পৗরসি পিয়ো রেভাঃ পি.ও. বোডিং (দসার হৗটিঞ)
মহাদেব হাঁসদা
সোরদিন অনলিয়ৗ কৃষ্ণ হেম্ব্রম আর সুমি হেম্ব্রম দ বোডিং সাহেবাঃ অনা কো খনা ৯৩ গটেন কৗহ্নি বাছাও কাতে কিন ছাপা সদর আকাদা। চৗরিৎ লেকাতে অনাকো হড় কৗহ্নি দ ৬৪ গটেন থক্রে হৗটিঞ আকানা। জেলেকা- ১) তোয়ো আর তৗরুপ্ কোওয়াঃ চৗরিত ২) গগ হড় কোওয়াঃ চৗরিত, ৩) ফুলৗ কৗসিয়ৗ আর ডৗহুর বুলাং (ডিংরৗ) কোওয়াঃ চৗরিত, ৪) ভূত বঁগা আর রাকৗস কোওয়াঃ চৗরিত, ৫) জুগি চৗরিত, ৬) রাজ-রাপাজ কোওয়াঃ চৗরিত, ৭) কুড়হিয়ৗ আর লেলহা কোওয়াঃ চৗরিত, ৮) গুতি-কৗড়মি কোওয়াঃ চৗরিত, ৯) দুঁধি কুড়িয়াঃ চৗরিত, ১০) রায়বার কোওয়াঃ চৗরিত, ১১) মহাজন আর খাতরা কোওয়াঃ চৗরিত এমান মেনাঃ আকাদা।
অনাবেগর, সাকরাত রে চেদাঃ বেঝা কো তুঞা, বাপলা রে খাঁডা দাঃ দ চেদাঃ, বারে ইতৗত গেবাং চেদাঃ- অনাকো বাখরা হঁ কৗহ্নি তুমৗল দাড়ে আকাদা। নোওয়াকো কৗহ্নি তালাতে হড় হপনাঃ সমাজ, ধরম, জিয়ন-দর্শন, আরিচৗলি, লেগ্চার, নেমাচার এমান রেয়াঃ কাথা গে আডি মঁজতে সার সাদলে আকানা। নোওয়াকো কৗহ্নি তালাতে হড়-হপনাঃ বুগি বৗড়িচ্, দিশ-হুদিশ, পৗতিয়ৗও আর জিয়ন খাঁডাও রেয়াঃ কাথা সদর আকানা। আদম আদম কৗহ্নি রেদ বেবাক্ লাঁদা রাসা গে সারসাও আকানা। মিৎ কাথাতে নোওয়া কদ সানতালি সাঁওহেদ্ রেয়াঃ আডি দামান ধন গে কানা।
অনকাগে পি.ও. বোডিং আঃ আর মিৎ ঞুমানাঃ কৗমি দ কানা- Studies in Santali medicine and conneted folk lore পুঁথি অল সদর। নোওয়া পুঁথি রেয়াঃ দ পেয়া হৗটিঞ মেনাঃ আকাদা। পোয়লো হৗটিঞ রেদ সানতাল আর রোগ-আজার রেয়াঃ কাথা, দসার হৗটিঞ রেদ রান-মুরগৗন রেয়াঃ কাথা মেনাঃ আকাদা। হড়াঃ নানাহুনৗর রোগ রেয়াঃ ৩০৫ গটেন রান রেয়াঃ ঞুতুম আর অনা সাঁওতে গৗই কাডা কোওয়াঃ রান সে Veterinary medicine হঁ সেলেদ্ মেনাঃ আ। পুঁথি রেয়াঃ তেসার রেদ সানতাল কোওয়াঃ জিয়ন হরা, মেতাঃমে আতো-অড়াঃ, জম-ঞু, হরঃ-বাঁদে, চেঁড়ে-চিপ্রুৎ, উৎ-পুটকৗ এমান রেয়াঃ কাথা মেনাঃআ। সাঁওতে কৗরমু গুরু, মানতার,ঝাড়নি আর রান মুরগৗন রেয়াঃ কাথাহঁ মেনাঃ আকাদা। অনকাগে কিঁষৗড় বঁগা, নৗইহৗর বঁগা আর ডৗন ওঝা কোওয়াঃ কৗমি কৗস্নি কো লৗই আকানা। পুঁথি রেয়াঃ মুচৗৎ রেদ সানতালি সেরেঞ রাহা হঁ আডি মঁজ তে সদর আকানা। বোডিং সাহেবাঃ নওয়া হঁ মিৎ হেড়ান হাহাড়াঃ সাওকৗরি গে কানা।
নোওয়া কৗমিরে পি.ও. বোডিং দ আয়মা হড় হপনাঃ গড়য় হাতাও লেদা। ওনকো দকো হোয়ো কানা- মহুল পাহাড়ি রেন সাগরাম মুরমু আর লোথরু মুরমু,ধ পাহাড় রেন ভজু মুরমু, চন্দ্র পুরা রেন কানহু মান্ডি এমান। অনকাগে অনা বিদৗল রেন অনলিয়ৗ বিরাম হাঁসদা, সিদো মুরমু, শিবু সরেন খুদিয়া মারান্ডি, কালু কিস্কু, গোপীনাথ কিস্কু, চুনু হাঁসদা, বৗরিয়ৗড় কিস্কু তেকো সাঁও হঁ বোডিং সাহেবাঃ গৗহির সৗগৗই তাঁহে কানা।
মেনখান নুনৗ কাতেহঁ বোডিং সাহেবাঃ দ জাঁহান গরব বাং তাঁহেকানা। সানতাল মেডিসিন পুঁথি রেয়াঃ এতহব রে উনি দয় অল আকাদা-“ যাঁহায় মিৎ হড়-হপন নোওয়া পুঁথিয়েম পাড়হাও আরেম তলাস লেখান আর যাঁহানাঃ রে আঁধা সে ভুল এম তিয়ঃ লেখান- দায়া কাতে ইকৗ কাঞমে বাড়ে”। তিন মারাং কাথা!
সানতালি পৗরসি পিয়ো, অনলিয়ৗ আর খঁদরঁদ ইয়ৗ– মানতান পি.ও. বোডিং দ চুয়াল্লিশ সেরমা ভারত রে তাঁহে কাতে ১৯৩৪ সালরে আয়াঃ দিশম তে রুওয়ৗড় লেন তাঁহেনা। অনা কাতে ১৯৩৮ সাল রেয়াঃ ২৫ সেপ্টেম্বর, ডেন মার্করেয়াঃ ওডেনস্ বাজাররে উনিদয় দাঃ দড়ম এনা।
সানতালি সাঁওহেদ্ রেয়াঃ নাগাম রে বোডিং আঃ এনেম দ যায়যুগ সোনা আখরতে অল তাঁহেনা।
.webp)
