খবর সাকাম
 |
| -সুরেন্দ্রনাথ মান্ডি |
ধৗরতিপুরি রেনাঃ আয়মা আয়মা জায়গারে জাওগে আয়মালেকানাঃ ঞুম ঝাগঃ ঘটন ক ঘটাঃ কানা। অকারেদ বির-বুরু-দারে-নৗড়ি-অড়াঃ-দুওয়ৗর-টাঁডিটিকুর আতার রঁগঃ কানা, অকারেদ বানভাসি, আরেল-রেয়াড় হয়দাঃ, খান অকারেদ সেঁগেল দাঃ বুঁভুক তে আয়মা আয়মা জিউয়িয়ৗন কোওয়াঃ জিউয়ি বৗতি ইঁড়িজঃ কানা। অকারেদ সরকার বাহাদুর কো পালটাঃ কানা, অকারেদ তোপোৎ তাপাম হোয়োঃ কানা, অকারেদ আডি ঞুতুমান হাটপাতা-মেলা-লেগচার-সাঁওহেৎ হেলমেল, অকারেদ রিডচ্ রডচ্ আঁদা কচলন হোয়োঃ কানা। দেশ বিদেশ রেনাঃ ঘটন মঞ্চরে নংকান আয়মা লেকানাঃ সামাজিয়ৗ-রাজৗরি-কৗউডি অৗরি-জিয়নৗরি ঘটন জপড়াও আয়মা লেকানাঃ ঘটন ক ঘটাঃ কানা। খবর সাকাম গে অনা ক লাখ লাখ আয়মা লেকানাঃ ঞুম ঝাগঃ খবরা খবর দিনৗম হিলোঃ লাখ লাখ মৗনমি কঠেন এ সেটেরা।
আবোওয়াঃ জিয়ন দিনৗম হিলোঃ আয়মালেকান ঘটন রেনাঃ তৗকিজ্-তাপাকিজ্ তে হঁতেল-গেঁজেলঃ কানা। হিঁসৗহিঁসি, মানওয়ৗরি বিরুধ কৗমি-কুকৗর জেলেকা মেনাঃ আ,অনকাগে অনাকো রেনাঃ উল্টৗহঁ। ধৗরতিপুরিরে আচ,আচ্তে দামধাসেঃরে খবর সাকাম, আকাল-বানভাসি-মড়ক রে খবর সাকাম,লৗড়হৗই বিরুধ্ রে খবর সাকাম, সুলুক নিরৗই জপড়াও রে খবর সাকাম। খবর সাকাম রে দিনৗম হিলোঃ গে চমক। রাজৗরি-জপড়াও আয়মা লেকানাঃ খবরে বাডায় অচওয়া খবর সাকাম। অকারে মানওয়ৗরি দুরিব হেঁতেল গেঁজেলঃ কানা, অনা খবর সাকাম তেবোন বাডায় দাড়েয়াঃ আ। সাঁড়েস-লেগ্চার-সাঁওহেদ্-বেব্সা বৗনিজ রেনাঃ নাওয়া নাওয়া খবর, খবর সাকাম তেবোন বাডায় দাড়েয়াঃআ। খবর সাকাম দ চালাঃ কান জিয়ন রেনাঃ চালাঃ চিতৗর মালা। গণ মাধ্যম রেনাঃ মিৎ দামানাঃ দ কানা খবর সাকাম।
হিঁসৗহিঁসি, তোপোৎ তাপাম, জৗত-জৗত ভেপেগেৎ, মৗনমি আয়মা লেকানাঃ উন্নৗয়,অবিচার,নাহাচার এমান রেনাঃ সৗরিন চিতৗর এ সাব্ রাকাব্ আ খবর সাকাম। খবর সাকাম পাড়হাও কাতেগে কেরমে কেরমেতে মৗনমি উন্নৗয়-নাহাচার বিরুধ রেকো লাহা হিজুঃ আ, জুমিদঃ আকো। অনা জুমিদ্ আঁদোড়তে, লৗড়হৗইতে রিডচ্ রডচ্ নাহাচার রেনাঃ আড়ে রৗপুৎ ছাকাছুনঃ আ। খবর সাকাম গে সমাজ রেয়াঃ, দিসম রেয়াঃ, ধৗরতি পুরি রেয়াঃ জুমিদ্ আড়াং এ তারকো অচয়া।
মৗনমি জিয়ন রে খবর সাকাম রেনাঃ অরসং দ অসাম্ভেড় গেয়া। বুগি-বৗড়িচ্ বিচৗর রে খবর সাকাম রেনাঃ আয়মা এনেম মেনাঃ আকাদা। জাঁহারেগে জাঁহায় সরকার বাহাদুর, বাংখান প্রতিষ্ঠান মৗনমি-বিরুদ্ নীতিয় হাতাওয়া, অঁডেগে খবর সাকামদ অনা বিরুধ রে গার্জাও দাড়েয়াঃ আ। রোহেৎ-এগের, কৗপি –তারওয়াড়েতে জাঁহান কৗমি বাং সিগিলঃ আ, অনা খবর সাকাম দারায়তে কৗমি সিগিল দাড়েয়াঃআ। রেঁগেচ্ নাচার অবলা হড় কোওয়াঃ মচারে আড়াং এ সিরজৗও দাড়েয়াঃআ খবর সাকাম। মিমিৎ হড়, জৗতি সমাজ সুমুং দ বাং দিসম গেয় পালটাও দাড়েয়াঃ আ খবর সাকাম। তেহেঞ খবর সাকাম রেনাঃ দাড়ে অকয় বায় বতরাঃ আ!
মেনখান, খবর সাকাম রেয়াঃ আসল দাড়েদ খবর সাকাম সদর, চাঃচালাও কোওয়াঃ বে-বতর মনে মুরুখ, উন্নৗয় বিরুধ রে তিঁগু টারহাও আর জৗরিয়াঃ সদর রে। অনা আদর্শ খনেম সাহায়েন সে মৗনমি ভৗলৗই কৗমি জেলেকা হৗপিদঃ আ, অনকাগে হৗপিদঃ আ খবর সাকাম হঁ। ঢেরতেৎ হড়াঃ বুগি, নাপায়াঃ জওয়াও অচয়গে হোয়োঃআ খবর সাকাম রেনাঃ সৗরিয়ৗত্ দ।
.webp)
