(হুডিঞ কৗহ্‌নি)

কুতরু হপনাঃ কাথা 

নিকোলাস মারানডি 

আঁঘাড় চাঁদো রেয়াঃ বুসুপ্ পালারে সেতাকো হপন আকানা। লৗটুবা দ উলৗট -পালাট কাতেয় ঞেল কেৎকো খান, ঞেলেৎ কোওয়ায় অৗঁডিয়ৗ সেতা খন একেন এগাঁ সেতা হপনগে ঢের দ কো হপন আকানা। অৗঁডিয়ৗ সেতা দো মিৎ বারগে। আর অৗঁডিয়ৗ সেতামা নাহয় আতো রেন মিৎবার গিদরৗকো অৗসুল লৗগিৎকো ইদিকোওয়া। মেনখান নোকো এগাঁ সেতা হপন দো অকয় হঁ বাংকো ইদি লৗগিদঃআ। ওনাতে লৗটুবা দ গিদরৗকোয় মেতাৎ কোওয়া- " হেঁদায়া বৗবুকো, নোকো সেতা হপন হানা বৗয়হৗড় সেচ্ ইদি ওটো কাকোপে। সেতা হপন - হপনতে কো ঢিরি চাবায় না। "

আসলরে আলে ঘারঁজরে উনৗঃ সাঁগে সেতা দো বাংকো তাঁহে কানা। আলেরেন মারাং উতৗর কৗলু সেতায় গচ্ এন খানগে, আলেরেন হপন বৗবু রৗমকু দো সেতা- সেতায় অৗড়িস চাবা কেদা। আদ লৗটুবা গে মিৎ দিন দো হর খন মিৎটেন হপন - হপন এগাঁ সেতা হপনে অৗগু কেদেয়া। আদ অনে উনখনগে আলে ঠেন এগাঁ সেতাদো কো ঢের ইদিয়েনা। আর উনি খোনগে তেহেঞ দ আরহঁকো হপন ইদিয়েন খান লৗটুবা দোয় অৗড়িস চাবায়েনা। বছর - বছর সেতা হপন- হপনতে অড়াক্ কো পেরেচ্ চাবা কেদা। আর অনা অৗড়িস তেগে লৗটুবা দোয় মেনকেদা, " সেতা হপন ইদি গিডি বাড়া ওটো কাকোপে। " 

আদ আলেরেন বৗবু রৗমকু সাঁওতে, আতো রেন গিদরৗ হঁকো রিয়ৗও জারোওয়ায় এনতে, বেগ করে , বসতা করে সেতা হপন ভরাও কাতে হানে বৗয়হৗড় রেকো গিডি বাড়া ওটো কাৎ কোওয়া আর রিয়ৗঃ ঢুমবৗঃ কো দৗড় অৗগু কেদা অড়াঃ সেচ্ খাঁ খঁ সাঁহেৎ কাতে , পাছেরে সেতা হপনকো পাঁজা অৗগুকো। আর রৗসকৗ সালাঃ লৗটুবাকো লৗয় আদেয়া যে আলে দো সেতা হপনলে গিডি ওটো কাৎ কোওয়া। আর মেঁৎহা কো কয়ঃ উরিচ্ আকাওদেয়া যে কৗমি বাখরা পাশেচ্ যাহানাঃএ এমাকো। মেনখান লৗটুবা দো চেৎহঁ বাংএ রড় লেৎতে, গিদরৗকো হঁ আপান-অৗপিন হানতে - নাতেকো দৗড় চাবা কেদা। 

 এনেগে ঞুহুম গৎ আকানা। বৗয়হৗড় খোন সেতা হপনাঃ রাঃ আঁজমঃ কানা।। নতে বোগেতে রাবাং আর থড়া - থড়া পৗছিয়ৗয় হয়েৎ তাঁহে কানা। আদ লৗটুগোওয়াঃ লুতুর রে সেতা হপনাঃ রাঃ তারকোয়েন খান, লৗটুগো দোয় মেনকেদা , "চেদাঃ য়াপে ইদি গিডি ওটো কাৎ কোওয়া সেতা হপন দো, মাসে কোম কো হারনঃ কানা। " আদ বৗবু রৗমকু দয় মেনগৎ কেদা, " ইঞ লৗটুবা গেথয় মেতাঃ লে ইদি ওটো কাকো পে, ওনাতেলে ইদি ওটো কাৎ কোওয়া। " আদ লৗটুগো দোয় মেনকেদা , " নুয় হাড়াম দো, চেলেগে বায় ঞেল সাহাও কোওয়া। মাসে তিনৗঃকো কসটঃ কানা। " নোতে লৗটুবা দো বহঃ তুমবুৎ কাতে অপরাধী লেকা চুপচাপে থির আকানা। লৗটুগোয় রাঁগাও লেনখান চেৎহঁ বাংএ রড়া। এনতে লৗটুগো দো অৗডিয় দুলৗড়েয়া। নোতে সেতা এগাঁ হঁ ধাঁওড়াঁ-ধৗওড়িয় সেঁদরায়েৎ কোওয়া আচ্ রেন হপন আরে কুঁয়-কুঁয়ুঃ কান তাঁহেনা। ওনাকো ঞেল আর আঁজম কাতে লৗটুবা দো দায়া হেচ্ আদেয়া আর গড়ম গিদরৗয় মেতাদেয়া , "দেলায়া রৗমকু, বসতা আর ঝলা সাবমে? " আর আচ্ দো মিৎটেন লায়েট সাপ্ কাতে সেতা হপন অৗগু রুওয়ৗড় লৗগিৎ কিন মহডায়েনা অনা ঞুত- ঞিঁদৗরে ......।