চাকোলতাড়ি ছাতা পরব (দসার হৗটিঞ)

(বাডায় আকানা নেশদ কোভিড-১৯ খৗতির চাকোলতাড়ি ছাতা পরব বাং হোয়োঃ কানা। মেনখান অনা রেয়াঃ নাগাম বাডায় জং লেকাতে নোওয়া লেখাদ সদর এনা। আর নোওয়াদ দসার হৗটিঞ)। 

চাকোলতাড়ি ছাতা পরব

-মহাদেব হাঁসদা

চাকোলতোড় রাজ বাখোলরেন রৗসিয়ৗ দেবীপ্রসাদ লাল সিংহ দেও আঃ – কাথা খন বাডায়ঃআ সিরকৗ বৗইদ রেন ভূমিজ সর্দার দ ছাতা ডাং এ এমঃ কান তাঁহেনা। অনকাগে, বলরামপুর ঘাটবেড়া রেন ঘাটোওয়াল দ মোটা বারাহি আর মাঁচা রেয়াঃ খুন্টিয় এমঃ কান তাঁহেনা। পুরুলিয়া জাপাঃ রেন আর মিৎ ভূমিজ সর্দার সালখা দিগৗর, উনিদ চাঁগড়া ডাং এ এমঃ কান তাঁহেনা। অনকাগে আড়সা থানা রেয়াঃ কড়রা আতোরেন মিৎ ভূমিজ দিগৗর দ চারা-মাঁচা রেয়াঃ কাঠ আর মুদৗলি রেন ভূমিজ তরফদার দ হৗতি লৗগিৎ জমাঃ এ এমঃ কান তাঁহেনা। অনকাগে সুকলাড়া রেন মিৎ মুসলা সর্দার দ সাদম এ এমঃ কান তাঁহেনা।

একেন ইনৗ দ বাং , বরাবাজার রেন বাজরাড় সিংহ ছেত্রী দ ঢাক, ঢল আর ফিরি এনেচ্‌ (পৗইকৗহা) এ কোলেৎ কো তাঁহেনা। টামনা আর টাড়ারেন ভূমিজ সর্দার হঁ পৗইকৗহা আর বরকন্দাজ এ কোলেৎ কো তাঁহেনা- রাজ দারামে লৗগিৎ। গোবিন্দপুর, আদাবনা আর কড়াডি আতোরেন কিঁসাড় হড় দ অৗডি লেকান গড়ো কো এমঃ কান তাঁহেনা। চাকোলতোড় সোররেন বাউরি গাঁতাকরেন হড় দ রাজ-আঃ চাতম কো গঃ অৗগুয়েৎ তাঁহেনা।

নংকা লেকা আপান-অৗপিন আঁগিভার সানাম লেকান হড়ঠেন লাদে তাঁহেকানা। ছাতা পরব হিলোঃ দ রেঁগেচ্‌ কান কিঁসৗড় কান, বাঙ্গালি কান, সানতাল কান সানাম হড় লৗগিৎ জম-ঞু রেয়াঃ বনধেজ্‌ তাঁহেন কান তাঁহেনা। অনাতে চাকোলতাড়ি ছাতা পরব নুনৗ রৗস্কৗ আর গরব রেয়াঃ তাঁহেকানা, জাঁহা দ লৗইতে হঁ বাং চাবাঃ আ। বাংলা ঝুমুর সেরেঞ রেহঁ অনা রেয়াঃ সৗবুদ্‌ দ ঞামঃ আ-

ভাদর আদর দিনে আমকে

নাকের লুলুক দে  হে কিনে!

আমি মাথায় লিব লাইলনের ফিতা

দেইখতে যাব চাকোলতোড়ের ছাতা!!

জুগ বদলঃ কানা, অনা সাঁওতে সমাজ হঁ। মেনখান নেতারহঁ পাঁচেত রাজরেন হপন অমিত কুমার পাল সিংহ দেও সাদম রে দেচ্‌ কাতেয় হিজুঃ আ- ডাঁডারে তারওয়ৗড়ি আর – বহঃরে রাজলেকা দৗহ্‌ড়িতে সাজাও কাতে। নেতার হঁ ছাতা টানডিরে বার পাহ্‌টাতে তেঁগো কাতে হাজার হাজার হড়কো আতাং দারামেয়া। অনাতায়ম ছাতা কো রাকাবা। এটাঃ জাত রেন হড় দ সিঁগৗড়ঃ সাঁওতে আপান-অৗপিন অড়াঃ কো রুওয়ৗড়া। মেনখান সানতাল দ মিৎ ঞিদৗগে কো তাঁহেনা টানডিরে।

সেদায় লেকা ছাতা পরব রে এনেচ্‌ সেরেঞ দ বৗনুঃ আকাদা। মেনখান সাঁগিঞ সাঁগিঞ খন হড় দ নেতার হঁ দমেল দমেল কো হিজুঃ কানা। ছাতা টানডিরে মারাং মারাং হোটেল তাঁহেনা, সাঁওতে বিলিৎ বালাং মারসাল। মাইক রেয়াঃ সাডেতে আচ্‌ কাথায় হয় রিমিল দুল দুলৗউঃ আ। এনতেরেহঁ চাকোলতাড়ি দ মেনাঃ আকাদা চাকোলতাড়ি রেগে।

দসার হিলোঃ সেতাঃ বের ঞহঁড় ঞহঁড় সেরেঞ সেরেঞ তে নেতার হঁ ঞেঞেল হড় কো রুওয়ৗড়া-

আপেদ জা হপন বাবু!

চাকোলতাড়ি ছাতা ঞেল্‌পে দুকানা-

উকুর জা চিনি লৗডুঞ ঞেল তাপেয়া!

হুলুয় হুলুয় হয় হিলি!

ঝার-ঝারে দাগ্‌ আ-

জত চিনি লৗডু হিলিয় লে- লৗডুর কেৎ !!