সিঁঙ্গিমাহা সাকাম 'চেরেচ আড়াং'- লেখা-১৭,
২০ডিসেম্বর,২০২০
তুলৗজখা- শ্রী কা ন্ত স রে ন
ইপিল এঁগেল সাও ধৗরতীপুরীরে যাঁহা তিনাঃ রৗস্কৗ তাঁহেন রেহঁ, গিদরৗ কওয়াঃ রৗস্কৗদ তওয়া দাকারে ; নং কান মিৎ ভাবনা সুবুদিয়া মূর্মূ আয়াঃ' গিদরৗ বৗউলী ' রেয় আড়তি আকাৎবনা।
গিদরৗ আঃ জানাম আয়ো চেতান যে লেকা ভরসা তাঁহেনা অনকাগে আয়ো কওয়াঃ হঁ ভরসা তাঁহেনা বাবাহড় চেতান। নং কান ভাবনা আতে গোপেশ্বর মান্ডি ' হাঁড়ু ' য় বেনাও আকাদেয়া। মেনখান ছন্দ দ থড়া ঢিলৗগে আইকৗ উ এনা।
সারি ধরম হাঁসদা গিদরৗ কওয়াঃ মনে রেনাঃ কুকলী,দারে মচাতে আডি নাপায়ে তেলা আকাদা। মানতান অনলিয়ৗ গমকে, ছন্দ হঁ আডি নাপায়ে জতন আকাদা।
গিদরৗ কওয়াঃ মনে যাঁহাতিনাঃ উডৗউ বাড়ায় রেহ, রুওয়ৗড় হিজুঃ গেয়া জানাম আয়ো আঃ হবররে। নং কান কাথাগে সত্যেশ্বর মুরমুয় বাড়ায় হচ আকাৎবনা ' গিদরৗ বৗউলী ' রে। আর অনড়হেঁ রে, ছন্দতে অলরেনাঃ নাপায় কুরুমুটু ঞেল আকানা।
গিদরৗ ক আঁজম- আঁজম তে বৗই- বৗইতে চেৎ লেকা কাতে রড় ক সেড়ায়া, অনারেনাঃ মিৎ নাপায় অনড়হেঁ সুচাঁদ হাঁসদা আঃ ' হপন বিটি '।
বাড়তাং সরেন পিপিড় পিয়ৗঃ আঃ জিয়ন চিতৗর, আডি কম কাথাতে আডি নাপায়ে বরনন আকাদা। অনলিয়ৗ আঃ মনে হ উনি সাঁও উডৗউ লৗগিৎ রৗস্কৗ আকানতায়া। অনড়হেঁ রে কেটেজ সাঁহিচ ছন্দ বেওহার আকানা।
বিভূতিভূষণ সরেন ইচ ' পান্ডু হাড়াম ' আডিয় নাপায়া। গড়ম কড়া-গড়ম কুড়ি তাক আডি নাপায় ডাহারতেয় ডাহরাও আকাৎ কওয়া।
দুগাই টুডু তোয়ো কওয়াঃ দুখ আইকৗউ কাতে, উনকুওয়াঃ কাথা আবো সামাংরে আয়াঃ ভাবনা তেয় সদর আকাদা। কুরুমুটু আকাদায় নাপায় ছন্দ বেওহার রেনাঃ।
সাকম সরেন হুডিঞ অনড়হেঁ তালাতে জানাম পৗরসী চেতান, আবোওয়াঃ দুলৗড় সিরজৗউ রেনাঃ এ কুরুমুটু আকাদা। নং কান ভাবনা খৗতির আয়মা সারহাও।
অনল বিঁদি আয়াঃ ' চিকিমালা ' মালা লেকায় গালাং ইদি আকাদা ' আ ' খন রেলা ফারকা অহৎ হৗবিজ। আশ তাঁহেয়েনা আয়াঃ চিকিমালা মালালেকা মৗনে হামেটা।
দুলৗড় বিটি নেঁহর তালাতে সানাম কঠেন আডি নাপায় দুলৗড়ে খজ আকানা। নাপায় উইহৗর-ভাবনা।
মিৎটাং শুধ্রৗউঃ- সিঁঙ্গিমাহা রেনাঃ সাকাম ' চেরেচ আড়াং ' লেখা-১৬ রে অনলিয়ৗ সারি ধরম হাঁসদা আঃ ' হপন মৗই - দৗরি দৗই ' চেতান জাহা তুলৗজখা হোয় আকানা; মানতান শ্রী কা ন্ত স রে ন গমকে দ ' দৗরি ' রেনাঃ মানে দ দারে (Tree) পাড়হাও লৗগিৎ এ তুলৗজখা লেদা। মেনখান অনলিয়ৗ সারি ধরম হাঁসদা গমকে দ ' দৗরি ' রেনাঃ মানে দ সিঁয়ৗজৗরি মেনেৎ আপনার জেদ্ তে যাঁহায় যাঁহানা এ কৗমিয়ৗ অনা বুঝৗউ লৗগিৎ গে ‘দৗরি’ শাবাদ্ এ অল আকাদা। পৗঠুওয়ৗ ক জথাত সাঁহিচ মানে বুঝৗউ লৗগিৎ, নওয়া শুধরৗউ এনা। - সাসাপড়াওইচ্ ' আবোওয়াঃ কাথা '।
.webp)
.webp)
