অনলিয়ৗ কালিরাম সরেন
মহাদেব হাঁসদা
তেহেঞদ ঞুতুমান অনলিয়ৗ কালিরাম সরেনাঃ সৗগুন জানাম মাহা। ১৯৩৯ সাল রেয়াঃ ১৬ ডিসেম্বর, পছিম বাংলা রেয়াঃ পুরুলিয়া জেলারে মেনাঃ চিরুডি আতোরে উনিয়াঃ জানাম দ হোয় লেনা। আপাত ঞুতুম দ ধনঞ্জয় সরেন আর এঁগাত ঞুতুম শম্বরী সরেন। আতো স্কুল খন এতহপ্ শিখনৗত্ আমেট কাতে উনি দ সিংভূম জেলা রেয়াঃ বাঁগুড়দাঃ সিনিয়ার বেসিক স্কুল রেয় ভুরতি লেনা। অনা তায়ম বরাবাজার হাই স্কুল খন মেট্রিক দয় পাশ লেদা ১৯৫৬ সালরে। অনা বিদৗল অনাকো স্কুল দ মানভূম জেলারে লেখাঃ কান তাঁহেনা।
পৗঠুওয়ৗ লেকাতে কালিরাম সরেন দ আডি লাসের হাতাং আনিচ্ এ তাঁহেকানা। ১৯৬০ সালরে উনিদ বি.এ. বিডৗও এ পাশ লেদা। অনাতায়ম হাঁডে নাঁডে চেচেৎ ইচ্ লেকাতে কৗমিরে বাহাল লেনা। তাকদ উসৗরাগে কোলকাতা রেয়াঃ অ্যাকাউন্টস জেনারেল অফিস রে কৗমি ঞাম কেদা। আয়াঃ পাড়হা রেয়াঃ তেতাং তাঁহে কানতে চৗকরি তুলুচ্ গে উনিদ বঙ্গবাসী কলেজ খন ফিলোজফি অনার্স আতে পাশ কেদা।
অনা তায়ম W.B.C.S. পাশ কাতে বি.ডি.ও. লেকাতে বাহাল এনা বালুর ঘাটরে। নংকা কাতে স্পেশাল অফিসার, ট্রাইবেল ওয়েল ফেয়ার ডিপার্টমেন্ট আর ডেপুটি ম্যাজিস্ট্রেট হঁয় হোয় লেন তাঁহেনা। মুচৗৎ দ অ্যাডিশনাল ডাইরেক্টর অব্ এগ্রিকালচার হুদৗ খন ১৯৯৬ সালরে কৗমি খনে জিরৗও লেনা।
পাড়হা বিদৗল খন গে কালিরাম সরেন দ সাঁওহেৎ চারচা রে ফেড লেন তাঁহেনা। উনিয়াঃ উছৗন আকান গায়ান পুঁথি কদ হোয়োঃ কানা ‘কাজল সনাতন’ (১৯৬৬), ‘সিধু-কানহু’ (১৯৬৮) আর ‘সমাজ দ অকা (১৯৭৩)। উনিয়াঃ সেরেঞ আর অনড়হেঁ পুথি কদ হোয়োঃ কানা ‘সোহাগ মালা (১৯৭৭), আতাং দারাম (১৯৯৫) আর আঁজলে (১৯৯৮)। অনল পুঁথি দ মিৎটাং সুমুং গে উছৗন আকানা। ঞুতুম দ সিধু-কানহু লৗইতে (১৯৯৯)। নোওয়াদ সানতাল হুল চেতানরে খঁদ রঁদ আনা পুঁথি কানা।
নোওয়াকো বেগর হঁ লুসি শিমল, ফুরগৗল, জিতু সানতাড় এমান গায়ান পুঁথি আর অনল কো উনিদয় অল লেদা মেনতে বাডায়ঃআ। মেনখান পুঁথি লেকাতে বাং উছৗন আকানা।
নুয় মারাং অনলিয়ৗ কালিরাম সরেন দ ২০০৫ সাল রেয়াঃ ২৪ এপ্রিল আচকা গেয় দাঃ দড়ম এনা। সানতালি সাঁওহেৎ জায়জুগ লৗগিৎ আৎ কেদেয়া মিৎ ডিগডিগাঃ জোলোঃ ইপিল।
উনিয়াঃ জানাম মাহারে উনি ঞুতুম তাঁহেয়েনা গুণমানাও সারহাও আর জোহার।
.webp)
