সিঁগি মাহা রেনাঃ সাকাম ‘চেরেচ্‌ আড়াং’

“আবোওয়াঃ কাথা” ওয়েব পেজ রে সানাম সিঁগি মাহা গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। পৗঠুওয়ৗ বাবু-মৗই তাকো হঁ আপেয়াঃ ড্রয়িং (চিতৗর বেনাও) অনড়হেঁ, সেরেঞ, কুদুম, কৗহ্‌নি এমান অলকপে ভেজা দাড়েয়াঃআ। সাঁওতে আপেয়াঃ ক্লাস আর জিলৗ এমঃ আলোপে হিড়িঞা। আবোওয়াঃ Whatsapp :- 8942955829 , E-mail Id:- abowagkatha@gmail.com ।

সুজয় কুমার টুডু, ক্লাস- I
জেলা - পশ্চিম মেদিনীপুর

মানস হাঁসদা, ক্লাস-IV
জেলা - বাঁকুড়া

সূচনা হাঁসদা, ক্লাস - VIII
জেলা - বাঁকুড়া

তেঁহেঞা সিঁগি মাহা রেনাঃ সাকাম ‘চেরেচ্‌ আড়াং’ আখড়ারে যাঁহায় অনলিয়ৗ কো আতে সাপ্‌ড়াও এন- ওনকো দকো হোয় এনা-  শ্রী কা ন্ত স রে ন, এম. নেপোলিয়ন টুডু, বিভূতি ভূষণ সরেন,  শশীকান্ত মুরমু, গাতে টুওয়ৗর  সাঁওতে  দুগাই টুডু ।

বাড়ায়াম কি ?

 শ্রী কা ন্ত স রে ন

বাড়ায়াম কি মারাংবুরু আঃ              

         চেৎ কান তায়া পৗরিস

হড়াঃ ভৗলৗই কৗমি করে        

         চেদাঃ বৗনুঃ তায় অৗড়িস।

বাড়ায়াম কি আষাঢ় বঁগা           

      চেলে ক রাগা ঞুঁতরে

সিঞ বেড়া দ বাং ক ঞেলঃ       

    ‌‌  তাঁহেনাক অকা ধুঁদরে।

বাড়ায়াম কি হয় দ চেদাঃ              

         সিঞ- ঞিদৗয় লাড়াঃ

অকয় কদ মেৎ তাঁহেনতে            

         জিয়ন ভর ক কাঁড়াঃ।

বাড়ায়াম কি ধৗরতিপুরী       

        চেদাঃ সিঞ- ঞিঁদৗ অৗচুরঃ

মৗনমি হপন বাং লৗইতে               

        অকা করে ক বিহুরঃ।

বাড়ায়াম কি ইপিল চেদাঃ          

       হাজার- লাখ গটাং

নুমিন মারাং ধারতী লৗগিৎ     

        চাঁদো ( ঞিঁদা) চেদাঃ মিৎটাং।

 =O= O=O=O=O=O=O=O=O=

হিঁসি চেঁড়ে

এম. নেপোলিয়ন টুডু

হিঁসি চেঁড়ে হিঁসি চেঁড়ে

অকায়েনাম আম

টুপ্‌রি লেকা আকা তুকৗ

গেবাং উকুর তাম !

উসুল উসুল তালে দারে

নিতহঁ মেনাঃ গেয়া

বেলে বুসৗঃ ঘারঞ্জ আতে

চেদাঃ বৗনুঃ পেয়া ? 

হয়তে অটাং এমান লেরে

ইলন গলন তুকৗ

রেপেজ্ আলে হালাং লৗগিদ্

অহজ্ অদা সুকৗ।

সিঁগৗড় দলে কয়গ্ তাঁহেৎ

আপে বাখোল সেৎ

ভৗবিৎ আলে মাসে ভালা

জুলুৎ জুলুৎ চেৎ ?

