ᱯᱷᱩᱞᱢᱩᱱᱤ

(ᱦᱩᱰᱤᱧ ᱢᱟᱪᱷᱟ ᱠᱟᱹᱦᱱᱤ)

ᱯᱷᱩᱞᱢᱩᱱᱤ

- ᱫᱤᱡᱚ ᱯᱚᱫᱚ ᱦᱟᱸᱥᱫᱟ

ᱱᱚᱣᱟ ᱢᱟᱪᱟᱱ ᱛᱚᱞᱟ ᱚᱠᱟ ᱦᱤᱞᱳᱜ ᱯᱷᱩᱞᱢᱩᱱᱤ ᱯᱳᱭᱞᱳᱭ ᱦᱮᱸᱢ ᱞᱮᱱᱟ ᱾ ᱚᱱᱟ ᱦᱤᱞᱳᱜ ᱟᱜ ᱠᱟᱛᱷᱟ ᱜᱮ ᱥᱟᱨᱟ ᱜᱷᱟᱹᱲᱤ ᱚᱱᱛᱚᱨ ᱢᱚᱱᱮ ᱨᱮᱭ ᱛᱟᱠᱟᱡ ᱛᱩᱠᱩᱡᱮ ᱠᱟᱱᱟ ᱾ ᱩᱱ ᱚᱠᱛᱚ ᱨᱮᱭᱟᱜ ᱪᱤᱛᱟᱹᱨ ᱛᱮᱦᱮᱧ ᱦᱚᱸ ᱡᱷᱟᱞᱠᱟᱣ ᱟᱭ ᱠᱟᱱᱟ ᱾ ᱱᱚᱣᱟ ᱢᱟᱪᱟᱱ ᱛᱚᱞᱟ ᱨᱮ ᱛᱤᱱᱟᱹᱜ ᱠᱤᱸᱥᱟᱹᱬ, ᱴᱷᱤᱠᱟᱹᱫᱟᱨ, ᱤᱧᱡᱤᱱᱤᱭᱟᱨ ᱵᱟᱨ ᱪᱟᱠᱟ, ᱯᱮ ᱪᱟᱠᱟ, ᱞᱳᱱ ᱪᱟᱠᱟ ᱟᱛᱮ ᱠᱚ ᱛᱟᱸᱜᱤ ᱠᱟᱭ ᱛᱟᱦᱮᱸ ᱠᱟᱱᱟ ᱯᱷᱩᱞᱢᱩᱱᱤ ᱾ ᱩᱱᱤᱭ ᱥᱮᱴᱮᱨ ᱞᱮᱱᱠᱷᱟᱱ ᱜᱮ ᱠᱟᱹᱦᱩ ᱠᱩᱸᱲᱤᱫ ᱞᱮᱠᱟᱠᱚ ᱦᱟᱞᱳ ᱤᱫᱤᱭᱮ ᱠᱟᱱ ᱛᱟᱦᱮᱸ ᱾ ᱩᱱᱠᱩ ᱵᱷᱟᱨᱛᱤ ᱛᱟᱭᱚᱢ ᱢᱤᱥᱛᱨᱤ ᱠᱚ ᱛᱟᱞᱟᱨᱮ ᱛᱟᱯᱟᱢ ᱠᱟᱹᱯᱷᱟᱹᱨᱤ ᱚᱨ ᱚᱯᱚᱨ ᱧᱟᱢᱟᱜ᱾ 

