আবোওয়াঃ ওয়েব পেজ- আয়মা দিন খন গে জুম মিটিং তালাতে আদিবাসী সারনা ধরম আয়ুরিয়ৗ সালখান মুরমুয় রড় আগুয়েদা বাংমা সাঁওতারেন সাঁগে মাঝি পারগানা বাবা কদ রুমঃ বুলঃ, ডাঁডম, হিঁসৗ-সুয়ৗ, জুঁমড়ি, মুরুখ গে কানাকো। উনিয়াঃ আরহঁ মেনদ বাংমা মাঝি কদ সংবিধান রেনাঃ চেৎ তেৎ গে বাকো বাডায়া। উনকু খৗ তির গে তেহেঞ ডৗন পরথা হঁ বাং চাবাঃ কানা মেনতে অভিযোগ এ আগু আকাদা। আর নুকু মুরুখ মাঝি কো খৗতির তেগে কাথায় সেদায় খন নিৎ হৗবিচ্ সমাজ বেবস্থা রেনাঃ চেৎ লাহান্তি গে বাং হুয় আকানা মেনতেহঁ আয়মা মিটিং তালাতেয় সদর আগুয়েদা। নিৎ অনা ইদিকাতে চালাওয়েন ১৫ ফেব্রুয়ারী হিলঃ সাঁগে মাঝি কো “জেরেৎ কাতে বেরেৎ” রেয়াঃ কাথায় রড় আকাদা। ইনৗ হিলোঃ যাঁহায় মাঝি কো সাঁওতা রেনাঃ কৗমিরে গড় বাংকো এমঃ কানা উনকু কোওয়াঃ কুশ পুতলা সেঁগেল অভিযান পাহটা খন আয়মা জায়গা রেকো রাপাঃ কেদা মেনতে বাডায় আকানা।
নোওয়া কাথাকো আঁজম সে বাডায় কাতেহঁ সমাজ রেন মাঝি-পারগানা কোওয়াঃ পাহটা খন রড় দারাম রেনাঃ চেৎ সাড়া সৗবুদ্ গে নিৎ ধৗবিচ্ বাং ঞেল আকানা। কুকলি রাকাপ কানা তবে চেৎ সালখান মুরমু মাঝি-পারগানা ইদি কাতে জাঁহা কাথা কোয় রড় আগুয়েদা অনাগে কি ঠিক ?
তবে নোওয়াকো কাথা ইদিকাতে আয়মা হড় গে সালখান মুরমু সেনগে সার কো আড়াঃ এদা। বাডায় আকানা তবে চেৎ সালখান মুরমু দ মাঝি হপন দ বাং কানায় ? হড় হপন কোওয়াঃ আয়মা লেকান বিন্তী খন বাডায়ঃআ বাংমা সানতাড় অড়াঃরে জানাম লেনখান মাঝি আরি তালাতেগে ছৗটিয়ৗর, বাপলা, ভাঁডান এমান কৗমিকো সুসৗরঃ আ। কাথা রাকাপ কানা তবে চেৎ সালখান মুরমু দ মাঝি আরি বাহরে খনে রড় এদা ? সাঁগে মাঝি কোওয়াঃ কুশ পুতলাঃ জেরেৎ কাতে আচ্ হঁকি বায় আতারঃ কানা ? সাঁগে মাঝি কোওয়াঃ কুশ পুতলাঃ জেরেৎ কাতে দিশম তালারে অকা জুমিদ্ রেনাঃ কাথায় রড়ড় কানা। নংকা কুশ পুতলাঃ জেরেৎ কাতে তিস হঁ আদিবাসী কো বাংকো জুমিদ্ দাড়েয়াঃ মেনতেহঁ আয়মা হড়গে দুখ, লাজাও কো সদর আকাদা আর নংকান ঘটন রেনাঃ নিৎহঁ বে-বৗড়িচ্ পাহটা গেকো রড়ড় কানা। আয়মা হড় নংকান অভিযোগ হঁক আগুওয়াদা বাংমা সালখান মুরমু আঃ বিচৗরতে সে আয়াঃ কাথাতে জাঁহায় মাঝি কোগে বাংকো আঁজমেদা সে বাংকো চালাঃ কানা উন উনকু কোগে উনিদ রুমঃ বুলঃ, ডাঁডম, হিঁসৗ-সুয়ৗ, জুঁমড়ি, মুরুখ এ মেতা কো কানা। মিৎ বার মাঝি বাবা বৗড়িচ্ মানে নোওয়াদ বাং কানা জে গটা মাঝি-পারগানা সিস্টেম গে বৗড়িচ্ আ। তবে চেৎ মাঝি-পারগানা সিস্টেম বিরুধরে সালখান মুরমুয় চ্যালেঞ্জ এদা ? আয়মা হড়াঃ গে নোওয়াহঁ কুকলি তাঁহেনকানা।
নঁতে দিশম রেনাঃ লিখিত সংবিধান আর সানতাড় সমাজ রেনাঃ মাঝি-পারগানা পরথা দ জুদৗ গেয়া মেনতেহঁ আয়মা হড় কো সদর আকাদা। সংবিধান লেকাতেদ মিৎ টাং দিশম চালাঃ আ আর মাঝি-পারগানা সিস্টেম লেকাতেদ তামাম সানতাড় সমাজ চালাও হিজুঃ কানা। অনা বেগর মাঝি-পারগানা সিস্টেম দ সংবিধান খনহঁ আডি মারেয়াঃ কানা মেনতেহঁ আয়মা হড়কো সদর আকাদা। যাঁহাদ যুগ যুগ খন হেচ্ আগুওয়াকানা। অনারে মিৎ টাং মাঝি বাবা-আঃ দিশম রেয়াঃ সংবিধান বাডায় রেনাঃ জাঁহান লৗকতি মেনাঃআ কি? আয়মা মাঝি হপন কোওয়াঃগে তেহেঞ নংকান কুকলি রাকাপ কানা? নোওয়াহঁ বাডায় আকানা আয়মা দিসমরে নিৎহঁ অলিখিত সংবিধান লেকাতে দিশম চালাঃ কানা। আর অনালেকাতে মাঝি-পারগানা সিস্টেম হঁ মিৎটাং অলিখিত সংবিধান কানা।
নঁতে নোওয়াহঁ হড়াঃ বাং বাডায় কাথা দ বাং কানা জে সালখান মুরমুদ মিৎ রাজআরি নেতা কানায়। নোওয়া লাহা অকা জখেজ্ ঝাড়খন্ড, অকা জখেজ্ জে.কে.এল.এফ. অকাঘৗড়িচ্ বিজেপি, আরহঁ জেডিপি তিন করেচং জেডিইউ এমান দল রেন নেতা লেকাতে উপরুম মেনাঃ আকাৎ তায়া। উনিয়াঃ কাথা লেকাতে গটা সমাজ রেন মাঝি-পারগানা কো চালাঃআ নোওয়াদ অবাস্তব উইহৗর কানা মেনতে আয়মা হড় কো মেন এদা। আয়মা হড় কুকলি কো দহ আকাদা- নংকান বহুরুপি নেতা আঃ কাথা লেকাতে গটা সমাজ রেন মাঝি-পারগানাকো বাংকো চালাঃ কানা মেনতেগে আয়া এধ্রে দ ? সে আয়া কাথা লেকাতেগে গটা সমাজ রেন মাঝি-পারগানা কো চালাঃ আ- অনা গেকি উনি দয় আশঃ কানা ?
.webp)
.webp)
