সুগী

(হুডিঞ মাছা কৗহনি)

সুগী

জ্যোৎস্না সোরেন

মঁড়ে গেল উমেরান অৗপিস রিনিচ মারাংসাহেবাঃ মনেকদ সলঃ বকঃ আকানা তেহেঞ পে পোন চান্দো লেকা লকডাউন খৗতির ৷ তিরি জুরী তায় আচকাগে হানাপুরীয়েন খানেয় অৗডি হারকেৎতে বেটা সুধীর দয় হারালেদেয়া ৷ আদ নিতদ হপনতেৎ সাঁগিঞ নাগার রে চৗকরিয় ঞাম কেৎ খান,আড়াঃ ডৗংরি লেকাগে দিনকয় বিতৗও এদা৷ উন অক্তগে, বাংদ গাতে উরৗলতে, বাংদ আপনার গরজতে, মারাং বাজার রেন "ঞিদৗ দুলৗড়িয়ৗ" কঁহয় আপনারকেৎ কওয়া ৷ লকডাউনরেনাঃ বাজার রে, বানগাডা দাঃ লেকাগে মনেদ কামসাও গদঃ কানা উনকু "পেড়া হড়ঠেন"৷  জিওয়ীরে বতর,মনেরে তেতাং অনে উন অক্তগে উইহৗর গৎ কেদায় পে পোন সেরমা লাহা পুরুলিয়ৗ ইদি কাতে আনন্দবাজার রে উছৗন লেন মিৎ হেডিং "পুরুলিয়ার সাঁওতাল রমনীর উদ্দাম যৌবন আপনাকে ডাকছে"৷

মারাং বাজার রে দিন দিন করোনা আজার রুগীক বৗড়তি ইদিঃকানা ! খৗনিক শাহার খন সৗগিঞরে,খৗনিক দ বুরু লধাম রেনাঃ হিসিৎ হয়রে হড়ম জিওয়ীক রেয়াড় লৗগিৎ মারাং সাহেব দ "মাঠাবুরুরেনাঃ হোম স্টে রে বার চান্দো গান তাঁহেন এ গটা কেদা ৷  "আপারড্যাম ,লোয়ার ড্যাম, খয়ের বেড়া..আযোথিয়ৗ বুরু রেনাঃ পৗরকিত, আর অনে আনন্দবাজার রেনাঃ..চুকু দানাং ঈশৗরা ৷ বুরু ধাসনা রেনাঃ রেয়াড় ঝারনা  লেকাগেয় গৗউচ আয় কান তাঁহে ৷৷

মাঠাবুরু লধাম রেনাঃ হর তে দিনৗম গে খৗচ্ খৗচ্ লান্দা লান্দাতে নন্ডেরেন কুড়ি ক সাহান,সাকাম দিপিল কাতে ক পারম চালাঃ আ ৷ লিঙ্গি আড়গোন ঝারনা দাঃ লেকাগে  উনকুয়াঃ চালাও হরসেৎ কয়ক কাতে লুটিকয় মেলৎ বাড়ায়া মারাংসাহেবদ ৷ ঝতখন লাহারে সাহান বঝায়াতে দৗড় আকাৎ কুড়ি ঞেলতে মারাং সাহেবাঃ মঁড়ে গেল বছর রেনাঃ উমের হ উদগৗর গদঃআ ৷ অৗয়িচ চাকর রৗমু ঠেনে বাডায় কেদা বাংমা উনিদ সুগী ৷ অনে বুরু লধাম আতোরিনিচ কুড়ি ৷

পে পোন দিন তায়ম৷ সেতায় ইসিড় আকাৎ লেকা সিতুংতে ধুয়ৗধুয়ৗ ঞেলঃ কানা যাঁহাসেৎ গেম কয়গ৷ সাহান বঝায়াতে হানেফানে দৗড় হিজুঃ কানায় সুগী ৷ লাহা তায়ম অকয় হ বৗনুঃ কওয়া ৷ রৗমুহঁ ইসিন বাড়া কাতে আক অড়াঃ এ চালাও আকানা ৷ অৗটুপৗটু অড়াঃখন ওন্ডোক কাতে হরধারে রেনাঃ রহড় গাডারে মারাংসাহেব দ তৗঙ্গি তাড়াঃ এনায় জিয়ৗলি লৗগিৎ ৷ অক্ত সেটের তরা,দৗড় পারমঃকান সুগী চেতানরে তৗরুব লেকায় দন ঝাম্পায়েনা ৷ চেৎরে চিকৗয়েনা বুজ লাহারেগে শিকৗরিদ কড়ামরে জেম্বেৎ রেনাঃ এ চেষ্টা কেদা ৷ মেৎ সামাংরে তৗরুব চিনতে হড় ঞেলকাতে বতরতে লুকুৎ লুকুৎ সুগীদ  মারাংবুরু জাঁহের আয়োয়াঃ ঞুতুম ঞুম কাতে ডান্ডারে ঠেমেৎ হৗসুয়ৗ ওন্ডোক কাতে দাড়ে জোরতে ডান্ডারেয় বৗয়সৗও আদেয়া ৷ জিয়ৗলি পুচুচ হচ রেনাঃ হাসো,আর ডান্ডা রেনাঃ হাসো...বানার হাসো তে লহজৗরি মারাং সাহেব হৗকরৗও কাতেয় মেন কেদা -"যতসব ভূল ভাল খবর,আনন্দবাজার রেক এমা ! পুরুলিয়ার সাঁওতাল রমনীর উদ্দাম যৌবন ত নয়, যেন বিষাক্ত ছুরির ফলা "৷৷