সানাম কোওয়াতেৎ সুঘোড় তাঁহেন রেগে নাপায় পুরিবেশ তেয়ারঃআ

সানাম  কোওয়াতেৎ সুঘোড় তাঁহেন রেগে নাপায় পুরিবেশ তেয়ারঃআ

-ডাঃ সুরেন্দ্র নাথ মান্ডি

তেহেঞদ ৫ই জুন। ধৗরতি জাকাত পুরিবেশ মাহা পালাওঅঃ কানা। অনা লাসাড়হেঁ তেগে পুরিবেশ ইদিকাতে মিৎ বার কাথা। আবো বেড়হায়তে সানাম  কোওয়াতেৎ গে পুরিবেশ দ তেয়ারঃআ। অড়াঃ সংসাররে চেৎ লেকা আয়ো-বাবা,বক-বয়হা আর এটাঃ রৗসিয়ৗকো;অনা তায়ম পাড়া-পুড়শি,সমাজ-নোওয়াক সামাজিক পুরিবেশ; আর  প্রাকৃতিক পুরিবেশ- মেনমা আবো বেড়হায়রেন জিব-জিয়ৗলি,দারে-নৗড়ি, জিন্তি-পিপিড়ি,হয়-সিতোং-হাসা-দাঃ, মিৎ কাথাতে ধৗরতি জাকাত নাপায় তাঁহেলানরে পুরিবেশ দ নাপায় তাঁহেনা।

তেহেঞা গাল মারাওদ “বাস্তুতন্ত্র(Ecosystem) আর “বিশ্ব উষ্ণায়ন”(Global Warming) ইদিকাতে। নোওয়াকিন চেতান গৗহির বাংবোন মেৎ লুতুরাঃ খান ধৗরতি পুরিরেন সরেশ জিব মৗনমি কোওয়াঃ তাঁনাহেন (Existance) দাঁওগে নিপুজ্‌ চাবা উতৗরঃআ।

আবোওয়াঃ মুড়ুৎ পুরিবেশ দ জৈব বৈচিত্র্য (নানা হুনৗর জিউয়িক) আর বাস্তু বৈচিত্র্য (হয়-হাসা-ধিরি-দাঃ এমান) ওয়া্তেৎ তেয়ারাকানা। অনাতে জৈব আর বাস্তু বৈচিত্র্য বাং তাঁহে লেনখান আবোওয়াঃ পুরিবেশ রেনাঃ অস্তিত্ব উইহৗরগে বাং গানঃ আ। আয়মা লেকানাঃ সিরজন –ধাসাও- যেলেকা ভুংচাল, বানভাসি, সেঁগেল দাঃ বুঁবুক, সেঁগেলতে বিরবুরু-দারে নৗড়ি-জিন্তি পিপিড়ি লতরজ্‌ আর দূষন খৗতির ধৗরতিপুরিরেয়াঃ বাস্তু বৈচিত্র্যগে পালাটঃ কানা।  পালাটঃ কান বাস্তু বৈচিত্র্য তালারে বাঁঞ্চাও তাঁহেন লৗগিৎ পুরিবেশ মৗনমিয় এমাকাৎ কোওয়া জৈব বৈচিত্র্য। ধৗরতি পুরিরে যাঁহাতিনৗঃ জৈব বৈচিত্র্য ক তাঁহেনা উনৗঃগে তাঁহেনা পিরথিমি, মেনমা ধৗরতি পুরিরে মৗনমি কোওয়াঃ বাঞ্চাও তাঁহেন রেনাঃ সম্ভাবনা।

জৈব বৈচিত্র্য মেনাঃ খৗতির আবো সানাম লেকান জমাঃ ঞুওয়া বোন ঞামেদা। নানাহুনৗর রান-মুরগান তেয়ারতে জৈব বৈচিত্র্য রেয়াঃ এনেম দ অসাম্ভেড় গে।  জৈব বৈচিত্র্য , বাস্তু বৈচিত্র্য মেন দ বাস্তুতন্ত্র বজায় বাং তাঁহে লেন খান মৗনমি নাতাগে মিৎ দিন হি্লোঃ বোন মারত চাবা দাড়েয়াঃআ।

ধৗরতি পুরি তেহেঞ আজারতে কৗরিঘাম চাবাওয়াকানা। আজার দ ধৗরতি পুরি  দিন কে দিন লল ইদি কানা, যাঁহাদ  “বিশ্ব উষ্ণায়ন”ক মেতাঃ কান। নোওয়া রেন দৗয়ি দ মেনখান মৗনমি কগে। “বিশ্ব উষ্ণায়ন” রেন দৗয়ি কদ কার্বন ডাই অক্সাইড, মিথেন, নাইট্রাস অক্সাইড, জলীয় বাষ্প, ক্লোরোফ্লুরোকার্বন এমান এমান গ্যাস ক। নাহাঃ অৗডি বৗড়তি  কয়লা,খনিজ সুনুম এমান এমান জীবাশ্ম (Fossil) বেওহারতে আয়মা আয়মা কার্বন ডাই অক্সাইড হয়রে মেশাঃ কানা।  নতে বিরবুরু,দারে নৗড়ি বোন উজৗড়েৎ খৗতির তেঁহ জৗসতি কানা কার্বন ডাই অক্সাইড রেনাঃ পুরিমান। বৗড়তি জীবাশ্ম বেওহারতে সেয়া-সিঁড়িচ্‌ খন আয়মা আয়মা মিথেন গ্যাস হয়রে মেশাঃ কানা। ফলন বাড়হাও অচয় খৗতির নাইট্রোজেন লেকানাঃ সার বেওহারতেহঁ পুরিবেশরে নাইট্রাস অক্সাইড রেনাঃ পুরিমান বাড়হা কানা। এয়ার কন্ডিশনার, রেফ্রিজারেটর, কম্পিউটার, রান তেয়ার কারখানা, রং  কারখানা, ইলেকট্রনিক্স বিরিৎ রেরাঃ বৗড়তি বেওহার অজতেহঁ হয় রে ক্লোরোফ্লুরো কার্বন গ্যাস রে্যাঃ বাড় বাড়ন্ত হোয়োঃ কানা। 

'বিশ্ব উষ্ণায়ন' খৗতির বরফ ঢিপ গালাও কাতে সৗমুদ দাঃ চেড়েমঃ কানা। সামুদ নৗই আড়ে পাসে হঁ ডুবুজঃ লৗগিদঃ কানা। আর নংকাতে আয়মা আয়মা জিনটি পিপড়ি, চেঁড়ে চিপরুৎ্ন, দারে নৗড়ি, জিব জিয়ৗলি, আর জাও ফসল এমান মা্রখু মারাঃ আ। দে নোওয়া ক খন সতর রেবো তাঁহেন মা।