লালগড় কলেজ রে দর্শন আর এডুকেশন সাতাম লৗইতে আরহঁ দাবি দহ কেদায় ভারত জাকাত মাঝি পারগানা মহল

শিবুলাল মুরমু : ঝাড়গ্রাম জেলা রেনাঃ লালগড় কলেজরে দর্শন আর এডুকেশন সাতাম লৗইতে আরহঁ দাবি দহ কেদায় ভারত জাকাত মাঝি পারগানা মহল। বাডায় আকানা বাংমা অনা কলেজরে নিৎ-হৗবিজ্‌ ইতিহাস আর রাষ্ট্রবিঞ্জান লৗইতে পাড়হাঃ রেনাঃ অনুমোদনে এম আকাদা পছিম্‌ বাংলা সেচেৎ দপ্তর। অনা সাঁওতে বাডায় আকানা বাংমা আরহঁ বারয়া সাতাম এমঃ রেনাঃ কাথা মানতান সেচেৎ মন্ত্রী পার্থ চট্টোপাধ্যায় আচ্‌গে লৗই লেদায়। মেনখান অনাকিন সাতাম রেনাঃ নিৎহঁ বাস্তব রে বাং জওয়ায় লেন খৗতির পৗঠূওয়ৗ কোওয়াঃ কাথা দিশৗ কাতেৎ বাং হৗটিঞ মেদিনীপুর জেলা ভারত জাকাত মাঝি পারগানা মহল পাহ্‌টা খন পারমেন ১৯ আগস্ট হিৎ হিলঃ মেদিনীপুর জেলা প্রশাসনিয়ৗ তালাতে সেচেৎ মন্ত্রী ঠেন মিৎটাং চিঠি ভেজা হুয় এনা মেন্‌তে বাডায় আকানা। অনা চিঠিরেগে রড় আকানা বাংমা ইতিহাস, রাষ্ট্রবিঞ্জান সাঁও সাঁওতে দর্শন আর এডুকেশন সাতাম তেঁহ সান্তাড়ি মিডিয়ামতে পাড়হাও রেনাঃ দাওক ঞাম্‌ মা মেন্‌তে।

অনা সাঁও সাঁওতে আরহঁ বাডায় এনা বাংমা পারমেন ৯ আগস্ট জেগেৎ জাকাত মাহা দিশৗ কাতেৎ পছিম মেদিনীপুর রেনাঃ গড়বেতা থানাহাঃ সৗহিজুহিতে নেপুরা বিজলী রানি হাই স্কুল আর দামোদর ধীরেন্দ্র বিদ্যাপীঠ রেন পৗঠুওয়ৗকো (এইচ্‌.এস.পাশ) লৗইতে সারহাও এমঃ আখড়া সাপ্‌ড়াওলেনা। অনা সারহাও আখড়া খন রুওয়ৗড়ঃ অক্তে হররে মিৎ দুর্ঘটনারে বারয়া পৗঠুওয়ৗআঃ জিউয়ি বৗতি আদিন দিন রেগে ইঁড়িজ্‌ এন তৗকিনা। অনা লেকাতে ভারত জাকাত মাঝি পারগানা মহল পাহ্‌টা খন বঁগা তালায়েন উনকিন বারয়া পৗঠুওয়ৗ ‘ভোলানাথ টুডু’ আর ‘সঞ্জয় হাঁসদা’ রেন পুরিবারক লৗগিৎ ১০ লাখ কাতেৎ টাকা আর বাজাও আকান আর মিৎ পৗঠুওয়ৗ জয়রাম সরেন, নিৎহঁ মেদিনীপুর মেডিকেল কলেজ রে তিকিছা চালাঃ কান গেতায়া উনিয়াঃ পুরিবার লৗগিৎ ৫ লাখ টাকা এমঃ রেনাঃ দাবি সনদ মেদিনীপুর জেলা প্রশাসনিয়ৗ আর পুলিশ সুপার ঠেন চিঠি তালাতে বাডায় হচঃ হুয় আকানা মেন্‌তে বাডায় আকানা।