চেৎ লেকা কাতেম অলা ( অনল )

 (পোয়লো হৗটিঞ তায়ম)

চেৎ লেকা কাতেম অলা ( অনল )

শ্রীকান্ত সরেন

নওয়া আয়াত হুডিঞহঁ হোয় দাড়েয়াঃ আ আর বাং খান জেলেঞহঁ হোয় দাড়েয়াঃ আ। মি- মিৎ হড় মি- মিৎ ধাচতেক অলরেহঁ, অলরেনাঃ মূল নিয়ৗম দ মিৎ গেয়া। যে লেকা- আয়াত ক বাং জেলেঞ কাতে হুডিঞ লেনখান পাড়হাও সুবিধা। সাঁওতে অৗড়ৗ কহ সজহে- সজহেয়াঃ বেওহার লেখান,পাড়হাও কাতে আডি লগনেম বুঝ দাড়েয়াঃ আ। আর আয়াত কহ চেৎ লেকা কাতেবন পাড়হাঃ আ, মিৎ সাঁহেৎতে তিনাঃ ঝৗলবন লৗই আ, অকারেবন তেঁগোনা (থিরঃ আ ),তিন ঘৗড়িকবন তেঙ্গোনা- নওয়া ক বুঝ লৗগিৎ মিৎ লেকান চিনহৗ মেনাঃ আ। অনা চিনহৗ ঞেল কাতে পাড়হাও লেখান, বুঝরে আনাট বাং হোয়োঃ আ। সাঁওহেৎ যথাৎ কায়তে পাড়হাও সে অল লৗগিৎ, যাহা চিনহৗ ক মেনাঃ আ; অনাকদ হোয়োঃ কানা; কমা (,) কোলন (:) সেমি কোলন(;) কুকলি চিনহা ( ?) ভাড়ুংভাঃ চিনহৗ (!)  এসকার  চেতান কমা ('  ') বারয়া চেতান কমা (" ‌ ") হাইফেন (- ) পে-বিন্দু চিনহৗ (... ) জিরৗউ( দাঁড়ি ) চিনহৗ ( ।  )  আর ড্যাস চিনহৗ ( _ ) । ( নডে মিৎটাং কাথা দিশৗ দহয় হোয়োঃ আ , হাইফেন দ হুডিঞ ঞঃ আর ড্যাস দ অনাখন জেলেঞ ঞঃ হোয়োঃ আ )। নিতোঃ দবন ঞেললেগে নওয়া ক চিনহৗ রেনাঃ বেওহার।   

   কমা  ( , )

কমা (, ) দ হোয়োঃ কানা, আডি কম অক্ত জিরৗউ রেনাঃ চিনহৗ।  লাতাররে অল আকান জায়গা করে নিয়ৗদ বেওহারঃ আ।

1.মিৎটাং আয়াত ভিতৗররে, আরহ  হুডিঞ- হুডিঞ আয়াত তাঁহে লেনখান , অনা ক জায়গারে একাল কম অক্ত  লৗগিৎ জিরৗউ যখজ নওয়া চিনহৗ বেওহারঃ আ।   যে লেকা:

(ক) মনে হোয়লেনা, সিমল আর বিমলাঃ বিবৗদ, মিৎ বার দিনরে বাং সলহেঃরেহঁ, মিৎবার চাঁন্দোরেদ জৗনিচ সলহেঃ গেয়া ।

(খ) কোমড়ো জাহাতিনাঃ বুঝৗউ এম,ধরম কাথা কদ লুতুররে, বলগে বাং বল আয়া।

2.আয়াতরে আডি লেকান আড়া বেওহার যখজ, আডি কম অক্ত লৗগিৎ জিরৗউ লেনখান নিয়ৗ চিনহৗ বেওহারঃ আ। যে লেকা:

( ক) সাগেন,সৗগুন,রঁড়ে আর ঝঁড়ে মুদরে অকয়যে নাপায় আর অকয় যে বৗড়িজ, বুঝ আডি কুঠিন।

( খ) জাঁওয়ায় কড়া মা ঞেলতেহঁ নাপায়,হড়মহঁ নাপায়, মনে কহঁ সরল, অলঃ হঁয় বাড়ায়া আর কিঁষাড় অড়াঃরেন মিৎটাংগে কড়া।

3.  মৗহিত, চাঁন্দো আর সেরমা ( বছর) বুঝৗউ লৗগিৎহঁ কমা বেওহারঃ আ। যে লেকা:

( ক) ৫, ৫, ১৯০৫(খ) ২৫ বৗইশৗক, ১২৬৮চেতানরে জাহা অলেনা,অনাকদ আরহঁ বিন্দু (. ) বাং খান হাইফেন (- ) এ‍ম কাতে হঁ ক অলা। যে লেকা:৫. ৫ . ১৯০৫ / ৫ -৫ - ১৯০৫ / ২৫-০১-১২৬৮

4.এ‍লখা রেনাঃ হিসৗব বুঝৗউ লৗগিৎহঁ কমা (, ) বেওহারঃ গেয়া। যে লেকা:১৫,৪৭৫/ ৩,৭৫,৫০৮

5. আয়াতরেনাঃ তালারে যখজ এটাঃ মিৎটাং আয়াত তুল আগু কাতে বেওহার লেখান, অনা এটাঃ আয়াত লাহারে কমা বেওহারঃ আ। যে লেকা:ডাক্তারে লৗইকেদা, " গায়ানরে যেঞ অভিনয় আ, অনা লৗগিৎ অক্ত উকুর ?"

(অনল তঁগে আ….)