তেলা

(হুডিঞ মাছা কৗহ্‌নি)

তেলা

-বাড়তাঙ সরেন

ক্লাসরেনাঃ মুচৗৎ রে সাঙ্গিঞ উতৗররেনাঃ বেঞ্চি আড়িরেয় দুড়ুপ আকানা দুরবৗজ। ইস্কুলরে তিনৗ থিরথারে তাঁহেন,আতো অড়াঃরেদ উনাঃগে হালবালিয়ৗ, সারা ঘৗড়িচ হান্তে নাতেয় ঞির বাড়ায়া। ছুটি হিলোঃ গাতেকো সাঁওতে পুখরীরে উপৗল বাহা সিৎ,সে আতোরেনাঃ বাড়গেরে চুকু চুকুতে ঘাঁগ্‌রা গৎ কাতে বুলুঙ মৗরিচ সাঁওতে মাখাও কাতেঃ  জম দ  আডি রৗস্কৗয় বুজৗ দুরবৗজ। অড়াঃরেন গ বাবা সাঁওতে আতোরেন হড়কোহঁ আডি জ্বালারেকো পাড়াও আকানা। তবে ইস্কুলরেদ একাল আডি মিরলুঙ গেয় তাঁহেনা। বোলপুর হাই ইস্কুলরেন অকয় গিদরৗ হঁ বাংকো গাতেয়েয়া , চেদাঃসে উনি দ আতো অড়াঃরেন সান্তাড় গিদরৗ কানায়। অনাতে উনি দ আর হঁ থিরথারে তাঁহেনা। আগঁরপ পিল্টুন হঁ আডি নাচারগে। 

  

এনহিলোঃ এনেগে উদয় শঙ্কর মাচেৎ মাহাশয় দ ক্লাসতেয় বল আকানা। ক্লাস সেভেন ‘C’ সেকশন রেদ ইংরেজি সাতামে পাড়হাও কওয়া। পুঁথি টেবিল চেতানরে দহকাতেঃ মাচেৎ গমকে দ পান তগজ তগজতে সামাং বেঞ্চিরে দুড়ুপ আকান গোপাল ঞুতুমান মিৎ গিদরৗ ইংরেজী কৗহনী ‘Mowgli Among the Wolves’ পাড়হাও এ মেতাঃদেয়া। ঠাকেৎ ঠাকেৎ তে পাড়হাও মুচৗৎ তায়ম মাচেৎ গমকে দ মুচৗৎ সেনাঃ বেঞ্চিরে দুড়ুপ আকান দুরবৗজ সেচ এ কয়ঃকেদা লান্দা লান্দাতে। আডি সিড়ৗক আতে মাচেৎ দয় মেনকেদা, "ওই যে তোরা দেখেছিস, ওই কোণে একটা হুলো বিড়াল ঘাপটি মেরে বসে আছে, ইঁদুর ধরবে মনে হয় "। অনা কাথা আঁজম তরা সানাম গিদরৗ খাঃ খাঃকো লান্দাকেদা।

 দুরবৗজ দ মনেরে আডিয় লাজাওয়েনা আর মনেরে কষ্টয় আঁগচ্‌ আনা। মেৎদাঃ হঁ জরয়েন তায়া। মাচেৎ দ সিড়ৗক আতে দুরবৗজে মেতাঃদেয়া, "এই হুলো বিড়াল পড়, শুধু  ইঁদুর ধরলে হবে না" ! দুরবৗজ দ বৗই বৗইতেপুঁথি সাপকাতেৎ আডি মজ আর পুষ্টৗওতে ব্রিটিশ উচ্চারণ আতে ‘Mowgli Among the Wolves’ কৗহনী পাড়হাও এ এহপ কেদা। উনিয়াঃ পাড়হাও আঁজমতে সানাম গিদরৗ কো থির উতৗর এনা, আর আডি হাহাড়াতে দুরবৗজ সেচকো কয়ঃ হৗপিকেদা। আর মাচেৎ গমকেয়াঃ দ বারয়া মেৎদ লুঁডু লুঁডুয়েন তায়া !