ᱩᱱ ᱫᱚ ᱯᱷᱩᱞᱢᱩᱱᱤ ᱞᱮᱜᱮᱡ ᱞᱚᱦᱟ ᱫᱟᱞᱠᱟᱣ ᱥᱟᱹᱨᱩ ᱾ ᱫᱟᱲᱢᱟᱠᱟᱲ ᱡᱩᱣᱟᱹᱱ ᱡᱷᱟᱨᱢᱟᱴ ᱪᱮᱲᱮᱢ ᱪᱮᱲᱮᱢ ᱠᱩᱲᱤ ᱾ ᱵᱤᱡᱽᱞᱤ ᱞᱮᱠᱟ ᱴᱷᱤᱨᱠᱟᱹᱣ ᱚᱰᱚᱠᱚᱜ ᱠᱟᱱ ᱛᱟᱦᱮᱸᱠᱟᱱ ᱫᱟᱲᱮᱛᱮ ᱵᱟᱭ ᱠᱷᱟᱹᱴᱣᱟᱹ ᱟᱠᱟᱫᱟ ᱾ ᱡᱚᱜ ᱜᱤᱰᱤ, ᱴᱩᱠᱩᱡ - ᱴᱚᱠᱟᱜ ᱛᱷᱟᱹᱨᱤ - ᱵᱟᱹᱴᱤ ᱜᱷᱟᱥᱟᱣ, ᱚᱲᱟᱜ ᱟᱹᱨᱩᱵ ᱠᱟᱛᱮᱜᱮ ᱟᱡ ᱥᱟᱶᱛᱮ ᱠᱟᱹᱢᱤ ᱠᱚ ᱦᱮᱸᱡ ᱟᱠᱟᱱ ᱜᱟᱛᱮ ᱠᱩᱲᱤ ᱫᱚ ᱛᱟᱭ ᱠᱷᱚᱱ ᱯᱮ ᱫᱚᱵᱚᱲ ᱮ ᱠᱟᱹᱣᱰᱤ ᱟᱠᱟᱫᱟ ᱾ ᱡᱤᱣᱤ ᱡᱟᱞᱟ ᱢᱟᱨᱟᱝ ᱡᱟᱞᱟ ᱾ ᱞᱟᱹᱭ ᱞᱮ ᱨᱮᱦᱚᱸ ᱡᱤᱣᱤ ᱪᱟᱞᱟᱜ, ᱵᱟᱝ ᱞᱟᱹᱭ ᱞᱮ ᱨᱮᱦᱚᱸ ᱵᱷᱚᱨᱚᱢ ᱱᱟᱥᱟᱜ ! ᱥᱟᱹᱨᱤᱜᱮ ᱠᱟᱹᱣᱰᱤ ᱜᱮ ᱦᱚᱲ ᱮ ᱱᱟᱯᱟᱭ ᱠᱚᱣᱟ, ᱟᱨ ᱠᱟᱹᱣᱰᱤ ᱜᱮ ᱦᱚᱲ ᱮ ᱵᱟᱹᱲᱤᱡ ᱠᱚᱣᱟ ᱾ ᱵᱟᱝ ᱵᱟᱝ ᱠᱟᱛᱮ, ᱵᱩᱡ ᱵᱩᱡ ᱛᱮᱜᱮ ᱯᱷᱩᱞᱢᱩᱱᱤ ᱠᱟᱹᱢᱤᱛᱮ ᱵᱚᱲᱦᱮᱜ ᱦᱩᱭ ᱟᱫᱮᱭᱟ ᱾ ᱦᱟᱫ - ᱦᱟᱫ ᱠᱷᱟᱫ - ᱠᱷᱟᱫ ᱨᱟᱹᱥᱠᱟᱹ ᱛᱟᱞᱟᱛᱮ ᱛᱤᱨᱮᱪᱚ ᱱᱤ-ᱡᱩᱣᱟᱹᱱ ᱠᱷᱚᱱ ᱡᱩᱣᱟᱹᱱ ᱩᱢᱮᱨ ᱮ ᱴᱟᱸᱰᱟ ᱯᱟᱨᱚᱢ ᱠᱮᱫᱟ ᱵᱟᱭ ᱦᱩᱫᱤᱥ ᱫᱟᱲᱮᱠᱟᱣᱫᱟ ᱾

