১০ ডিসেম্বর, ‘জেগেৎ মানওয়ৗরি আইদৗর মাহা’ দিসৗকাতে
 |
-মৗই বুরুলুকুই মান্ডি |
দিসম দিসম রে দিসম চাঃলাও কো তেহেঞা মাহা দ জাঁক জমক আতে কো মানাও-গুনৗও এদা। জেগেৎ জাকাৎ রে আবো ভারত দিসম রেহঁ তেহেঞা মাহারে আর মিৎধৗও ‘মানওয়ৗরি আইদৗর’ কাথা দ উচ্রানঃ আ। মেনখান গুনিগুরিব হড়ঠেন দ ! ওনকো ঠেন দ আইদৗর, গণতন্ত্র,ধর্মনিরপেক্ষতা এমান এমান কাথা কদ মিমিৎ সাবাদ্ বেগর আর চেৎ হঁ বাং কানা।
১৯৪৮ সাল রেনাঃ ১০ ডিসেম্বর হিলোঃ জাতিপুঞ্জ গাঁওতা দ মৗনমি কোওয়াঃ মৗনমি-জপড়াও মেনমা সাঁওতৗরি, রাজৗরি, কাঁওডিঅৗরি লেগচারঅৗরি এমান এমান আইদৗর রেনাঃ স্বীকৃতি-য় এমাৎ তাঁহেনা। উইহৗর দহ লৗগতিয়ানা মৗনমি কোওয়াঃ ধরম গে কানা লৗড়হৗই। জুগ জুগ খন মৗনমি কোওয়াঃ লৗড়হৗই, আঁদোড় খৗতির ঞামাঃ আইদৗর গে এনহিলোঃ ‘হেঁসৗরি’-রেয় রেবেন লেনা জাতিপুঞ্জ।
তেহেঞ ১৩০ কোটি মৗনমি কোওয়াঃ ভারত দিসম কোভিড আজারতে রবজলওয়াকানা। হাজার হাজার মৗনমি কোভিড তেকো তাঁড়গম অচঃ কানা দিনৗম হিলোঃ/ গচ্ হঁ আয়মা গেকো গুজুঃ কানা। নিন উডিচ্ তিকিছা ঞাম রেনাঃ আইদৗর খন হঁ কো ছুডৗর অচঃ কানা নৗহি-নিধান মৗনমি কো। নংকা হাহপাপ’ রেনাঃ দাঁও হাতাও কাতে বেসরকারি হাসপাতাল কদ কোটি কোটি কৗউডি কো আমরৗও জং কানা।
করোনা অতিমৗরি অক্তে কৗমি জং হড়াঃ আবস্থা দ আডিগে বৗড়িচ্। লাখ লাখ নামালিয়ৗ-কৗমিজং হড় নিন উডিচ্ দিসম পুরিসেবা খন কো ছুডৗর অচয়েনা, নিন উডিচ্ মানওয়ৗরি আইদৗর বাংকো ভুঁজৗও দাড়েয়াদা। কৗমি জং পোওয়ৗতি আয়োতেকো গিদ্রৗ জানাম কো এমাকাৎ কোওয়া হর-ডাহার রে, জমাঃ ঞুওয়াঃ বাং ঞাম তে জিউয়ি চালাও আকান তাকোওয়া, তিনাঃ মৗনমি কোওয়াঃ হড়ম-জিউয়ি জে মটরগৗডি, ট্রেন গৗডি লাতাররে দায়নাস আকানা, অনা রেনাঃ লেখাজখা দ বৗনুঃ আনাং। সাঁও সাঁওতে আয়মা হড় চৗকরি খন কো ছুডৗর অচওয়াকানা।
আবো দিসম রে ৭০ কোটি খন হঁ বৗড়তি মৗনমি কোওয়াঃ কৗমি বৗনুঃ আনাং। কৗমি বাং ঞাম খৗতির তিনৗঃ জুওয়ৗন জে জিউয়ি কো নাসাও আকাৎ তাকোওয়া, শিখনৗৎ ঞাম রেনাঃ আইদৗর খন কো ছুডৗরঃ কানা আয়মা আয়মা পৗঠুওয়াকো। আয়ো হড় কোওয়া সনমান মৗর্জাদ ধুড়িরে লোসোপোঁডোঃ কানা।
আবো দিসমরে এন.এস.এ, ইউ.এ.পি.এ সাঁওতে আয়মা অগন্তান্ত্রিক মানওয়ৗরি আইদৗর বিরুদ্ আইন লৗগু হোয়োঃ কানা। মৗনমি কো তালারে ভেপেগেৎ সিরজৗওয়ঃ এন আর সি, সিএএ, এন পি আর চৗলুঃ কানা। অনাতে লৗগতিঃ কানা তেহেঞ আইদৗর বাঞ্চাও দহয় লৗগিৎ লাড়াওনা হোয় অচয়।
.webp)
