আতো-অড়াঃ-টলা-পাড়া রেহঁ নিৎ সাঁগে হড়কো রুওয়ৗ-হাসোঃ কানা

আবোওয়াঃ ওয়েব পেজ- বাং বাংতে নিৎ আতো-অড়াঃ-টলা-পাড়া রেহঁ আয়মা হড়কো রুওয়ৗ-হাসোঃ কানা নংকান খবর গে নিৎ আতো-অড়াঃ করে খন গে রাকাব হিজুঃ কানা। তবে চেৎ কোভিড- ১৯ ? বাং নোওয়া ইদিকাতে আতো-অড়াঃরেন অকয় গে মচা বাংকো ঝিচ্ এদা মেনতেহঁ বাডায়ঃ কানা। বাডায় আকানা রুওয়ৗ-হাসোঃ কানাকো আর এলাকারেন ডাকতর, কবিরাজ আর বাংখান রান দোকান খন রুওয়ৗঃ রান কিরিঞ আগু কাতেৎ গেকো জম এদা। ধৗরতি জাকাত যাঁহা কোভিড আওহাল চালাঃ কানা, নোওয়ারেদ রুওয়ৗ-হাসো লেনখান গে মাড়াং টেস্ট অচোয় রেনাঃ কাথা সরকার পাহ্‌টা খন সে হড়ম সাঁওয়ার দপ্তর খনহঁ ঘানে ঘানে গে লৗইয়ঃ কানা। মেনখান নোওয়া লৗগিৎ দ আতো অড়াঃরেন হড়াঃ চেৎ চেতওনা চিতৗর গে বাং ঞেলঃ কানা। আতোরেন শিখনৗতিয়ৗ, বুরধি জীবি সে ক্লাব, গাঁওতা কহঁ অনকা লাহা হিজুঃ বাংকো ঞেলঃ কানা। হড়ম সাঁওয়ার দপ্তররে কৗমিয়ৗকো সাঁও হঁ আতো অড়াঃরেন হড়াঃ অনকা যোগাযোগ বাং ঞেলঃ কানা মেনতেগে আবোরেন খবরিয়ৗ কো বাডায় অচো কানা। 

আরহঁ বাডায়ঃ কানা বাংমা নংকান আওহাল রেহঁ আয়মা আতোরেগে বাপ্লা অড়াঃ, ভাঁডান অড়াঃ, মাঁ মড়ে এমান কৗমি কো হুয় পারম চালাঃ কানা। নোওয়া কো হেলমেল তালাতেগে রুওয়ৗ-হাসোঃ কো আরহঁ বৗড়তি ইদি কানা মেনতে বাডায়ঃ কানা। নোওয়াকো ইদিকাতে নিৎ গে টেকাও দারাম নিহৗতি লৗগতি কানা মেনতে ডাকতার বাবু কো কো লৗলৗই কানা। ডাকতার বাবু কোওয়াঃ মেন লেকাতে- আতো-টলা-পাড়া রেহঁ আথৗওড়ি দাঁড়া বাং গানোঃ আ। আথৗওড়ি হড় অড়াঃ বাং চালাঃ গে নাপায়া। যাঁহায় সাঁও রপড় অক্তে সাঁগিঞ খন গে রপড় বুগিয়ৗ। অড়াঃ খন বাহ্‌রে অডোক লেনখান গে মাস্ক বেওহার হোয়োঃ আ। চেদাঃসে শাহার-বাজার সুমুং দ বাং তেহেঞ আতো-অড়াঃ রেহঁ বৗই বৗইতে কোভিড পজিটিভ কো বলন কানা। ডাক্তার বাবু তাকোওয়াঃ কাথা লেকাতে আতো-অড়াঃ রেন হড় নিৎগে বাংকো সন্তর লেনখান হাপেন আডি মারাং বে-বৗড়িচ্‌ দিন দারায় কানা। তবে নিৎ ধৗবিচ্‌ তে অনকা বে-বৗড়িচ্‌ রেনাঃ খবর দ বাং ঞাম আকানা।