তেহেঞাঃ মাহা ১ লা জানুয়ারি দিসৗতে
-মৗই বুরুলুকুই মান্ডি
১লা জানুয়ারি দ ইংরেজি নাওয়া সেরমা রেনাঃ এতহব মাহা লেকাতে রৗস্কৗ-রমজ রেয়াঃ মাহাদ বাং কানা, এনহিলোঃ আবো আদিবাসী কঠেন দ দুক হমর হালাং, উইহৗর আঁজলে রেনাঃ মাহা কানা। ১৯৪৮ সাল রেয়াঃ ১লা জানুয়ারি, নিতোআঃ ঝাড়খন্ড পনৎ রেয়াঃ খরসোয়ারে আদিবৗসী কোওয়াঃ মিৎ মারাং নিরলৗ-জমেলায় চেতান উড়িষ্যা মিলিটারী পুলিশ কোওয়াঃ নিরিঘিন গুলি-বৗরুদ তে হাজার হাজার আদিবাসী কো দাঁড়ে(শহীদ) আকানা। নোওয়া গপচ্ দ ভারত রেয়াঃ ‘জালিয়ানওয়ালা গপচ্’ সাঁও তুলুচ্ গানোঃ আ।
হাজার হাজার শহীদ কোওয়াঃ হড়মঃ মায়াম বাদালতে ১৯৪৭ সাল রেনাঃ ১৫ আগস্ট হিলোঃ ভারত দিশম ফুরগৗ ল আকানা। অনা তায়ম তায়ম গে পনৎ হৗটিঞ রেনাঃ কৗমি হরা সাব লেনা। আদিবৗসী কহঁকো দাবী কেদা ‘ঝাড়খন্ড পনৎ দ ‘আদিবৗসী পনৎ’ লেকাতে হৗটিঞ সে লেখা গটাঃ মা।
পনৎ শাসনিয়ৗ পাহ্টা খন সরাইকেল্লা আর খরসোয়া নোওয়াকিন বারয়া তল্লাট দ উড়িষ্যা পনৎ সাঁও সেলেদঃ মা মেনতে জৗহির গটা লেরে অনাকিন বারয়া তল্লাট রেন শাসনিয়ৗ কদ কো হেঁ সৗরি কেদা। মেনখান অঁডেরেন আদিবাসী কদ নোওয়ারে বাংকো রেবেন লেনা। ওনকোওয়াদ মিৎটান গে দাবী তাঁহেকানা জে অনাকিন বারয়া তল্লাট দ ঝাড়খন্ড পনৎ সাঁও সেলেৎ মেসায় হোয়োঃ আ। মেনখান উন অনা আঁস বাং পুরুন লেন তাকোওয়া। বরঞ্চ বিহার পনৎ রেয়াঃ আদিবাসী তল্লাট কো সাঁও অনাকিন বারয়া তল্লাট সরাইকেল্লা আর খরসোয়া সেলেৎ লৗ গিৎ শাসনিয়ৗ পাহ্টা খন আঁগচ্ (প্রস্তাব) হোয়লেনা। নোওয়া বিরুধ রেগে নাহাঃ ঝাড়খন্ড রেয়াঃ খরসোয়া রে ৫০,০০০ খনহঁ বৗড়তি আদিবাসী কোওয়াতে মিৎ মারাং জোমেলায় ‘আদিবাসী মহাসভা’ হোয় লেনা। আর অনা মহাসভা রেগে ‘দসার জালিয়ানওয়ালাবাগ’ মেনমা খরসোয়া আদিবাসী নিপুচ্ দ হোয় লেনা।
(‘দিনৗম খবর’ ঠেন গড় হাতাও হোয়াকানা)
.webp)
.webp)