নেসদ হিঁসি হিজুঃ পে'গে

আলে অড়াঃ সুর

গাতে তিঞক মেন আকাদা

বাবন চাপাৎ ঞুর।

 =O=O=O=O=O=O=O=O=O=

গিদৗর বৗউলি

বিভূতি ভূষণ সরেন

আলে বাবু মেনায় তালে

অৗডিগে ছট্‌পট্‌-গে তালে।

হানা-নওয়া খয় মেয়ায়

জম দ অহঁ কেয়ায়।

হাট চালাঃ কৗনিঞ হেঁসে?

নাপায়তে তাঁহেন মেসে!

মনে আলম কৗহিস্ ,

তাহেন মে মজ্ সৗহিচ্।

আলম কয়ঃ কাঃ মুটুর মুটুর,

জমাম হাঁ কুটুর কুটুর।

অৗগুয়ামাঞ কোটকুটি

আরহঁ সাঁওতে চচপটি।

ঞিদৗ জৗপিৎ অকতে

খিলোডৗলিঞ "হৗকু হৗকু রটে"।

কুদুম, কৗহনি য়ৗলিঞ,

নিংকা কাতে গেয় জৗপিদালিঞ।

 =O=O=O=O=O=O=O=O=O=

তালা নানা

শশীকান্ত মুরমু

তালা নানা তালা নানা

বিরিৎ কাতে সেতাঃ খনা

               হাসা দমেয় দিপিল,

রড় আয় মিৎ বার

বায় তাঁহেন থির থার

            কৗমিয়ায় ইকিল সিকিল।

কুমাং মাত অৗডি ভৗগি

গঃ কাতে মারাং টাঁগি

             ঘচে ঘচেয় তাড়াম,

উমের তায় মিৎ শায়

কৗমিয়ায় হায় ফায়

            একাল বাঁগে হাড়াম।

=O=O=O=O=O=O=O=O=O=

এড়ে হাড়াম

 গাতে টুওয়ৗর

চেতান টলা ফগড়া হাড়াম

        এড়ে কাথায় রড়া,

বুলৗও কাতেয়  দহ মেয়া

         ঝত গেতায় পেড়া ।

সৗরি কাথাম জৗরি লেখান

         বাং এ আড়াঃ মেয়া,

তেরেল হাপা মারে ডাডুতে

          দমেয় পেড়া মেয়া ।

আলম লাঁদায় ভুল কাতে

           তিসহঁ উনি সামাং ,

বায় উরুমক উনদ অকয়

       খৗঁড়য়ৗঃ দিমপৗ দাড়াং ।

ঞাপাম তরা ডবঃ জহার

         আডিয় কুসিয়াঃ ,

নাপায় বেভার তাঁহেন তুলুজ

        এড়েয় রড়া চাঃ ?

ফগড়া হাড়াম ফগড়া ডাটা

        উনিগে এড়ে হাড়াম ,

এড়ে কাথা লৗয় কাতেগে

         মিৎ মহডায় তাড়াম ।

=O=O=O=O=O=O=O=O=O=

অকায় নাপে গিদ্‌রৗ কদ

দুগাই টুডু

অকায় নাপে গিদ্‌রৗ কদ

অলঃ পাড়হাও চেৎপে দেলা,

তবে অৗনিজ মুরুখ সাহাঃ

সমাজ জৗতি উৎনৗও চালাঃ ।

কৗটিচ্‌ কৗটিচ্‌ গিদ্‌রৗ আপে

কৗটিচ্‌ কৗটিচ্‌ গিদ্‌রৗ আপে

গ-বাবা কাথা কো আঁজম পে,

তবে অৗনিজ অৗখির জিয়ন

লাহা সেচ্‌গে লাহাঃ তাপে।

জানাম দাতা তোওয়া দারে

জানাম দাতা তোওয়া দারে

এঁগাঞ অৗপুঞ কানা কিন,

সারা ঘৗড়িচ্‌ গিদ্‌রৗ লৗগিদ্‌

নায় নাপায় উইহৗরা কিন।

=O=O=O মুচৗৎ O=O=O=