বাং রড় লেখান গে বাং
(সাতাম- সাধু রামচাঁদ মুরমু আঃ জানাম মানাও)
জাহের আয়ো মুরমু : হলা বাংলা ১৬ বৗইশাখ, মাহাকবি সাধু রামচাঁদ মুরমু আঃ জানাম
মাহা তাঁহেকানা। উনিয়াঃ জানাম মাহা আয়মা জায়গারে মানাও আকান রেহঁ আডি আয়মা জায়গারেগে
বাং মানাও লেনা নংকান খবর হঁ ঞাম এনা। সরকারি ভাবতে হঁ উনিয়াঃ জানাম মাহা মানাও রেনাঃ
খবর অকারেগে বাং ঞেল লেনা। মঁড়ে গটাং পনৎ (উড়িষ্য্যা, ঝাড়খন্ড, আসাম, বিহার, বেঙ্গল)
রেনাঃ কাথা ঘানে ঘানে গে খবর পাথাম আর শোস্যালমিডিয়া রে আয়মা আদিবাসী খবর গে অটাং বাডায়া।
মেনখান হলা পারমেন সাধু রামচাঁদ মুরমু আঃ জানাম মানাও রেনাঃ চিতৗর বেঙ্গল বেগর আর করেনাঃ
দ বাং ঞেল লেনা। বাং রেদ অনাকো পনৎ রেনাঃ আয়মা খবর গে গোটা সানতাড়ি শোস্যাল মিডিয়া
গে দখল কাঃ আয় লৗই গানঃ আ। মেনখান সাধু রামচাঁদ মুরমু আঃ জানাম মাহা মানাও রেদ অনকান
চিতৗর বাং ঝালকাও রাকাপ্ লেনা।
বেঙ্গল রেহঁ লৗই গানোঃআ সানাম হড়াঃ অন্তর রেদ জৗনিচ্ সাধু
রামচাঁদ মুরমু দ ঠাঁও বায় ঞাম আকাদা। অনাতেগে উনৗ উনৗ ক্লাব,গাঁওতা,সংগঠন মেনাঃ রেঁহ
সাধু রামচাঁদ মুরমু আঃ জানাম মাহা মানাওরেদ অনকা মাছা বাংক লাহা হেচ্ আকানা। আয়মা
হড়াঃ মেন, বাংমা রেঁগেচ্ নাচার অনলিয়ৗ খৗতির আর উনি তায়ম রে অনকান হড় বাং তেগে উনাঃ
পরচার আহ্লা রে বায় হেচ্ দাড়েয়াকাদা। মেনখান মনেরে কুকলি রাকাপ্ গেয়া মঁড়ে গটাং
পনৎ রে আদিবাসী সানতাড় শিখনৗৎ তেবোন খাটো গেতে? উন মারাং মাহাকবিয়াঃ তেহেঞ হঁ রেঁগেচ্-নাচার,
শিখনৗৎ, আতো-দিসম আর রং বন বাছনাও এদা ? অনকা রেদ নংকান সাঁওতা আর তিনাঃ গেবাং লাহাঃ
দাড়েয়াঃ আয়, কুকলি দ তাঁহেন কান গেয়া।
উন অক্তে সাধু রামচাঁদ মুরমু আঃ অনল অনড়হেঁ, সেরেঞ আর গায়ান
মঁড়ে গটাং পনৎ রেগে দুল দুলৗও লেনা। উনিয়াঃ সেরেঞ তেমা সানাম আদিবাসি কোগে কো মাতাও
উতৗর লেনা। উনিয়াঃ সেরেঞ তেগে আদিবাসি কো জুমিদ্ আর বাঞ্চাও রেনাঃ হর কো পাঁজা ঞাম
লেদা। মেনখান নিৎ চেৎ রে চিকৗয়েন তে সাধু রামচাঁদ মুরমু আঃ জানাম মাহা মানাও রেহঁ হিদিচ্
হেচ্ আবোন কানা। লৗই গানঃ আ আদিবাসি কো তালারে নংকান চিতৗর ঞেল কাতেগে মিৎ বাঙ্গালি
সাংবাদিক এ অল এদায়- “জন্ম দিবসে অবহেলিত মহাকবি সাধু রামচাঁদ মুরমু”। আদিবাসি কো আপনার
অন্তররে কুকলিঃ মাবোন সৗরিগে নংকান অল ঞেলতে তেহেঞ লাজাও বাংবোন আইকৗও এদা ?
.webp)
.webp)
