সৗরি গাতে

 (হুডিঞ মাছা কৗহ্‌নি)

সৗরি গাতে

-বাড়তাঙ সরেন

ঝঁড়ে দ ইস্কুল খন রুয়ৗড় কাতেঃ বাখোল রাচারে বেল মেনাঃ পারকম রেয় দুড়ুপ এনা আডি মিরলুং আতে। অকয় সাঁওতে হঁ বায় রড় এদা। এটাঃ হিলঃ খান দ মেরম হপন লেকা  রৗস্কৗতে দন দন আতেয় বলঃ আ রাচাতে। মেনখান তিহিঞ দ আডি উসুঃগে চাগাম চুগুম রাচাতেয় বলয়েনা। পুঁথি থুলিয়াঃ হঁ আওড়িগেয় তাসড়াও গিডি কাদা। আচ আয়ো পিন্ডৗয় জজঃকান তাঁহেনা।  পারকমরে  অনকা ঝঁড়ে ঞেলতে জনঃ গিডিকাতেঃ উনি ঠেনে ঞির সেন এনা। কুলি কিদিয়ায়, “চে চেকাও আকানা ঝঁড়ে বাবু ? হড়মো জুত বাম বুজ এদা ? আডি উসুঃ এম ঞেলঃ কান দ ? চেৎ চেকাওয়াকানা” ?  ঝঁড়ে দ আচ আয়োওয়াঃ কাথারে চেৎহঁ বায় রড় রুয়ৗড় দাড়েয়াদা। খৗলি আচ আয়ো সেচ কয়ঃ কাতে কুসুৎ কুসুৎ রাঃ রাঃ এ ধুরৗও এনা।    

মিৎ ঘৗড়ি তায়ম বাডায়েনা বাংমা, ঝঁড়েরেন গাতে জাটু দ রুওয়ৗ তেয় লাঁগা আকানা। বোলপুর হাসপাতাল খন বর্ধমান তেকো ইদি আকাদেয়া। রড় হঁ আৎ আকান তায়া। ম্যালেরিয়ৗ চং চেৎ চং হুয় আকান তায়া। ইস্কুলরে মাহাশয়কো মেনেৎ তাঁহেনা, সিঁকড়িঁচ গেরতে হুয় আকানা।  হড়মো দ আডি বৗড়িচ আকান তায়া। হটঃ হঁ বায় আচুর দাড়েয়াঃকানা। ইস্কুলরে অনা কাথা আঁজম কাতেঃ ঝঁড়ে দ মনেরে আডি দুক এ আটকার আকাদা। টিফিন অক্তেরে অড়াঃখন ইদিলেৎ টিফিন হঁ বায় জম দাড়েয়াকাদা; সানামে রুওয়ৗড় আগু আকাদা।     

 জাটু দ আডি রেঙ্গেচ অড়াঃরেন কড়া। জাটু এগাঁত- আপাত দ বৗইদ-বৗইহৗড় রেকিন কৗমিয়ৗ।  তবে জাটু দ অলঃ পাড়হাওরে  আডিগেয় সরেশা। অনাতে  সানাম মাহাশয়কো হঁ আডিকো দুলৗড়িয়ৗ জাটু। ঝঁড়েয়াঃ অন্তর রেহঁ জাটু ইদি কাতেঃ আডি গরব হেনাঃ আ , চেদাঃসে জাটু দ ঝঁড়েরেন সানাম খন সরেশ গাতে কানায়। ঝঁড়ে দ আয়াঃ ইদি টিফিন তিস হঁ জাটু বেগর বায় জম দাড়েয়াঃআ। টিফিন অক্তে কাদাম বুটৗরে পান্তে কাতেঃ দুড়ুপ কাতে, সমান সমান হৗটিঞ কাতেঃ টিফিন কিন জমা আডি রৗস্কৗ আতে। এয়ায় কিলাসরেন  সানাম পৗঠুওয়ৗ গিদরৗ জাটুঠেন অঙ্ক কো বুঝহৗও জংআ। ঝঁড়েহঁ অকা অকা হিলঃ উনি ঠেন ইংরাজি সাতামে বুজৗ। ঝঁড়ে দ মিৎদিন জাটু বায় ঞেল ঞাম লেখান আডিয় আকবাক গদঃআ। আর তেহেঞ সৗরিগে উনিয়াঃ নংকান হালত আঁজম কাতেঃ ঝঁড়েদ অন্তররে  আডি গৗহির দুক বল আকাদেয়া।    

দশার হিলঃগে ঝঁড়ে আপাত, রৗস্কৗ দ ইস্কুল খন ছুটিয় হাতাও কেদা। ঝঁড়ে দ আচ আয়ো বাবা সাঁওতে বর্ধমান মেডিক্যাল কলেজ হাসপাতালতেয় সেন এনা জাটূ ঞেঞেল। পে তলা চটরেকো ভর্তি আকাদেয়া জাটু। পে-পে মাহা জাটু বায় বেঁগেৎ আকাদা। আটেৎ রে গিতিচ আর গিতিচরেগে মেনায়া। জাটুওয়াঃ লেঁগা তিরে স্যালাইনকো লাগাও আকাদা।  জাটু এগাঁৎ আপাৎ  জাঁগাসেচ রেকিন দুড়ুপ আকানা জোহা চাপো কাতে। 

ঝঁড়ে দ বৗই বৗইতে চালাও কাতেঃ জাটুওয়াঃ আটেৎ  আড়েরেয় দুড়ুপ এনা। জজম তিতে জাটুওআঃ বহঃ এ চাপুকেদা ঝঁড়ে। বহঃ ইসকির ইসকিরতে ঝঁড়ে জাটুয় হহয়াদেয়া,  "জাটু, জাটু বেরেৎমে, জাটু, নয়য় ঞেলমে, ইঞ হেচ আকানা, বেঁগেৎ মে "!  ঝঁড়েওয়াঃ রেয়াড় জাঃ জটেৎ তে  মিৎ ঘৗড়ি তায়ম জাটু  দয় বেঁগেৎ কেদা; ঞেল কেদেয়ায় ঝঁড়ে আচ সুররে দুড়ুপ কাতে বহঃ এ চাপো আকাদেয়া। জাটু দ বৗই বৗইতে বেরেৎ কাতেয় দুড়প এনা;  দুড়ুপ কাতে ঝঁড়েয় হৗড়ুপ কেদেয়া মিৎ তিতে। ঝঁড়ে হঁ বার তিতে জাটুয় হৗড়ুপ  জালাৎ কেদেয়া আয়াঃ কোড়াম তালারে। হৗড়ুপ কাতে জাটু আর ঝঁড়ে দ রাঃ রাঃকিন ধুরৗও এনা। উনকিন ঞেলতে সুররে তিগুঁ আকান সানাম হড়াঃ মেৎ খন মেৎদাঃ চা্পে ওডোং এনা।