আবোওয়াঃ ওয়েব পেজ : ৩০ শা জুন হুলমাহা লেখা লেখা আর পে মাহা মেনাঃআ। হুলমাহা মানাও রেনাঃ সৗহি-জুহিহঁ মুচৗৎ হররে। পনৎ পাহ্টা করে খনহঁ হুলমাহা মানাও লৗগিৎক সাপ্ড়াও আকানা। নংকান তালারেগে সিধু-কানু রেন বংশধর রামেশ্বর মুরমুওয়াঃ জিউয়ি বৗঈরীয়াঃ তিতে চালাও আকান খৗতির আর অনারেন কৗয়ধি নিৎ ধৗবিচ্ বাং পাকড়াও আর শাসেৎ বাং ঞাম খৗতিরগে সিধু-কানু রেন বংশধরক সান্তাল পরগনা ভগ্নাডিরে নেশ নোওয়া ৩০শা জুন হুলমাহা বাংক মানাওআ। সিধু-কানু রেন বংশধর কোওয়াঃ সাগুন মাহা রেনাঃ মিৎ ধরনা মঞ্চ খন বাডায় আকানা বাংমা নিয়ৗ হুলমাহা হিলঃ অকয় রাজঅৗরিরেন নেতা,মন্ত্রী,জিলৗ প্রশাসনিয়ৗগে সিধু-কানু মুঠৗনরে বাহামালা বাংক আরাও অচওয়াকোওয়া। সাঁওতে পনৎ রেন হড় ঠেনহঁ অকারেগে নেশ ৩০শা জুন ,হুলমাহা বাং মানাও রেনাঃ অৗরজিক দহওয়াকাদা।
অনা ধরনা মঞ্চ খনগে সিধু-কানু বংশধররেন মন্ডল মুরমুওয়াঃ কাথা খন বাডায় আকানা যে পোস্টমার্টম রিপোর্ট লেকাতে রামেশ্বর মুরমুওয়াঃ হড়মরে অৗডি ঢের অ্যালকোহল ঞাম সে অ্যালকোহল ঞু খৗতির গে নংকা হুয় আকানা। মেনখান ঘারঞ্জরেন হড়াঃ দাবি রামেশ্বর মুরমুওয়াঃ মেৎ-মুখৗনরে মায়াং চিনহৗ তাঁহে কানা আর লুতুর খনহঁ মায়াং উডুক লেন তায়া। অনাতে নোওয়া পোস্টমার্টম রিপোর্টতে ঘাঁরঞ্জরেন হড় সন্তষ্ট বানুঃ আকাদ কোওয়া মেন্তে বাডায় আকানা। মন্ডল মুরমুওয়াঃ কাথারে আরহঁ রাকাপ্ হেচ্ আকানা বাংমা রামেশ্বর মুরমুওয়াঃ নোওয়া গচ্ ঘটন চেতানরে রাজনীতি হুয় আকানা। অনালেকাতে ঘাঁরঞ্জ পাহ্টা খন সি বি আই তলাশ লৗগিৎ দাবি হঁক দহওয়াকাদা মেন্তে বাডায় আকানা।
 |
| ধরনা মঞ্চরে সিধু-কানু রেন বংশধরক |
সিধু-কানু বংশধররেন রামেশ্বর মুরমুওয়াঃ গচ্ ঘটন ইদিকাতে সৗরিগে রাজনীতি হুয়ু কানা? দিশম তালারে কুক্লি রাকাপ্ কানা। কাথা রাকাপ্ কানা অনাতেগে তবে তেহেঞ ধৗবিচ্ সিধু-কানু বংশধররেন হড় সামাংরে অকয়গে বাংক লাহা হিজুঃকানা? নিৎ ধৗবিচ্তে বাডায় আকানা ২৫জুন হিৎ হিলঃ আদিবাসী সেঁগেল অভিযান পাহ্টা খন রামেশ্বর মুরমুওয়াঃ গচ্ ঘটন ইদিকাতে যথাৎ বিচৗর হুয়ুঃমা, কৗয়ধি পাকড়াও, আর সি বি আই তলাশ এমান দাবি তালাতে ঝাড়খন্ড, বাংলা, বিহার, উড়িষ্যা, আসাম পনৎরে অনশন রেক দুড়ুপ্ লেনা।
