২৬ আগস্ট, “বাবাহড় কো সাঁও সমানঃ লৗগিৎতে আয়োহড় কোওয়াঃ লৗড়হৗই মাহা” দিসৗতে
 |
| -সুরেন্দ্রনাথ মান্ডি |
২৬ আগস্ট দ কানা বাবা হড় কো সাঁও সমানঃ লৗগিৎতে আয়োহড় কোওয়াঃ লৗড়হৗই মাহা, মেনমা- অৗইদৗর অৗমরৗও মাহা, খাটোতে সাহেব কোওয়া পৗরসিতে মেন লেখান মেনগঃআ – Women’s Equality Day. আয়োহড় কোওয়াঃ নোওয়া লৗড়হৗই দ আয়মা মারেয়াঃ কানা আর দিনৗম দিন হিলোঃ রেনাঃ হঁ কানা। ঞিদৗ কাতে রেহঁ অড়াঃতে বাং রুওয়ৗড়ঃ জুদি সিসিরজনিচ্ আঃ নিয়ৗম হোয়োঃ তাহলে মৗনমি সমাজ, বাবাহড় আর আয়োহড় কো লৗগিৎ ভেগার ভেগার নিয়ৗম এ ত-লা। জানাম খন ভাঁডান হৗবিচ্ মৗনমি সমাজ হাহাড়াঃ হাহাড়াঃ জানাং ভেগারতেয়ানাঃ নিয়ৗম এ তল্ লৗগিদঃআ, আর বাবাহড়,আয়োহড় সানাম কগে মেৎ জৗপিৎ কাতে নোওয়া নিয়ৗম ক পালাও অৗগুয়েদা জুগ জুগ খন, মেনখান নংকানা নিয়ৗম, মেনমা অসাম্য বিরুদ্ রেহঁ সাম্য সে সমানঃ রেনাঃ লৗড়হৗইদ চালাঃ কান গেয়া। মৗনমি নাতাগে নোওয়া লৗড়হাইরে সেলেদ্ মেনাঃ কোওয়া – বাবা হড় লেকা আয়ো হড় কহঁ।
বাবা হড় কো সাঁও সমানঃ রেনাঃ আয়োহড় কোওয়াঃ লৗড়হৗই খৗতির ১৯২০ সাল রেনাঃ ২৬ আগস্ট হিলঃ মার্কিন যুক্তরাষ্ট্র দিসমাঃ ১৯ আনাঃ সংবিধান সুধ্রৗও তালাতে আয়োহড় ক ভোট এম্ রেনাঃ অৗইদৗর ক ঞাম আকাদা আর ১৯৭৩ সাল রেনাঃ ২৬ আগস্ট হিলঃ নোওয়া Women’s Equality Day দ পোয়লো উতৗর মার্কিন যুক্তরাষ্ট্র রে মানাও গুনৗও আকানা। অনা তায়ম তায়মরে জাতিসংঘ দ ১৯৭৬ সাল রেনাঃ ৮ মার্চ দ ‘ধৗরতি জাকাত আয়োহড় কোওয়াঃ মাহা’ লেকাতে জাও সেরমাগে ধৗরতি নাতারে মানাও-গুনৗও রেনাঃ আঁদে-য় এমাকাদা।
আয়োহড় কো ইদিকাতে ২৬ আগস্ট সে ৮ মার্চ উদ্যাপন রেনাঃ জস্ দ , জে- আয়োহড় কদ বাংকো লেঁগড়চ্ আ, আয়োহড় কদ লৗড়হৗইয়ান; ওনকোওয়াঃ দ আরহঁ ঞামতেয়াঃ মেনাঃআ, আর জাঁহাতিনরেগে কো বুজ্ ঞামা জে, আকো সানাম সেচ্তে কো তালম অচঃ কানা অনহেলা অচঃ কানা ক,ওনগে আকোওয়াঃ অৗইদৗর ইদিকাতেকো দিসৗ-রুওয়ৗড়া।
তেহেঞ আয়োহড় তেকো সানামাঃ সেচ্তেকো লাহাওয়াকানা সে কো লাহা দাড়েয়াঃ কানা মেনখান শায়কাড়া হিসৗব্তে বাবাহড় কো তলনাতেদো তিনৗঃ গান ? মিৎগে কৗমি-কৗসনি কাতে আয়োহড় কো বাবাহড় সমান কুড়ৗই কো ঞামেদা কি ? নোওয়া কুক্লি রাকাব্ কানা তেহেঞ। আয়োহড় কোওয়াঃ মানওয়ারি অৗইদৗর, জানাং আনাঃ লেকাতে হুডিঞ-মারাং ভেপেগেৎ,আন-অৗরি জওয়াও অচয়রে বিচৗর বেবস্থা, অত্-হাসা রেনাঃ ভুঁপুজৗও অৗইদার,আকো কুসি কৗমি অৗসুলঃ রেনাঃ অৗইদৗর এমান এমান ইদিকাতে নিতোঃ কুক্লি সামাং অ কানা।
