আবোওয়াঃ ওয়েব পেজ- পুরুলিয়া জেলা আড়শা থানারে মেনাঃ কান্টাডি ‘সনত্ তারাস’ ক্লাব আঃ ২৫ সেরমা পুরৗও রূপেগড় হাসেলাং জাঁকজমক সালাঃ হুয় পারমেনা। বাডায় আকানা হলা ২৯ ডিসেম্বর সেতাঃ খনগে নানাহুনৗর কৗমিহরা তালাতে আখড়া কো সাপ্ড়াও লেদা। নোওয়া আখড়ারে নেশ ২০২০ সালরে মাধ্যমিক আর উচ্চমাধ্যমিক রেন নাপায় অর্জ ক ঞাম আকাৎ সানতাড়ি পৗঠুওয়ৗ বাবু-মৗই তাকো ক্লাব পাহ্টা খন গুন মানাও সারহাও কো চাল আৎ কোওয়া। নতে ক্লাব পাহ্টা খন সৗহিজুহি লেন ফুটবল ফাইনাল খেলোড রে ধাৎকিডি M.H.H.M. কচা কুলহি ফুটবল টিম দ নিপানিয়া খেরওয়াল সাঁওতা চিরগৗল গাঁওতা ট্রাইবেকারতে পৗডু কেদেয়ায়। ক্লাব রেনাঃ সৗগুন ডাহার তাড়াম রে সেটেরলেন ঞেঞেলিয়ৗ কঁহ ক্লাব রেন রৗসিয়ৗ কো সাঁও মিৎ সাঁওতে জাঁগা কো ঝাঁপ কেদা। ক্লাব আঃ নোওয়া ২৫ সেরমা পুরৗও রূপেগড় হাসেলাং আখড়ারে সুর সাঁগিঞ খনহঁ ঞেল জং লেকা ঞেঞেলিয়ৗ কো সহর সেটের লেনা।
আখড়ারে পেড়া লেকাতে মানতান বাজার মাঝি ( ঞুতুমান ফুটবলার), রামপদ কিস্কু, আড়শা ব্লক সাংস্কৃতিক মঞ্চরেন সেক্রেটারী মানতান দেবাশীষ মোদক, খবরিয়ৗ নরেন্দ্রনাথ গুপ্ত, স্বপন কুমার মহাপাত্র, আব্দুল রহিম, চিত্তরঞ্জন মাহাতো এমান মানতান গোমকে কো সেটের তাঁহেলেনা।
বাডায় আকানা নোওয়া ক্লাব জানাম তরা খনগে অনা এলাকারেন আদিবাসী হড়-হপন চেতানাও লৗগিৎ মিৎ লেতাড় গে কৗমি আগুয়েদায়। বিশেষ কায়তে সানতাড়ি পৗঠুওয়ৗ গিদৗর চেতান আডি কাজাক এ কৗমিয়েদা। বাডায় আকানা বাংমা কয়েক সেরমা ধুরিয়ৗ দুরগা পূজা আর নিরন ছুটিরে ক্লাব পাহ্টা খন মাধ্যমিক আর উচ্চমাধ্যমিক পৗঠুওয়াঃ কো লৗগিৎ ফ্রীতে কোচিং রেনাঃ এ বন্দেজ আগুয়েদা। আরহঁ বাডায় আকানা বাংমা আডি আয়মা অক্তগে এলাকারেন রেঁগেচ্-অড়েচ্ হড় কো লৗগিৎ লুগড়িচ্-লাপো আর কম্বল কো দান আকাদা। রেঁগেচ্-নাচার পৗঠুওয়াঃ কো লৗগিৎ পুঁথি-পতব এমান কঁহ গড় কো এম আগুওয়াদ্ কোওয়া মেনতেহঁ বাডায় আকানা। বাডায় এনা পারমেন নোওয়া লক ডাউন রে ক্লাব পাহ্টা খন পেয়া অঞ্চল রেন রেঁগেচ্-নাচার হড় জমাঃ গড় কো এম চাল আৎ কো তাঁহে কানা। এমন চেৎ অনা লক ডাউন রেগে পুরুলিয়া সিধু-কানু মিশন ভালিডুংরী রেহঁ গড় কো এম আকাদা মেনতেহঁ বাডায় আকানা। নংকাগে সনত্ তারাস ক্লাব এলাকারেনাঃ ভৗলৗই কৗমিরে মিৎ লেতাড়গে জপড়াও মেনাঃ আকাদেয়া। অনাতে এলাকারেন আয়মা হড়াঃ মচা করে খনগে ক্লাব রেনাঃ সৗউকৗরি কাথা কঁহ আখড়া রেগে আঁজম এনা।
২৫ সেরমা পুরৗও দিশৗ রুওয়ৗড় আখড়ারে সেটের লেন ফাউন্ডার মেম্বারস কো সাঁওতে নাওয়া নাওয়া মেম্বারস কো মিৎ ঘৗড়িচ্ রেনাঃ লাকচার এনেচ্-সেরেঞ আখড়ারে মিৎ সাঁওতে কো ক্যামেরা বুঁদিয়েনা।
মুচৗৎরে ক্লাব রেন সভাপতি মানতান বিদ্যাধর মুরমু আর সেক্রেটারী মানতান বুদ্ধেশ্বর বাস্কে সেটের লেন সানাম সহেদ্ কো আর ঞেঞেলিয়ৗ কো সানামগে সারহাও কিন চাল আৎ কোওয়া।
.webp)
.webp)
