তেহেঞ দ "আদিবাসী হড়াঃ দুক হমর মাহা" (খরসওয়া গুলিকান্ড)
দুর্গাচরণ মুরমু
তেহেঞ দ ধৗরতী জাকাৎ ইংরাজী নাওয়া সেরমা ক আতাং দারাম এ কানা আডি রৗস্কৗ সালাঃ। মেনখান আবো আদিবাসী হড় ঠেন দ আডি দুক রেনাঃ কানা।
১৯৪৮সাল রেনাঃ ১জানুয়ারী সৗরদি মাহা খরসওয়া বাজার রে সাপ্তাহিক হাট তাহেকানা (নে-বেতার দ - খরসওয়া-সরাইকেলা জেলা,ঝাড়খন্ড পনত্)। অনাতে বুডহি-হাড়াম, কড়া-কুড়ি সানাম লেকান হড় গে আকওয়া আপান-আপিন সামান হাতাও ক চালাও আকান তাঁহেনা আর মিৎ মারাং ঝমেলায় হঁ খরসওয়া বাজার রে তাহেকানা। গটা হাট টান্ডি ওড়িশা মিলিটারী ফোর্স তেকো পেরেজ আকানা।
আদিবাসী করেন মারাং নেতা মারাং গমকে জয়পাল সিং এ হিজুঃ কানা নওয়া ঝমেলায় রে। মারাং গমকে জয়পাল সিং মিৎ ঝালাক মেৎ তে ঞেঞেল লৗগিৎ আর উনিয়াঃ কাথা আজম লৗগিৎ ঞেলে-দুমুর লেকা হড়ক সহর সেটেরঃ কানা জৗতিয়ৗরী সাপাপ আতে টামাক,তুমদা:,করতাল,সাঁকওয়া সাডে আতে আর আক্-সার কৗপি সাব কাতে। চেদা: সে খরসওয়া-সরাইকেলা রেন সানাম আদিবাসী হড় কওয়া মিৎটান দাবী তাঁহেকানা, খরসওয়া-সরাইকেলা দ ওড়িশা পনত রে বাং বন সাবাও হচোওআ। অলগ ঝাড়খন্ড পনত বন হাতাও আ আর বাংখান বিহার পনত রেগে খরসওয়া-সরাইকেলা দ তাঁহে হচওয়ান,এন্তেরেহঁ ওড়িশা পনত রেদ বাং বন বল-মেশাঃআ। উন অক্তে মারাং গমকে জয়পাল সিং আ আয়ুরতে ঝাড়খন্ড আন্দোলন মিৎ মারাং রূপে ধারণ আকাদা। মেনখান কেন্দ্রীয় সরকার দ মিৎ সমঝোতা চুক্তিয় স্বাক্ষর আকাদা ভাষা ভিত্তিক রাজ্য গঠন রেনাঃ।
অনা খৗতির খরসওয়া-সরাইকেলা দ ওড়িশা রাজ্য রে মেশা রেনা: কাথায় মেনদা। চেদাঃ সে খরসওয়া-সরাইকেলা রেন জৗসতি কায়তে হড়গে ওড়িয়া ভাষা তেগে ক রড়-রপড়া। আর নতে ঝাড়খন্ড আন্দোলনহঁ আডি জোরালো আকানা। ইনৗ হিলোঃ রেনাঃ ঝমেলা রে খুটি, রাঁচী, চাইবাসা,সিমডেগা, লাতেহার খন দমেল-দমেল কমসে কম মড়ে গেল হাজার হড় ক জারওয়া লেনা খরসওয়া বাজার রে। কোন কারণ বশতঃ জয়পাল সিং অনা জমেলায় রে বায় সেটের লেনা। জমেলায় রে সেটের আকান হড়ক জয়পাল সিং তাঙ্গি-তাঁড়াঃ কাতে ক মকঞেনা। ওড়িশা মিলিটারী ফোর্স সেটের আকান দমেল-দমেল হড়ক ছত্রভঙ্গ বাং ক দাড়েয়াৎ কতে; আচকা গে সেঙ্গেল টুটি ক এতহব কেদা। জিউয়ী বতর জালা বাঞ্চা লৗগিৎ হান্তে-নাতে ঞি-ঞির ক ধুরৗও এনা। জমেলায় টান্ডি সুর রেগে মিৎ মারাং কুঞ তাঁহেকানা। অনা কুঞ রে ঞুরু কাতে শায়-শায় হড়াঃ জিউয়ী বৗতি ইঁড়িচ্ এনা।
ওড়িশা মিলিটারী সেঙ্গেল টুটি তে গচ্ অচো আকান হাজার হাজার হড় আর শায়-শায় বাঞ্চাও হড় জমেলায় রেনাঃ সুর কুঞ রেকো লেবদা গিডি কাৎ কওয়া। আর আদম কদ্ ট্রাক রে লাদে কাতে বির-বুরু করে ক গিডি হট্ কাৎ কওয়া; যাতে লাশ রেনাঃ সঠিক হিসৗব আলো ক ঞাম দাড়েঃ মা। আর অলগ ঝাড়খন্ড রাজ আন্দোলন দাবাও লৗ গিৎ তে।১৯১৯ সাল রে পাঞ্জাব রেনাঃ জালিওয়ানাবাগ হত্যাকান্ড খন মারাং নৃশংস হত্যালীলা তাহেকানা মেনতে নাগামিয়ৗ কওয়া অল করে খন বাডায় ঞাম আকানা। ভারত দিশম ফুরগৗল কাতে আদিবাসী ক চেতান রে নওয়া গে তাঁহে কানা পোয়লো ভয়ঙ্কর হত্যালীলা। তিনাঃ আদিবাসী হড় চংক নওয়া খরসওয়া গুলিকান্ড রেক্ শহীদ আকানা অনারেনাঃ সঠিক হিসৗব নিতদ্ ধৗবিচ বাং ঞাম আকানা। ভারত দিশম রেন সানাম লেকান হড় গে খরসওয়া গুলিকান্ড ইদি কাতেৎ রড় দারাম আর ধিক্কার ক জানাও লেদা। হত্যালীলা তদন্ত লৗগিৎ সরকার পাহাটা খন ট্রাইবুনাল কমিটি হঁ গঠন লেদা ক। মেনখান নিত হৗবিচ তে তদন্ত রেনাঃ চেৎ রিপোর্ট হঁ বাং সদর সামাং লেনা। আর নওয়া গুলিকান্ড রেন মুল পান্ডা দয় অকয় কানা নিতহঁ বাড়ায় বাং ঞাম লেনা আর তিস কতে শহীদ পরিবার ক নওয়া রেনাঃ নাপায় বিচৗর ক ঞামা অনা তাঁগি রেগে মেনাঃ কওয়া।
.webp)
.webp)
