টেরা কয়ঃ
 |
বীরসা কিস্কু
কুইলৗপাল হাট, ভাদর বঁঙ্গারেনাঃ পোয়লো হাপ্তা, দুরুম দুরুম অৗডিগে ভিড় আকানা। চাষ ক রাকাব্ আকানতে সানাম হড়গে হালধোওয়া রেয়াঃ ক সয়দায়েদা। ঝান হঁ হাট এ সেন আকানা সয়দা সাঁওতে বিটিতায় রুপৗলী কলেজ খনে হিজু কানা, উনি হঁ দারাম।
ঝান দ আচরেন কুড়িগিদৗর চেতান অৗডি বৗড়তিগে গাইড তায়, যাঁহাসেনগে গাতে গাতে কিন চালাঃ আ। হরঃ বাঁদেহঁ গটাগে হড়ম এসেদ চুড়িদার পিস। যাঁহাতে গিদরৗ চেতান বৗড়িচ অরসং আল সেটেরঃ মা সে বৗড়িচ্ নজরতে আলয় আহাঃ। আচ্ চেতান যাঁহা বে-বৗড়িচ্ কৗমি হুয় আকানা , রুপৗলী চেতান অনকা আল হুয়ুঃ মা । ঝান দ মনেয়ায় নওয়া নাহাঃ হরঃ বাঁদেরেয়াঃ গে সানাম দোষ ।
মিরাজ বাস রেয়া হর্ন আঁজমতে ঝান দ মোড় সোরতে সেটের কাতে গৗডিগে কয়ঃ আকাদা । রুপৗলী গৗডি খনে আঁড়গন কানা । সৗরিগে রুপৗলী দ রুপ রং তে রুপৗ লেকাগে ঝাক-ঝাক এ ঝালকাঃ কানা তারাসিঞ বেড়ারেনাঃ
সিতুং আহ্লাতে । হাটরেন হড়ক কয়ঃ আর কয়ঃ রেগে মেনাঃ কওয়া, মেৎ রেয়াঃ মেৎকুটি হঁ বাং রিপিদ্ দঃ কানা ।
ঝান দ রুপৗলীয়া হরঃ আকাদ আঙরপ ঞেলতে অৗডিগেয় এদরেয়েনা ,গৗডি খন ফেড সাঁওতে রুপৗলী মেতায় কানা - বিটি তিনৗঃবার ইঞ মেন আকাদ মেয়া নংকান জিন্সপ্যান্ট আর টপ দ আলম হরগা।
-য়ু গ নুনৗ নাপায় হরঃ; বৗড়িচ্ এম মেন এদা | আম সাঁও যাঁহা ঘটন ঘটাও আকানা অনা দ নওয়া হরবাঁদে খৗতির দ বাং হুয় আকানা, অনা দ মৗনমিয়ৗ বৗড়িচ্ মনে খৗতির। ঝান হঁ হাট-বাজার তুলুচ উইহৗর এদায় সৗরিগে ....।
সানামাঃ সয়দা পুরৗও কাতে অড়াঃ সেন কিন মঁহডা আকানা অৗকিনগে এঁগা-হপন । তায়ম তায়মতে কড়া হঁক পাঞ্জা আকাদ কিনৗ আর হানা নাওয়াক রড় পারম এদা । অলঃ অৗকিলতে গেয়ান আকান রুপৗলী বায় সাহাও দাড়েয়াঃতে তিঁগু কেটেজ কাতে রড় রুয়ৗড় কেদায়। উনরে ঝানগে মেনকেদায় - চল বিটি চল, নুকু মানওয়া রুপ কাড়য়া কারাজদ বাংক বুঝৗও আ চেৎগে, আকোওয়াঃ গে ঝত দোষ আর অনাগে আবো কুড়ি হপন চেতান ক লাদেয়া। নোকো কড়া হপনাঃ অনা বারয়া মেৎগে বাং নাপায়া, চাঁদ দ নওয়া লে-লেঁগেচ ধৗরতীপুরী ঞেল লৗগিদ্ মেৎএ এম আকাদা মেনখান নুকু ভাঙকাড়া মানওয়া আঃ নংকান কয়ঃ গে বাং বুগিয়ৗ ।
.webp)
