঞা রিপোর্ট রেদ করোনা পজিটিভ ঞামেনা। অড়াঃ এরাঞ আর মৗই আঃ রিপোর্ট দ অকালেকাতেচং হেচ্ গে বাং হেচ্ লেনা, এনতেরেহঁ Covid ( corona virus infection diease) হোয়াকান তৗকিন মনে কাতেগে, অড়াঃ খন বাহ্রে বাং অডক কাতে, মেনমা এটাঃ হড় কো সাঁও বাং সরাবরা কাতে ডাকতর এমাঃ রান ক মিৎ হাপ্তা গান জম কাতেগেলে চেঠা ঞঃ এনা। করোনা লৗগিৎ তে আলাদা রান জম সে হাসপাতাল রেদ ভুরতি বাং হোয়াকান তালেয়া।
ইঞদ হড়ম-সাঁওয়ার ডিপার্ট রেনাঃ ‘আয়ুষ’ চাঁগা রিঞ নালহা-আসুলঃ খৗতির বাডায় কান তাঁহেনাঞ জে, চেৎ চেৎ ক বৗড়তি কায়তে জম লেখান হড়ম’রে ‘আজার টেকাও দারাম দাড়ে’ বাড়হাঃআ বিশেষ কায়তে নোওয়া আওহাল রে। অনালেকাতে পৗহিল খনগে এটাঃ জমাঃ ঞুওয়াঃ সাঁওতে সানাম লেকান মসলাপাতি– মেনমা জিরৗ, ধুনিয়ৗ, লবং, এলাচ্ গোলমরিচ্, দারচিনি, বেরেল সাসাং, আদা, রৗসুন, পেঁয়াজ এমান এমান,চ্যবনপ্রাষ, আয়ুষ ক্কাথ আর জ-বিলি, আলে সানাম কগে বৗড়তি কায়তেলে জমেৎ তাঁহেনা। দিনৗম হিলঃ সেতাঃরে কুসুম কুসুম লল দাঃ সাঁওতে দুমুর রাসা আর কাগজি লেবু রাসা লে ঞুয়েৎ তাঁহেনা। নোওয়া ক খৗতির তেগে জৗনিচ্ খান হালকা মাছা লৗড়হৗই তেগে আলেয়াঃ হড়ম রে বাসালেন করোনা দলে কবচ্ কেৎ কোওয়া পে হাপ্তা ভিতরিতেগে।
নিয়ৗ অকতে কোভিড সাঁও সাঁওতে দমেগে ভাইরাল ফিভার, সাধারন খুঃ-মাদা-রুওয়ৗ হোয়োঃ কানা। আপনার কুশি কিরিঞ রান তেগে বেশ হঁ বেবেস কানা। এনতেরেহঁ জাঁহা লেকান খুঃ-মাদা-রুওয়ৗ গে হোয় অচওয়ান সে পোয়লো তেগে হাসপাতাল তে চালাও কাতে করোনা রেনাঃ বন পুরিক্ষা অচয় মা। করোনা সে কোভিড হোয় লেনখানগে জে কোভিড হাসপাতালরে ভুরতিঃ হোয়োঃআ, রুগি সাঁও বাংকো ঞেপেল-রপড় অচওয়াঃআ অনকান কাথা দ বাং কানা; কোভিড রেনাঃ কম মাছা উপসর্গ রেদ আপনার অড়াঃ রেগে আইসোলেসন রে তাঁহে কাতে ডাকতর এমাঃ রান ক জম তেগে বেবেস কানা।
আজার হোয়োঃ পোয়লো হাপ্তা জুদি দমেগে অসুবিস্তা হোয়োঃ মেনমা দমেগে রুওয়ৗ খু,মাদা, হড়মো হাসো, লাঁগা, জাঁহান জম বাং বুঝৗও, সাঁহেৎ তে কষ্ট হোয়োঃ তাহলেখান হাসপাতাল রেগে ভুরতি কাতেৎ চিকিৎসা অচ লেক কানা, জাঁহারেদ অক্সিজেন হয় রুগি এমায় গানঃ। অনাতে কোভিড রেনাঃ রকম ফের বুজ লৗগিৎতে নিয়ৗ অক্তে দ সানাম হড়াঃ অড়াঃ রেগে রুওয়ৗ লৗগিৎতে থার্মোমিটার আর মায়াম রে অক্সিজেন লেবেল তিনাঃ মেনাঃআ অনা ঞেল লৗগিৎতে Pulse Oximeter কিরিঞ দহ লেক কানা। মায়ামরে অক্সিজেন লেবেল জুদি শায়কাড়া ৯২ খন কম হোয়োঃ তাহলেখান, জাঁহারে অক্সিজেন এম রেনাঃ বেবস্থা মেনাঃ অঁডে আডি লগনতে রুগি ভুরতি য়ে হোয়োঃআ।
বতর দ ওনকো করোনা-রুগি লৗগিৎ তেগে, জাঁহায় কোওয়াঃ উমের ৫৫ খন বৗড়তি, সুখালো হড়ম মনে, ডায়াবেটিস, এজমা, হার্ট-লাংস-কিডনিএমান রেনাঃ আজার মেনাঃ তাকো; বাংখান করোনা আজার দ বতর রেনাঃ চেৎহঁ বাং কানা- সনতর তে তাঁহে লেনখান গে, মেনমা মাস্ক হরঃ, তি তালখা কিন সাফাসাফি দহয়, আর হড় গাদেল রে বাং সোর লেনখান গে।
.webp)
