(হুডিঞ মাছা কৗহ্নি)
হাসপাতালরে হপনবা
-বাড়তাঙ সরেন
হপনবা। সাধের হপনবা। আতোরেন লৗটু কৗটিচ সানাম হড়রেন হপনবা। আডে টলা হড়কোরেন হঁ হপনবা। তবে উনিয়াঃ দ মিৎটাংগে বৗড়িচ দোষ, উনি দ বায় দিশৗয়ৗ ।
তেহেঞ দ সিঙ্গিমাহা। তিকিন অক্তে জম বাড়া কাতেঃ হপন আয়ো দ কোঠা অড়াঃ পিন্ডৗরে হপনবা গিলৗস দাঃ আর রানে দহ ওটো আদেয়া। উন অক্তে হপনবা দ মিৎ মনেতে পেপারে পাড়হাঃ কান তাহেঁনা। যাতে আলোয় হিড়িঞমা, অনাতে হপনবা দ উশৗরাতে মিৎটাং রান গুলিয় জমকেদা। আর দাঃএ ঞুঁ আড়গো আদা। জমকাতেঃ উনি দ লাহা লেকা পেপার অটাঃ অটাঃতে পাড়হাও এ ধুরৗও এনা। সিড়ি লাতারখন ঘানে ঘানে হপন আয়ো দ হহকাতেয় মেন এদা, " হেঁদা গো বাবু আপাত, রানেম জম কেদা "? হপনবাওয়াঃ মন দ পেপাররেনাঃ শাবাদ গাজাড়রে আৎ আকানতায় তাঁহেনা। আচকাগে গে হপন আয়োওয়াঃ কিকির চেঁড়েঁলেকা হহ আঞ্জমতে হপনবা দয় এভেন উতৗর এনা। ঞেল কেদায় লেঙ্গা তিরে পেপার সাঁওতে রানে সাপ আকাদা। হপনবা দিশৗ রেনাঃ এ রিকৗ কেদা, রানে জম আকাদা সে, বাং। হাকোপাকো আর মিৎটাং রানে জম কেদা হপনবা
মিৎ ঘৗড়িচ্ তায়ম হপনবা দ কোঠা চটখন আগবাগ হপন আয়োয় হহয়ায় কানা। হপন আয়ো দ হাটাঃ তাসড়াও গিডিকাতেঃ কোঠা চটতেয় রাকাপ এনা। ঞেলে কানায় হপনবা দ , মৗচিরে দুড়ুপ কাতে বারতিতে কড়ামে ইসিকরঃ কানা। আর আডি জোর বডে দাঃরেন হাকো লেকা আঙপ আঙপ আতেয় সাঁহেৎ এদা। হপন আয়ো দ চেৎ চয় বুজকেৎ, অনাতে রুহেৎ এ ধুরৗও এনা। মেন গদ কেদায়, "নুয় হাড়াম, উন খনিঞ মেতায় কানা 'পেসার' রেনাঃ রান জমমে,কাথাগে বায় আঞ্জমা, দেন উশৗরাতে জম মে'। অনা মেন কাতেঃ ঊশৗরাতে মৗচি আড়িরে দহ আকাৎ রান রেনাঃ ফাইল খন আর মিৎটাং রান ওডোং কাতেঃ হপনবা মোচারেয় ঠেলাও আদের আদেয়া। হপনবা দ তি লাড়াও কাতেঃ চেৎ চ মেমেনে রিকৗ কেদা। মেনখান হপন আয়োদ উন অক্তেগে গিলৗস রেনাঃ দাঃ মোচারেয় দুল আদেয়া। রান গুলি দ হানে তরা মোচা খন লাঁন্ডরি সেচ গুরলৗও বলয়েনা। হপনবা দ আরহঁয় ছাটপাটাঃ কানা, কাথা হঁ আৎ এন তায়া। হপন আয়ো দ অণ্ডে খনগে আকিনরেন গড়ম কড়া ভটেয় হহ আদেয়া। ভটে উশৗরাতে ঞির হেচ কাতেঃ 'ওটো' গাডিতে হপনবা বোলপুর মহকুমা হাসপাতালতেয় ইদি কেদেয়া।
ইমার্জেন্সি রে ডাঃ হাঁসদা হপনবাওয়াঃ প্রেসারে ঞেল কেদা লুতুররেনাঃ মেশিন আতেন আতেন তে। জেলেঞ সাঁহিচ সাঁহেৎ কাতে ডাক্তারে লৗই কেদা , " আচকাগে প্রেসার আডি 'লো' আকান তায়া, বতর রেনাঃ দ চেৎ হঁ বৗনুঃ আ, প্রেসার 'নর্মাল' লৗগিৎ রান ইঞ এমায় কানা। মিৎ ঘন্টা ভিতরি রেয় বেশ উতৗরঃ আ"।
স্ট্রেচাররে গিতিচ কাতে হপনবায় দিশৗ রুয়ৗড় কেদা, হাই প্রেসার কম লৗগিৎ যাঁহা রান তিকিন অক্তে মিৎধাও জম হুয় কঃআ, উনি দ অন্ডে পে পে ধাও এ জম আকাদা। আর অনারে হপন আয়ো হঁ গড়য় এম আকাদেয়া। অনে কো মেন লেকা -- হাড়াম লৗগিৎ বুড়হি, আর বুড়হি লৗগিৎ হাড়াম !!
.webp)
.webp)
