অৗগিল অনড়হিঁয়ৗ পাউল জুঝার সরেন
মহাদেব হাঁসদা
সানতালি সাঁওহেৎ রেন পৗহিল উতৗর অনড়হিঁয়ৗ দ কানায় পাউল জুঝার সরেন। অনা লেকারে উনিদ অৗ গিল অনড়হিঁয়ৗ হঁ বোন মেন দাড়েয়ায়া।
১৮৯২ সাল রেয়াঃ ২৯ ডিসেম্বর দ কানা পাউল জুঝার সরেনাঃ সৗগুন জানাম মাহা। সাঁওতাল পরগনা জেলা রেয়াঃ থানারে মেনাঃ চুনপাড়া আতোরে উনিদ ধৗরতি রেয়াঃ পৗহিল মারশাল এ ঞেল লেদা। আচ্ বাবা আঃ ঞুতুম দ মুনসি পাগু সরেন আর আঃ ঞুতুম দ মাকু সরেন। আচ্ বাবা দ প্রাইমারি স্কুল রেন চেচেৎ ইচ্ এ তাঁহেকানা আর হাড়াম বা পেকো সরেন দ অঁডেনিচ্ পারগানায় তাঁহেকানা। আতো স্কুল খন এতহপ্ শিখনৗৎ হাতাও কাতে উনিদ দুমকা জেলা হাই স্কুল রেকো ভুরতি লেদেয়া। ১৯১১ সালরে অঁডে খন মেট্রিক পাশ কাতে উনিদ কোলকাতা রেয়াঃ সেন্ট পলস কলেজ রেয় ভুরতি লেনা অঁডে খনাঃ ১৯১৩ সালরে উনিদ আই.এ. বিডৗ ও এ পাশ লেদা। অনা তায়ম আরহঁ চেতান সেচ্ পাড়হাঃ রেয়াঃ মনসুবৗ দ তাঁহেকান তায়া। মেনখান ঘাঁরঞ্জ রেয়াঃ এটকে টড়ে হতেতে পাড়হাঃ দ বৗগি হোয়েন তায়া।
পাউল জুঝার দ বিহার সরকারাঃ সাব-ইন্সপেক্টর অফ সানতাল স্কুলস্ হুদৗরেয় বাহাল লেন তাঁহেনা আর তায়ম তেদ স্পেশাল ডেপুটি ইন্সপেক্টর লেকাতে প্রমোশন এ ঞাম লেদা। ১৯১৫ খন ১৯৪৫ সাল হৗবিচ্ অনা কৗ মিরে তাঁহে কাতে উনি দয় জিরৗও লেনা। অনা বিদৗল পাটনা বিশ্ববিদ্যালয় রেয়াঃ সাঁওতালি পাঠ্যসমিতি রেন রৗ সিয়ৗ আর সরকারি কৗমিয়ৗ কো রেন সানতালি পরীক্ষা লেকাতে হঁয় কৗমিলেৎ তাঁহেনা।
পাউল জুঝারাঃ জত খন মারাং এনেম দ কানা- সানতালি তে অনড়হেঁ অল। উনিয়াঃ অনড়হেঁ অল। উনিয়াঃ অনড়হেঁ ‘বাহা ডালওয়াঃ’ ১৯৩৬ সালরে উছৗন লেনা। নওয়াগে কানা সানতালি তেয়াঃ পৗহিল উতৗর অনড়হেঁ পুঁথি দ। তায়মতে ১৯৪৩ সালরে অনা পুঁথি রেয়াঃ দসার হৗটিঞ উছান লেন তাঁহেনা। বানার হৗটিঞরে জত তে পেগেল পোন গটেন অনড়হেঁ মেনাঃ আকাদা। সাঁওহেৎ রেয়াঃ বিচৗর তে নওয়া কো অনড়হেঁ দ সিরজন ভাবনা, ইসোর ভাবনা, সমাজ ভাবনা আর দুলৗড় ভাবনা মেনাঃ আকাদা।
সমাজভাবনা রেদ হড়াঃ জিয়ন দরশন,- সমাজ লাহায় লৗগিৎ দিস-হুদিস আর এভেন আড়াং কো মেনাঃ আকাদা। অনা বেগর, উনি দ আয়মা গায়ান এ অল লেৎ তাঁহেনা। জেলেকা- হালা বাদলা, যোসেফ, মাধো সিঞ,জদুডি আতো, মারে তল, আতো পুনসি, তেহেঞাঃ সানতাল পরগনা এমান। অনকাগে অনল হঁ তাঁহেকান তায়া আয়মা। জেলেকা – সানাম জায়গারে তাঁহেনিচ্, কৗপি কারান, দেস মাঝি সীতাগেমাঃ- বক্তান,দিসম দুলৗ ড়, হমন্ত রান এমান। পাউল জুঝার সরেন দ আয়াঃ জিয়ন চৗরিত হঁয় অল লেদা মেনতে বাডায়ঃ আ। মেনখান নওয়াকো পুঁথি দ নিত হৗবিচ্ বাং ছাপা সদর আকানা।
দিসম ফুরগৗল তায়ম পাউল জুঝার দ রাজনীতি রেয় সেলেৎ লেন তাঁহেনা। ১৯৫২ সাল রেয়াঃ লোক সভা ভোট রেয় দাড়ে লেনতে এম.পি. হোয় লেনা। মেনখান আচ্কাগে ১৯৫৪ সাল রেয়াঃ ১৯ ফেব্রুয়ারী দিল্লী রে উনিয়াঃ জিউয়ি বৗতি দ ইঁড়িচ্ এনা।
অনাকাতে তেহেঞ আয়মা দিন পারম আকানা। মেনখান উনিয়াঃ এভেন আড়াং দ নিৎ হঁ সমাজরে গুরলৗও বাডায় কানা-
চেঁড়ে মা চিপরুৎ, কৗহু মা হো কুড়িৎ,
পাসনাওয়েন চৗরিয়ো কঁড, দেসে বেরেৎ পে!
কুকড়ু চুৎ! দেসে বেরেৎ পে!
সিরজন মা চেঠায়েন, দানধারে ধুরৗওয়েন,
কুড়িয়ৗ মন চেদাঃ হো! দেসে বেরেৎ পে!!
.webp)
.webp)
