আবোওয়াঃ ওয়েব পেজ- ৩০শা জুন,হুলমাহা মানাও বাড়া কাতে উনদ ঞেঞেলিয়ৗক যে যার অড়াঃক রুওয়ৗড় কানা। অনা ভিড় তালা খন গে অকয় বাডোহিয়াঃ সেরেঞ আড়াং চং তারকয়েনা –‘সবর নাখা গাডা দা লেগেম্ লেগেম লিঁজিন কান/৩০শা জুন, হুল মাহা রেহঁ হড় বন হৗটিঞঃ কান’।
নেশাঃ হুলমাহাদ বার লেকা নেয়ামতে পারম এনা। সানাম জৗতি হড়ক ঞেল জং আনা। নোওয়া লৗইতেদ চেৎ তজ্বিজ্ অকয়া মচা খনহঁ অনকা মাছা বাং আঁজম লেনা। অকয় কদ সিধু-কানু মুঠৗনরে বাহামালাকো আরাওকেৎ আর অকয় কদ বাং ? তবে বাডায় আকানা আয়মা জায়গারেগে হুলমাহাক মানাও আকাদা। আরহঁ বাডায় আকানা নংকা বার তেখার হুলমাহা মানাও খৗতির অৗডি আয়মা হড়গে দুক্ কো সদর আকাদা সাঁওতে হড়-হপনাঃ জুমিদ্–দাড়ে রেনাঃ কাথাহঁক রাকাপ্ আকাদা।
ভারত দিশম রেনাঃ নাগামরে ১৮৫৫ সাল ৩০শা জুনদ তামাম আদিবাসী হড়-হপন ঠেন মিৎ উইহৗরান মাহা কানা আর অৗডি গরবান মাহা কানা। যাঁহাদ হড়-হপন অনা মাহা অৗডি জাঁক-জঁমক সালাঃ হাঁনে তিস খন অৗডি গরব আতেক মানাও আগূয়েদা। যাঁহারে তামাম হড়-হপনাঃ জিল-জাং- মায়াং মেশা মেনাঃআ। হুলমাহা মানাও আগুয়েৎ তেগে সাঁওতারে মিৎ-বার হুল-গৗরিয়ৗ আর সুসৗরিয়ৗকো অমনঃ কানা আর প-পঙড়াকো দিশম কৗমি লৗগিৎক লাহা হিজুঃকানা। হুলমাহা মানাও আগুয়েৎ তেগে সাঁওতারে অনা সেরমা ভিৎরিরে আয়মা আয়মা কৗমি সিগিলঃ কানা। হুল মাহারে কিরিয়ৗ হাতাও কাতেগে আয়মা আঁদোড়িয়ৗ সাঁওতা লৗগিত্ক আঁদোড় দাড়েয়াকানা। তেহেঞ সিধু-কানু দাড়েতেগে সান্তাড়ি পৗরসিতে লাতার থক্ খন চেতান থক্ ধৗবিচ্ বিরদৗগাড় করে অলঃপাড়হাও চালুঃ কানা। সিধু-কানু ঞুতুমতে হর ডাহার খন এহব কাতেৎ আয়মা গাঁওতা , পুঁথি গাদান, বিরদৗগাড়, কলেজ, ইউনিভার্সিটি রেনাঃ ঞুতুমক দহওয়াকাদা। নওয়াক মুদ্রে অৗডি আয়মাগে হুল মাহারে কিরিয়ৗ হাতাও কাতেগে হুয় আকানা মেনতে আয়মা গৗখুড়িয়ৗকোগেক রড় আকাদা। হাপেন দিন রে আরহঁ হুলমাহারে কিরিয়ৗ হাতাও কাতেগে আঁদোড় লৗগিৎ আয়মা সাঁগে আঁদোড়িয়ৗকো লাহা হিজুঃআ মেনতেক উমৗন এদা।
আয়মা হড়াঃ কাথাতালা খনগে রাকাপ্ হিজুঃকানা নিৎ ধৗবিচ্তে ৩০শা জুন হুলমাহারেগে মিৎ মাত্র সান্তাড় হড়-হপনাঃ জুমিদ্–দাড়ে লাঠা মেনাঃআ। আর বাংখান বাং অলরে, বাং ধরমরে বাং আরহঁ এটাঃ করে। মেনখান ১৮৫৫ সাল তায়ম তেহেঞ ১৬৬ সেরমারে তিঁগু কাতে নেশাঃ হুল মাহা মানাও আর বাং মানাওতে নাসেনাঃ হলোও চেৎ জুমিদ্ দাড়ে বাং রাপুদ্ এনা? তেহেঞ আয়মা চুনিয়ৗ-মুনিয়ৗগে কুক্লিক রাকাপ্ এদা। অজেদ যাঁহাগে তাঁহেয়েন। তেহেঞ হুলমাহা বাং মানাও কাতেৎগে চেৎ সান্তাড় হড়-হপনাঃ জুমিদ্ দাড়ে ঢের দাড়েয়াঃআ ? কুক্লিদ হড়াঃ তাঁহেন কান গেয়া। যাঁহারে অ-আদিবাসীক সান্তাড় হড়-হপনাঃ জুমিদ্ দাড়ে রৗপুৎ লৗগিৎ সিঞ-ঞিদৗক ছুটৗও আকানা। নেশাঃ হুলমাহারেনাঃ মানাও আর বাং মানাও চিতৗর ঞেলতে উনকুক বৗড়তি অক্সিজেন বাংক ঞাম কেদাতো ? নঃঅয়ত ঞেল এনা হুলমাহা মানাও মুচৗৎ সাঁও সাঁওতে মানবাজার কাদ্লাগোড়া আতোরে সিধু-কানু মুঠৗনক রৗপুদ্ কেদা অকয় চং ?
