আবোওয়াঃ ওয়েব পেজ, ৩০ আগস্ট : কারাম পরব রে হাজার হাজার লিফলেট ছুড়িয়ৗও কাতে কুঁড়বি,মাহাত গাঁতাত রেন হড়ক সুমুংগে শ্রদ্ধা আর শুভেচ্ছা কিন এমাদ্ কোওয়া অনগ্রসর শ্রেনী কল্যান হৗটিঞ রেন রাষ্ট্রমন্ত্রী মানতানিয়ৗ সন্ধ্যারানী টুডু আর পুরুলিয়া জেলা স্থায়ী সমিতি রেন তথ্য সংস্কৃতি শিক্ষা ক্রীড়া কর্মাধ্যক্ষ মানতান গুরুপদ টুডু গোম্কে তৗকিন।
নোওয়া লিফলেট ঞাম আর পাড়হাও কাতে আদিবাসীক অপমান হোয়েনা মেন্তেগে কাথা রাকাব্ এনা আদিবাসীক তালারে। বাডায়ঃ কানা বাংমা মন্ত্রী সে জনপ্রতিনিধি লেকাতে যাঁহায় গাঁতাত রেন হড়গে শ্রদ্ধা আর শুভেচ্ছা এম গেকিন দাড়েয়াকোওয়া। মেনখান নঁডে কুক্লি রাকাব্ কানা এখেন কুঁড়বি,মাহাত গাঁতাত রেন হড় সুমুং দ চেদা ? নংকাগে বানার টুডু বিরুধরে অভিযোগ ক রাকাব্ কেদা আদিবাসী গাঁতাত রেন হড়কো।
বাডায় আকানা বাংমা নোওয়া কারাম মা পছিম্ বাংলা, ঝাড়খন্ড, মধ্যপ্রদেশ,ছত্রিশগড়,উড়িষ্যা, মহারাষ্ট্র খন এহব কাতে বাংলাদেশ এমান হৗবিচ্ রেন সান্তাড়, হো, মাহ্লে,মুন্ডা,ওঁরাও এমান আদিবাসী গাঁতাত রেন হড় নোওয়া কারাম পরব কো মানাও আ সে অৗডি সেদায় খন ক মানাও আগুয়েদা। মেনখান নঁডেহ কুক্লি রাকাব্ কানা উনকু লৗগিৎ দ চেদাঃ শ্রদ্ধা আর শুভেচ্ছা দ বৗনু আকাদা ? আরহঁ বাডায় আকানা বাংমা মানতানিয়ৗ মন্ত্রীয়াঃ বিধান সভা এলাকারেহঁ আয়মা সান্তাড়,মাহ্লে, মুন্ডা, খাড়িয়ৗ এমান আদিবাসীক জাঁক জমক সালাঃ নোওয়া কারাম পরব কো মানাও কেদা মেনখান ওন্কো লৗগিৎ হঁ চেদাঃ শ্রদ্ধা আর শুভেচ্ছা বাং কিন এম লেদা মেন্তে কুক্লি দ রাকাব্ কান গেয়া। কাথা দ রাকাব্ কান গেয়া বাংমা মানতানিয়ৗ মন্ত্রীয়াঃ বিধান সভা এলাকারে আদিবাসী হড়গে ঢের মেনাঃ আকাদ্ কোওয়া আর উনকুগে ঢের নোওয়া কারাম পরব কো মানাওয়া এনখান উনকু বৗগি কাতেৎ কুঁড়বি,মাহাত লৗগিৎগে উনাঃ দায়া দুলৗড় দ চেদা ?
নোওয়া ইদিকাতে ভারত জাকাত মাঝি পারগানা যুওয়ৗন মহল রেন সভাপতি মানতান রাজেন টুডুয় লৗই আকাদা জে- মন্ত্রী সন্ধ্যারানী টুডু আর গুরুপদ টুডু গোম্কে তৗকিন দ কুঁড়বি,মাহাত কো কুশি অচয় লৗগিৎ গে চেৎ নংকান কৗমি দকিন করাও আকাদা ? উনিঠেন হঁ নোওয়াদ কুক্লি কান গেয়া। মানতান রাজেন টুডু আরহঁয় লৗই আকাদা বাংমা ওন্কো গে আদিবাসী কোওয়াঃ নাগাম আর লাকচার কো বিকৃতি য়েদা। নোওয়া লৗগিৎ আদিবাসী সমাজ ঠেন ইকৗ হাতাও হোয়োঃ আ। আর বাংখান আদিবাসী হঁ জবাব এমঃ দক বাডায় গেয়া মেন্তে হঁয় রড় তরা আকাদা মানতান রাজেন টুডু গোম্কে দ।