ᱱᱮᱛᱟᱨ ᱫᱚ ᱜᱚᱥᱚ ᱛᱚᱞᱢᱚᱪ ᱩᱞ ᱟᱢᱥᱤ ᱯᱟᱞᱳ ᱦᱚᱲᱢᱚ ᱾ ᱚᱱᱟ ᱦᱚᱲᱢᱚ ᱟᱛᱮ ᱜᱮ ᱢᱤᱫ ᱵᱚᱥᱛᱟ ᱥᱤᱨᱢᱤᱴ ᱫᱤᱯᱤᱞ ᱠᱟᱛᱮ ᱵᱟᱨ ᱯᱮ ᱛᱟᱞᱟ ᱫᱟᱞᱟᱱ ᱚᱲᱟᱜ ᱥᱤᱲᱤᱛᱮᱭ ᱨᱟᱠᱟᱵ ᱫᱟᱲᱮᱭᱟᱜ ᱟ ᱾ ᱮᱱᱨᱮᱦᱚᱸ ᱠᱚ ᱠᱚᱴᱟᱵᱽ ᱵᱟᱪᱷᱟᱣ ᱠᱮᱫᱮᱭᱟ ᱾ ᱵᱟᱞᱮ ᱵᱟᱹᱥᱭᱟᱹᱢ ᱠᱷᱚᱱ ᱥᱟᱹᱨᱫᱤ ᱛᱤᱠᱤᱱ ᱮᱱᱟ ᱾ ᱟᱡ ᱨᱮᱱ ᱜᱟᱛᱮ ᱠᱩᱲᱤ ᱠᱚ ᱵᱟᱪᱷᱟᱣ ᱵᱟᱪᱷᱟᱣ ᱛᱮ ᱥᱟᱱᱟᱢ ᱠᱚ ᱤᱫᱤ ᱪᱟᱵᱟᱠᱮᱫ ᱠᱚᱣᱟ ᱾ ᱟᱡ ᱮᱠᱞᱟ ᱥᱩᱢᱩᱝ ᱜᱮᱭ ᱥᱟᱨᱮᱡ ᱛᱟᱦᱮᱸᱭᱮᱱᱟ ᱾ ᱛᱮᱦᱮᱧ ᱯᱮ ᱢᱟᱦᱟ ᱠᱟᱹᱢᱤ ᱵᱟᱭ ᱧᱟᱢ ᱟᱠᱟᱫᱟ ᱾ ᱚᱲᱟᱜ ᱨᱮᱭᱟᱜ ᱥᱟᱱᱟᱢᱟᱜ ᱮ ᱠᱚᱴᱟ ᱪᱟᱵᱟ ᱟᱠᱟᱫᱟ ᱾ ᱛᱩᱨᱩᱭ ᱥᱮᱨᱢᱟ ᱟᱡ ᱵᱟᱵᱟ ᱫᱚ ᱢᱤᱫ ᱠᱟᱸᱬ ᱧᱩᱨ ᱠᱟᱛᱮ ᱢᱮᱱᱟᱜ ᱟᱠᱟᱫᱮᱭᱟ ᱾ ᱟᱭᱳ ᱵᱩᱰᱷᱤ ᱴᱮᱸᱜᱮᱥ ᱴᱮᱸᱜᱮᱥ ᱮ ᱨᱩᱭᱟᱹᱜ ᱠᱟᱱᱟ ᱾ ᱢᱤᱫ ᱦᱟᱯᱛᱟ ᱦᱩᱭ ᱮᱱᱟ ᱾ ᱨᱟᱱ ᱠᱤᱨᱤᱧ ᱢᱟ ᱥᱟᱸᱜᱤᱧ ᱨᱮᱭᱟᱜ ᱠᱟᱛᱷᱟ ᱾ ᱪᱮᱫ ᱠᱚ ᱡᱚᱢᱟ ᱚᱱᱟ ᱜᱮ ᱴᱷᱤᱠᱟᱹᱱ ᱵᱟᱝ ! ᱴᱤᱯᱤᱱ ᱨᱮᱭ ᱴᱮᱭᱚᱝ ᱟᱠᱟᱫ ᱡᱚᱢ ᱥᱟᱨᱮᱡ ᱨᱮᱭᱟᱲ ᱫᱟᱠᱟᱜᱮ ᱞᱚᱞᱚ ᱠᱟᱛᱮ ᱛᱮᱦᱮᱧ ᱫᱚᱭ ᱮᱢᱟ ᱠᱤᱱᱟᱹ ᱾ ᱢᱮᱱᱠᱷᱟᱱ ᱜᱟᱯᱟ ? ᱞᱮᱸᱜᱟ ᱛᱤᱨᱮ ᱴᱮᱭᱚᱝ ᱴᱤᱯᱤᱱ ᱫᱟᱠᱟ ᱾ ᱡᱚᱡᱚᱢ ᱛᱟᱨᱮᱱ ᱨᱮ ᱜᱟᱢᱪᱷᱟ ᱜᱚᱜ ᱾ ᱡᱟᱸᱜᱟ ᱵᱟᱡ ᱠᱟᱛᱮ ᱫᱩᱠᱷᱤᱱ ᱱᱟᱠᱷᱟ ᱯᱟᱹᱪᱽᱨᱤᱨᱮ ᱴᱮᱸᱰᱟᱨ ᱠᱟᱛᱮ ᱜᱮᱭ ᱛᱟᱨᱟᱥᱤᱧ ᱮᱱᱟ ᱵᱟᱸᱠᱩᱲᱟ ᱵᱟᱡᱟᱨ ᱨᱮᱭᱟᱜ ᱢᱟᱪᱟᱱ ᱛᱚᱞᱟ ᱨᱮ ᱯᱷᱩᱞᱢᱩᱱᱤ ᱾