নাহাঃ ঞেলঃ কানা, আয়োহড় কোওয়াঃ মানওয়ারি অৗইদৗর – চেৎ আপনারাঃ অড়াঃরে, আর বাং বাহ্রেরে, কলসা-মাগাল,লোসোপোঁডোঃ কানা। জাওগে আয়োহড় কো চেতান ঘারঞ্জিয়ৗ আর সামাজিয়ৗ রিডচ্-রডচ্, আঁদাঃ কচলন, নাহাচার বৗড়তি ইদিঃ কানা। অড়াঃরে আর অড়াঃ বাহ্রেরে বাবাহড় তেকো সানাম লেকানা জাঁহা সন্মান সে সুজুগ-সুবিধা-অৗইদৗর অৗমরৗও রেনাঃ দাঁও কো ঞামা,বাবাহড় কো তলনাতে আয়োহড় কোদ নিহৗত্ কম গে অনা ক ঞামেদা। নতে নে-হারা গদঃ উমেররে, বেগর-কৗমি আসুলঃরে জপড়াও বাং রেগে, বেগর পাক্ট সিখনৗৎ রেগে কুড়ি হপন কোওয়া বাপ্লা আর গিদ্রৗ এঁগাতঃতে,হড়ম-মনে হেতেল-গেঁজেলঃ কান তাকোওয়া, মেন্মা- মানওয়ারি অৗইদৗর আমরাও খন সাঁগিঞ রেকো তাঁহেন কানা। নোওয়াক আনাট সাহায় লৗগিৎতে রাষ্ট্র লাহা হিজুঃ লেক্ কান তায়া ঝতম খন লাহাতে। আয়োহড় নাহাঃদ পৗহিল খন ঢের কো লাহাওয়াকানা মেনখান বাবাহড় সমান দ বাং। রাষ্ট্র মেনেক্ দিসম রেয়াঃ চৗলু মেনাঃ আইন আর ঞেঞেল-মেৎ রেয়াঃ ভঙ্গিতে আয়োহড় কোওয়াঃ বাবাহড়কো সাঁও সমানঃ রেয়াঃ তাড়াম ডাহার রে জৗনুম রাম্ফা কানা। ঞেলঃআ বাবাহড় কোওয়াঃ শাসন-সমাজ রে বাবাহড় কদ রজগার খৗতির তে ওনকোওয়াঃ কাথা তেগে সমাজ-সংসার চালাঃ আ। ঢেরতেৎ আয়োহড় কগে বাং কো রজগার খৗতির অনহেলা আর নাহাচার অচঃ আকো। নোওয়া আবস্থা হৗপিৎ লৗগিৎতেদ আয়োহড় কোওয়াঃ কৗমি অৗসুলঃ রেনাঃ মেন্মা রজগার রেনাঃ বন্দেজ হাতাও হোয়োঃ জৗরুড় কানা।
মিৎটাং সমাজ/জৗতি ওনরেগে লাহান্তি, সমানঃ ডাহারতে মহডাআ জখচ্ বাবাহড় কো সাঁও সাঁওতে আয়োহড় কোওয়াঃ অৗইদৗর অৗমরৗও রে গড়সপহৎ ঞাম। সমাজ/জৗতি দ মিৎ চেঁড়েয়াঃ ফাঁকড়ৗ লেকা- মিৎ ফাঁকড়ৗ দ বাবাহড় কো আর মিৎ ফাঁকড়ৗ দ আয়োহড় কো। সমানতে বানার ফাঁক্ড়ৗ ফারকাও লেন্তে য়ানিচ্ সমাজ চেঁড়ে দ সেরমা সঁজগ্ এ ফারকাও দাড়েয়াঃআ। নোওয়া ধৗরতিপুরিরে মৗনমি সমাজ লাহান্তি লৗগিৎতে আয়োহড় কোওয়াঃ বাবাহড় কো সাঁও সমানঃ বেগর হর-ডাহার দ বৗনুঃ আনাং।
.webp)
