জামতোড়িয়ৗ “কবি সারদা প্রসাদ কিস্কু পাতা’’ নেশদ থুকুম তাঁহেন কানা

পাতা এনেচ্

আবোওয়াঃ ওয়েব পেজ : বর পাতা খন এহব কাতেৎ আযোদিয়ৗ বুরু সেঁদ্‌রা,কলকাতা মাঃ মঁড়ে লেকান আয়মা পাতা-পরব মিৎ মিৎতে থুকুম তাঁহেয়াকানা। অনকাগে জামতোড়িয়ৗ“কবি সারদা প্রসাদ কিস্কু পাতা’হঁ’নেশদ করোনা ভাইরাস (কোবিদ -১৯) আজার খৗতিরগে থুকুম তাঁহেন কানা।

বাডায় আকানা নওয়া পাতাদ পুরুলিয়ৗ জিলৗ মানবাজার-২ নং ব্লক, বোরো থানা রেনাঃ জামতোড়িয়ৗ পাতা টাঁডিরে যাও সেরমাগে ১৬ ই ঝেট হুয় হিজুঃ কানা। মেনখান নেশদ ধৗরতি জাকাত করোনা ভাইরাস ঞুতুমান মিৎ বতরান আজার হতেচ্‌তে জামতোড়িয়ৗ খেরওয়াল গাঁওতা পাহ্‌টা খন সুৎরেৎ মানতান রঞ্জিৎ মুরমু আর পারসেৎ মানতান সুশান্ত হেম্ব্রম গমকে তাকিন মিৎ চিঠি সাকাম তালাতে অৗডি দুক্‌ সালাঃ দিসম হড়কিন বাডায় হচওয়াকাৎ কোওয়া যে নেশদ জামতোড়িয়ৗ “কবি সারদা প্রসাদ কিস্কু পাতা’’ দ থুকুম তাঁহেন কানা মেনতে।

জামতোড়িয়ৗ পাতা নেশগে পৌল থুকুম তাঁহেন কানা মেনতে বাডায় আকানা। নওয়া মাড়াং সেরমাকো মিৎ লেতাড়গে নিঝঞ্জাট আর রৗস্কৗ তালাতেগে পারম হেচ্‌ আকানা। তবে নোওয়া পাতা তিস আর তিনৗ দিন মাড়াং এহব লেনা অনা লৗইদ অৗডি আঝাট গেয়া মেনতে আয়মা হড়গেক সদর আকাদা। মেনখান নওয়াদ বাডায় ঞাম আকানা যে ঞুতুমান অনড়হিঁয়ৗ সারদা প্রসাদ কিস্কু ১৯৯৬ সালরে বঁগা তালায়েন খনগে উনি উনুঊহৗরতে নোওয়া পাতা রেনাঃ ঞুতুমদ  “কবি সারদা প্রসাদ কিস্কু পাতা’’ ক ছৗটিয়ার আকাদা। আর উনখনগে নোওয়া পাতাদ “কবি সারদা প্রসাদ কিস্কু পাতা’’ ঞুতুমতে হুয় হিজুঃ কানা।

বাডায় আকানা নোওয়া পাতারে পুরুলিয়ৗ জিলৗ রেনাঃ মানবাজার, বোরো, বান্দোয়ান, বরাবাজার আর বাঁকুড়া জিলৗ রেনাঃ ঝিলিমিলি, রানীবাঁধ,খাতড়া এমান জায়গা করে খন আয়মা আয়মা ঞেঞেলিয়ৗক সহর সেটেরঃ কান তাঁহেকানা। লৗডু মিঠৗই খন এহব কাতে সাঁন্তাড়ি পুঁথি পতব দকানক ঞেল জং লেকা থারে থার সাজাও তাঁহেন কান তাঁহেকানা। মিৎ ঞিদৗ এনেচ্‌-সেরেঞ সাঁওতে ঞেল জং লেকা পাতা এনেচ্‌ হেপ্‌রাও হুয় হিজুঃ কান তাঁহেকানা।

পাতা মানেগে ঞেপেল ঞাপাম রপড় ঠাঁও। পাতা মানেগে হেও হবর গিদৗর খন এহব কাতেৎ হাড়াম বুড়হি সানাম কোওয়াঃ সেটেরঃ রেনা ঠাঁও। দাও হঁ কানা। পাতা মানাগে রৗস্কৗ চুহুল চুহুল।

মিৎ টাং সেরমা ভোর রেনাঃ পাতাগে মৗনমি মনে জিউয়ি রেনাঃ  রেঁগেচ্‌ তেতাং অৗড়িশ, কৗহিঁশ, রৗগি এমানে পাল্টাও দাড়েয়াঃআ। মিৎ টাং পাতাগে আগু দাড়েয়াঃআয় হড়াঃ হেচ্‌ হিজুঃকান জিয়নরে আর মিৎ নাওয়া রৗস্কৗ, নাওয়া দিশৗ, নাওয়া লাহান্তি। মিৎ টাং পাতাতেগে হড়ক হিড়িঞ দাড়েয়াঃআ আকওয়াঃ সানাম লেকানাঃ ভেপেগেৎ। পাতাগে মিৎ দিন লৗগিৎ রেহঁ হড়াঃ রেঁগেচ্‌ তেতাং এ মেটাও দাড়েয়াঃআ। মৗনমি জিয়নরে রেঁগেচ্‌ রাবাং ,অভাব, রুওয়া-হাসো এমান আনাট তাঁহেন গেয়া। এনরেহঁ অনা তালারেগে মৗনমি বাঁঞ্চাও রেনাঃ নাওয়া রাসাক ঞামা। আর অনা লৗগিৎগে হড় হপন বছর দিন রেনাঃ পাতা-পরব ক কয়ঃ হরা।

নোওয়া পাতা নেশ বাং হোয়োঃ কানা মেনতে বাডায় ঞাম কাতে সোর সোপোর রেন অৗডি ঞেঞেলিয়ৗ হড়গে মনে বৗড়িচ্‌ দুক্‌ ক সদ রেদা মেনতে বাডায়ঃ কানা।

 মিৎ টাং নেঁডা গটা ঠৗওকা বুটৗ পাতা যাঁহা অজেতেগে বাং হোয় লেনখান বৗণিজ বেপারতে যাঁহা লেকা খুতি হোয়োঃআ অনকাগে মৗনমিয়াঃ মানসিক সে মনে রেনাঃহঁ খুতি হুয় দাড়েয়াঃআ। আর অনা খুতিদ দারায় কান সেরমা তেহঁ পুরুনঃ চং বাং চং ?

নোওয়া ঞুতুমান জামতোড়িয়ৗ পাতাহঁ নোওয়া করেনাঃ সানাম রেনাঃ দাবি দহয়ায় আর অনা করেন সাক্ষী হঁ কানায় মেনতে আয়মা গাখুড়িয়ৗক লৗই সদর আকাদা।