আয়মা হড়াঃ মচারেগে আঁজম কানা সান্তাল পরগনা রেন হড়দক চেৎ জৗপিৎ জং কানা? আরহঁ নতে তামাম ভারত দিশমরে বুরধিয়ৗন হড়দ চেৎ অভাব গেয়াক? ভারত দিশমরে আয়মা স্ংগঠন তাঁহেলেন রেহঁ অনকা মাছা আঁদোড় বাং ঞেলঃ গঃ কানা। তবে চেৎ দিশম হড়দ সান্তাল পরগনা রেন হড় ঠেনগেক লাদে গৎ কাঃ কানা? সে নতে সান্তাল পরগনা রেন হড়হঁ দিশম হড়াঃ তাঁগিরে মেনাঃ আকাৎ কোওয়া? বাডায়ঃ কানা দিশম রেন চুনিয়ৗ-মুনিয়ৗ হড়দ নোওয়া ঘটন লৗইতেদক তাওয়াঃ তারকঃ কানা মেনখান নিৎ উনকু ঠেন সুঠিক হর বানুঃ আকাদা? অকয় হর–এ উদুঃ আকোওয়া? নুনৗদিন খন হুল মাহারে সিধু-কানুওয়াঃ ভাষনক আঁজম আগুওআকাদা। দিশমরেন আয়মা হড়গে বাঁখেড়িয়ৗক মুদ্রে আয়মা বাঁখেড়িয়ৗহা হড়ম রেগে সিধু-কানুওয়াঃ লল মায়াং হেডেজঃক ঞেল আকাদা। মেনখান তেহেঞ দিশম হড় তালা খনগে কাথা রাঁওয়াঃ কানা তবে চেৎ উন মারাং মারাং ভাষন কদ মঞ্চ লৗগিৎ তেগে সাপ্ড়াও কঃআ?
নতে আরহঁ আয়মা ক্লাব, গাঁওতা সে সংগঠনক মুদ্রে আঁজমঃ কানা তবে চেৎ নেশদ ‘হুলমাহা’ মানাও আকো সে বাং ? নংকান তালামালা রেক পাড়াও গৎ আকানা। অকয়া কাথাক দহয়া? নতে যাঁহায় সিধু-কানু হতেচ্তে তামাম সাঁন্তাড় হপনা নুনৗ গরব তেঁহেঞ উনকিনরেন বংশধর গে হুলমাহা বাং মানাও রেনাঃ কাথাক সদর আকাদা। তবে চেৎ যাঁহায় যাঁহায় কদ উনকুওয়াঃ কাথা দহ কাতেগে হুলমাহা বাংক মানাওআ আর সিধু-কানু তৗকিনা মুঠৗন রেহঁ বাহামালা বাংক আরাও অৗকিনা? আরহঁ যাঁহায় যাঁহায় কদ হুলমাহা মানাও তালাতেগে সিধু-কানু রেন বংশধর গড় এম রেনাঃ কাথাক সদর এদা। আরহঁ অকয় কোওয়া রড়দ হানে তিসখন হুলমাহাক মানাও আগুয়েদা নিত্ চেৎ লেকারেক হৗপিৎ দহয়া? সিধু-কানু তৗকিনদ আকোওয়াঃ জিল-জাং-মায়াংরে আর অন্তর কড়াম তালারে ঠাঁওক এম আকাদ্ কিনৗ। নিৎ চিকৗতেক ঢাকা সাহা গৎ কৗকিনা? নংকান কাথাকগে নিৎ হয়তে হান্তে খন নতে, নতে খন হান্তে গুরলৗও বাডায় কানা। তিরেচং অকাঠেন চং থিরলৗ গদঃআ, অনাগে আয়মা ঞেঞেলিয়ৗ কদ দানাং খনগেক কয়ঃ দারাম আকাদা।
.webp)
