(হুডিঞ মাছা কৗহ্নি)
অক্তরেনাঃ পৗরিরে
-বীরসা কিস্কু
ঞুতুমতায় দ লখিন্দর সরেন, সানাম হড়গে খাটো মাছাতে লখী ক মেতায়া | পানমুনি আর লখীয়াঃ কলেরে , কড়া গিদৗর আঁশতে , ঞেল্ ঞেল্তে পোনয়া কুড়ি গেক হুয় এনা | অন্তর জিউয়িরে দুক হবর কাতে গে মনে মনেতে কিরয়ৗ কেদায় " নুকু গে হড় লেকা হড় ইঞ বেনাও কওয়া, নুকু গে ইঞরেন কড়া গিদরৗ”।
আতো দিশমরেমা মিৎ বেড়া হঁ জম ঞু বাং কুড়ৗঃ আর নতে পো-পোনয়া গিদরৗ | গিদরৗ আ অৗখির উইহৗরতে ঘেঁট পটম দিপিল কাতে তাড়াম কেদায় নামাল দিশমতে, যাঁহালেকা রেঁহ নামাল দিশম রেদ বারমাস গে কৗমি কুড়ৗই ঞাম আ | দিন দিনতে মিৎলেকা অন্তেরেগে গিরৗবাসী উতৗর এনায় |
বৗই বৗইতে অক্তরেনাঃ ঘৗইরে জিয়ন রেনা চরকা দ,অৗচুর এনতে, মারাং মৗই দ গেলবার চানাচ পারম কাতেৎ আতো রেনাঃ ইতুন আসড়ারেন মাচেতানি লেকাতেয় বহাল এনা | হুডিঞ কঁহ মারাং দৗই আ আয়োর সুতুঃরেগে ক সুতুঃ আকানা |
লালচিয়ৗ মৗনমি মনে এসেল উসুল রুপ গুনতে সরেশ ক ঞেল লেক খানগে বাহু কিমিন রেয়াঃ কাথা ক জড়াও আ | লখী দ সৗগুন কাথা কদ বায় আতাং দারাম আকাদ তে তাড়াম পিছি রড় আঞ্জম হুয় আকান তায়রেঁহ, আচ্ দ জিয়ন লৗড়হৗয়রে বুঁদগে মেনায়া |
আয়ো বাবা আ মলংরেনাঃ দাঃ ঞেলতে আর মারাং দৗই আ উদগৗওতে হুডিঞ কদ সানাম গে মিৎ মিৎ তে সরকারাঃ মৗন মৗচি ক হামেট আনা । সানাম গিদরৗগে আপনার জাঁগাতে ক তিঁগু কেটেচ্ এনতে লখী দ মনে মনেতে মেন এদায় তিহিঞ ইঞ পোনয়া অড়াঃ রেনাঃ পোনয়া মারসাল বৗতিঞ জেরেদ কেদা , নওয়া পোনয়া অড়াঃ রেয়াঃ মারসাল এলাং আরহঁ পোনয়া অড়াঃ এ আরসাল আ, নংকাতেৎ গে মিৎ দিন সাঁওতারেয়াঃ সানাম অড়াঃরে সেচেদ রেয়াঃ বৗতি তে ডিগ্ডিগ্ মারসালঃ গেয়া |
.webp)
