আঁধাপৗতিয়ৗও আর নাহাঃ জিয়ন
-সুরেন্দ্রনাথ মান্ডি
আঁধাপৗতিয়ৗও দ পৗহিল হঁ তাঁহেকানা নাহাঃ হঁ মেনাঃ গেয়া। সানাম মৗনমি কোওয়াঃ মনেরেগে যাঁহানাঃ বাং যাঁহানাঃ চেতান রে আঁধাপৗতিয়ৗও দ তাঁহেন গেয়া। যাঁহা, বৗড়িচ্ রীতি-রেওয়াজ সে ভুল পৗতিয়ৗও খন জানামঃআ অনাগে আঁধা পৗতিয়ৗও দ। নোওয়া রেনাঃ রেহেৎ দ মনে ভিতরি রেগে। আয়মা কগে যুক্তি সে পরমান রেনাঃ ধার বাং ধারাও কাতে যাঁহানারে পৗতিয়ৗও কো দহয়া । নোওয়া বেগর পরমান ,যুক্তি বাং মানাও,মেনমা মনে –জিউয়িরে সুচ্ সুৎরুচ্ খঁদরঁদ বেগর রীতি-রেওয়াজ পালাও গে আঁধাপৗতিয়ৗও দ।
মৗনমি জিউয়ি অতমন তায়ম ভুল উনুইহৗর খন, মনে লেঁগ্ড়চ্ খন,নিছক আবেগ খন জানাম লেনা আঁধাপৗতিয়ৗও; যেলেকা তায়ম সেন খন হহ, চিরচিটিচ্ রাঃ, অৗছিম, গ্রহ-নক্ষত্র বিচৗর , ডৗন বিরদৗ/ ডৗন জজম এমান রে মৗনমি কোওয়াঃ পৗতিয়ৗও মেনাঃ আ। সৗগুন-অসৗগুন মাহাক ঞেল কাতেৎ মৗনমি কৗমি রেকো আঁড়গোনা, এনতেৎ ওন কোওয়াঃ মনেরে বতর নংকা বল’ তাঁহেনা যে ওনকো দ যাঁহান যুক্তি বাংকো মানাও লৗগিদঃআ।
গেয়ান মেনমা শিখ্নৗত্ মৗনমি কোওয়াঃ বে-বাডায়ে লাগা সাহায়া। বাং বাডায় গে ঞুতৗত্ দ। শিখ্নৗত্,অনা ঞুতৗত্ খন মৗনমি মনে রেয়াঃ কুচিত্ এ ফায়লায়া। ধরম রেয়াঃ আঁধা, আঁধাপৗতিয়ৗও রেয়াঃ আর মিৎ ঞুতুম। আসলরে ধরম দ হোয়োঃ কানা করম, কৗমি তেয়াঃ। শিখ্নৗত্ আন মৗনমি জৗতপাত,ছঁওয়ৗছুত, তাপাম-খৗপৗরি, ভেপেগেৎ হৗপিৎ অচয়াকো।
আঁধাপৗতিয়ৗও দ মৗনমি কোওয়াঃ মনেয় ভোতড়োয়া, লাহান্তি ডাহাররেয় জানুমাঃআ। সাঁড়েশ রেয়াঃ নাওয়া নাওয়া সিরজন কেরমে কেরমেতে আদিম মৗনমি কো ধিরি ঢঁডর ঞুৎ - জিয়ন খন বাহ্রে মারশাল-জিয়নতেয় সোতোঃ আকাৎ কোওয়া। সাঁড়েশ বুরধিগে মৗনমি কোওয়াঃ অন্তর রে কেটেজ্ দাড়েয় সিরজৗও দাড়েয়াঃআ। নাহাঃ মানমি দ অৗডি বেশি যুক্তি-বুরধি চেতানরেক টেঁহাড়ঃআ। যাঁহাদ সৗরিয়াঃ, অনা আপনার রেনাঃ মানসিকতা নাহাঃরেন মৗনমি কোওয়াঃদ অৗডি বৗড়তিয়া। নোওয়া মানসিকতা দয় তেয়ারা সাঁড়েশ সেচেৎ।
মেনখান ,নিৎহঁ আবো সমাজ রেদ অ-শিখনৗত্ অৗডিগে মেনাঃ আনাং, অনাতে আদিবাসী জিয়ন রে নিৎহঁ আঁধাপৗতিয়ৗও দ মেনাঃ আকাৎ গেয়া। নোওয়া আঁধাপৗতিয়ৗও কদ লাগা ডিগ্লৗও রেয়াঃ লৗক্তি মেনাঃ আনাং – এন্ডেখান সমাজ , দিশম রেয়াঃ লাহান্তি হোয়োঃআ মনে-জিউয়ি খন আঁধাপৗতিয়ৗও বাং সাহা দাড়েয়াঃ খান মৗনমি তিসহঁ সৗরিন মৗনমি বাংকো হোয় দাড়েয়াঃআ; বাংকো দাড়েয়াঃআ সমাজ ,দিসম রেয়াঃ বুগি কৗমি; খান সমাজ,দিসম দ তায়মঃ গেয়া।
.webp)