নঁতে সোস্যাল মিডিয়ারে সিধু-কানু রেনগে বংশধর রামেশ্বর মুরমু অ-আদিবাসীয়াঃ তিতে গচ্ অচ আকান খৗতির অনা ঘাঁরঞ্জ রেনগে মানতান মন্ডল মুরমু মিৎ ধরনা মঞ্চ খনে বাঁখেড় লেদা বাংমা নিৎ ধৗবিচ্ রামেশ্বর মুরমু রেন দোষী বাংক পাক্ড়াও আকাদেয়া আর প্রশাসনিয়ৗ হঁ চেৎ গড় বাংক ঞাম এৎ খৗতির নেশদ নোওয়া হুলমাহারে নঁডে আলে সিধু-কানু মুঠৗনরে বাহামালা বাংলে আরাওআ আর অকয় নেতা, মন্ত্রীহঁ বাংলে আরাও অচ আকোওয়া, এমন চেৎ প্রশাসনিয়ৗরেন হড় হঁ বাং। সাঁওতে পনৎরেন হড়ঠেন নেঁহর হঁয় দহ লেদা নেশদ হুলমাহারে সিধু-কানু মুঠৗনরে বাহামালা বাং এম রেনাঃ কাথা। মেনখান হুলমাহা সুরঃ সুরঃ মানতান মন্ডল মুরমু গম্কে সোস্যাল মিডিয়ারে মিৎ ভিডিও তালাতে দিশম হড় ঠেন নেঁহর এ দহয়েদা বাংমা আলে নিৎ ছুঁৎ আকান খৗতির নেশদ সিধু-কানু মুঠৗনরে বাহামালা বাংলে আরাও এদা আর আপেহঁ নেশদ হুল মাহারে সিধু-কানু মুঠৗনরে বাহামালা আলোপে আরাওআ। নোওয়া ভিডিও সোস্যাল মিডিয়ারে তামাম হড়-হপনক ঞেল আকাদা। আর নোওয়া ভিডিও ঞেল কাতে মিৎ-বার মিডিয়া আর গাঁওতা কহঁ নোওয়া কাথা অৗডিজোর পরচারক ধুরৗও এনা। মেনখান দিশম হড়দ নেঁডা মাহারেগে হুলমাহাক মানাওকেদা যাও সেরমা রেনাঃ নেয়াম লেকাতেগে। তবে নেশদ কোভিড-১৯ খৗতির আর যাঁহান সাপ্ড়াওকদ অনকা মাছা বাং ঞেল আকানা। অজে লেকাতে আয়মা গাঁওতা গেক লৗলৗই কানা বাংমা হুলমাহা মানাও তালাতেগে বৗঈরি সালাঃ লৗড়হৗই হোয়োঃআ। আয়মা হুলমাহা মানাও আখড়া খনগে রামেশ্বর মুরমু রেন দোষী শাসেৎ ঞাম রেনাঃ দাবিক রাকাপ্ আকাদা। আয়মা হড়াঃ কাথা বছর সেরমারে হুলমাহা বাংক মানাও লেখান সামাংরে ঞুৎ গেক ঞেলা।
মানতান মন্ডল মুরমু গম্কে ছুঁৎ রেনাঃ যাঁহা কাথায় রাকাপ্ আকাদা। মেনখান আবো সমাজ নংকান শরেস সাঁওতা কানা সামাং রে যাঁহান সৗগুনান কৗমি দারায় কান খান, ছুঁৎ-দ মিৎ দিন তেহঁ মেটাও গানঃআ আর বাংখান মিৎ বছর তায়ম হঁ পারম লেখান চেৎ আনাটগে বৗনুঃ আকাদা মেন্তে আয়মা গৗখুড়িয়ৗকো সদর আকাদা। অনাদ অনকান অজ্ লেকাতে বাংক ঞেল্ ঞামেদা মেন্তেহঁ বাডায় আকানা।
তবে চেৎ সিধু-কানু বংশধর রেন হড় চেতান আর যাঁহায়কো রাজনীতিয়েদা ? সিধু-কানু বংশধর রেন হড় সামাংরে দহ কাতেৎ আর যাঁহায়কো রাজনীতি রেনাঃ ফায়দা বাংক রাকাপ্ লৗগিদঃ কানা ? সে বীরবান্টা সিধু-কানুওয়াঃ ৩০শা জুন হুল মাহা ঠাঁওরে আর যাঁহায়কো সগে বলন রেনাঃ কুক্মুক ঞেল্ এদা ? নিৎ নংকান কুক্লিদ তামাম হড় গৗদেল খনগে রাকাপ্ হিজুঃ কানা।
.webp)
