(হুডিঞ মাছা কৗহনি)
কুড়নি
 |
| - সঞ্জয় কুমার টুডু |
মিৎ কুড়ি গিদরৗয় তাঁহে কানা ঞুতুম তায় দ লুগু মৗই। উনি লুগু মৗই দ আডি কুড়নি গেয় তাঁহে কানা । চেৎ কৗমি গে বায় কৗমি কান তাঁহে কানা । জঃ রাচা ইসিন আর মা বাং গে, নতে জম থৗরি হঁ বায় ঘাসাও এৎ তাহেঁ কানা। অনাতে লুগু মৗই আজ আয়ো বাবা দ অৗডি উইহৗর ভাবনা রেকিন পাড়াও আকানা। কুড়ি গিদৗর এ হারা জুয়ৗন এনা। আর নতে চেৎ কৗমি গে বায় ঢং আনা। নাওয়া পেড়া ক হিজুঃ কান রেহঁ ভরসা কাতে বাং কিন হাতাও দাড়েয়াকো কানা। চেদাঃ সে হাপেন দিন অৗকিন গে কাথা আঁজম লাগাও কিনৗ। তিন দিন আদ নংকা কিন উকু বাড়ায়েয়া। নাওয়া পেড়া কিন হেঁ আদ কোওয়া। বাপলা কৗমি জত ফার্ম এনা, লুগু মৗই জাঁওয়ায় অড়াঃ তেয় চালাও এনা।
বাপলা কাতে অৗডি দিন পারম চালাও এনা। লুগু মৗই আজ আয়ো বাবা দ হিরি হঁ বাং কিন চালাও আকানা। নতে সহরায় সেটেরঃ কানা । হপন এরা জাঁওয়ায় গংকে নেওতা ক হুয়ুঃ আ। লুগু মৗই আজ বাবা দ বতর বতর তে নেওতায় চালাও এনা। চেদাঃ বায় বতরঃ আ লুগু মৗই আঃ কুড়নি কাথা ক আঁজম আয়া। অনাতে লুগু মৗই আজ বাবা দ আয়ুব আয়ুব এ চালাও এনা। মনে তেয় মেন এদা তেহেঞ আয়ুব জাঁহালেকাতে আংগা কাতেদ সেতাঃ রেয় রুওয়াড়া। কাথা আঁজম হঁ কৗটিজ কমঃ আ। এন হিলোঃ দ কিদুব বাড়া কাতে ক জৗপিদ কেদা ।
দসার হিলোঃ দ লুগু মৗই আজ বাবা দ বেরেদ বাড়া তে বৗসয়ৗম গদ এনা। বেরেদ অডক কাতে এ হাহাড়াঃ এনা। ঞেলেয়ায় লুগু মৗই দ তিন রেচ বেরেদ কাতে জঃ রাচা, ছচ্ ছড়া কাতে ইসিন এ ধুরৗও আকানা। একলা তে অড়াঃ রেয়াঃ জতয় কৗমি কানা । লুগু মৌই আজ বাবা আর হঞহার তেৎ দ দৗতৗনি সাওতে তুপুন এ মেতাদ কিনৗ। তুপু হেজ এন তেকিন জিল উতু থাকায় সুরাদ কিনৗ। জম বাড়া কাতে কিন জিরৗও আকানা। উন রে লুগু মৗই হঞহার তেৎ এ মেন এদা--- বাড়ায় আপে হও বালাকড়া আপে দ হপন এরা দ বাং অড়াঃ লখি পে এম আকাদ লেয়া। লুগু মৗই আজ বাবা দ অনা আঁজম কাতে অৗডি জোর তে গরব এ বুঝৗও এদা। বিদৗ মাড়াং জাঁওয়ায় গংকে তেৎ বাহরে সেন হহ অডক কাতে এ কুলিয়ে কানা--- জাঁওয়ায়, হপন ইরৗঞ দ চেদ রান বেন কটেজ আকাদেতে সঝে আকানায়? আলিঞ হঁ লৗয় আলিঞ বেন হানহারমে লিঞ কটেজ আয়া। জাঁওয়ায় গংকে মেন কেদা--- এ বা আবেনাঃ অড়াঃ রে জাঁহা গে মারেনাঃ মেনাঃ আ অনা ক জত সারাও আগুয় বেন তার পর লিঞ লৗয় আবানা।
লুগু মৗই আজ বাবা দ অড়াঃ রুওয়ৗড় চালাও কাতে মিৎটাং ডাংরা গৗডি রে রৗপুদ আঃ হাসা টুকুজ চেলাং ক লাদে কাতেদ কুংকৗল অড়াঃ তেয় ইদি কেদা। অঁডে ক মেতায় কানা নোওয়া কদ মারে আকানা সারাও বাং গানোঃ আ। আগু রুওয়ৗড় কেদ তে জাঁওয়ায় গংকে ঠেনে চালাও এনা। আর এ মেতায় কানা জাঁওয়ায় বাং কো সারাও লেদা, মেন এদা ক নোওয়া কদ মারে আকানা সারাও বাং গানঃ আ। উন রে জাঁওয়ায় গংকেয় মেন কেদা--- হৗনহৗরিঞ হঁয় মারে আকানা আদ বায় সঝেঃ আ।
.webp)
.webp)
