সিঁগি মাহা রেনাঃ সাকাম ‘চেরেচ্ আড়াং’ লেখা- ১৭৪

“আবোওয়াঃ কাথা”  ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড় গে উছানঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com।     

 

তেহেঞাঃ আখড়ারে যাঁহায় কো সেলেদ্‌ আকান- ᱥᱩᱵᱩᱫᱤᱭᱟ. ᱢᱩᱨᱢᱩ, ᱨᱟ ᱢᱯᱚᱫᱚ  ᱠᱤᱥᱠᱩ , ᱠᱤᱥᱠᱤᱱᱫᱷᱟ   ᱢᱩᱨᱢᱩ,   বাড়তাং  সরেন,   সনৎ কুমার হাঁসদা,  সমরলাল টুডু,  সু রে ন্দ্র না থ  হে ম ব্র ম, দুগাই টুডু ।

  

১।।

ᱢᱮᱱᱟᱜ

ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱵᱮᱲᱟ ᱟᱦᱽᱞᱟ ᱡᱮᱲᱮᱨ
ᱫᱟᱨᱮ ᱥᱟᱠᱟᱢᱮ ᱮᱣᱭᱮᱨ ।
ᱵᱟᱹᱫᱽ  ᱵᱟᱹᱭᱦᱟᱹᱲ ᱪᱮᱞᱯᱮᱧ
ᱦᱟᱹᱲᱭᱟᱹᱲ ᱫᱷᱟᱹᱨᱛᱤ ᱥᱮᱯᱮᱧ ।
ᱥᱳᱛᱳᱜ  ᱠᱟᱛᱮ   ᱡᱤᱣᱤ
ᱢᱮᱱᱟᱜ  ᱵᱚᱱᱟ  ᱢᱟᱹᱱᱣᱤ।

ᱱᱟᱹᱭ   ᱜᱟᱰᱟ  ᱢᱩᱰᱩ
ᱟᱹᱛᱩᱜ  ᱥᱟᱰᱟ  ᱥᱩᱰᱩ ।
ᱯᱩᱸᱰ   ᱟᱨᱟᱜ  ᱦᱟᱥᱟ
ᱵᱟᱹᱱᱩᱜ  ᱨᱮᱦᱚᱸ  ᱨᱟᱥᱟ ।
ᱢᱚᱡᱽᱜᱮ ᱡᱚᱨᱚᱝ ᱡᱚᱨᱚᱝ
ᱛᱤᱱᱟᱹᱜ  ᱥᱚᱨᱮᱥ ᱨᱚᱨᱚᱝ ।

========== ᱞ ᱧ ===========

২।। 

ᱨᱮᱱᱴᱟ

ᱨᱟᱢᱯᱚᱫᱚ ᱠᱤᱥᱠᱩ

  

ᱟᱞᱮ ᱟᱛᱩ ᱨᱮᱱᱴᱟ

ᱞᱮᱠᱷᱟ ᱠᱚᱣᱟᱭ ᱠᱚᱱᱴᱟ

ᱥᱤᱢ  ᱵᱩᱥᱟᱹᱜ  ᱥᱟᱵᱽ ᱠᱟᱛᱮ

ᱛᱚᱞ ᱛᱟᱠᱚᱣᱟᱭ  ᱴᱷᱚᱱᱴᱟ  ᱿

 

ᱟᱞᱮ ᱟᱛᱩ ᱨᱮᱱᱴᱟ

ᱨᱩ  ᱟᱪᱩᱨᱟᱭ ᱜᱷᱚᱱᱴᱟ

ᱦᱟᱠᱩ  ᱥᱟᱵᱽ  ᱪᱟᱞᱟᱣ  ᱠᱟᱛᱮ

ᱞᱚᱥᱚᱫᱽ   ᱜᱮᱪᱚᱭ  ᱜᱷᱟᱱᱴᱟᱭ ᱿

 

ᱟᱞᱮ ᱟᱛᱩ ᱨᱮᱱᱴᱟ

ᱜᱟᱛᱮ  ᱛᱟᱭ ᱫᱚ ᱪᱟᱢᱴᱟ

 ᱤᱛᱩᱱ   ᱟᱥᱲᱟ  ᱵᱟᱠᱤᱱ  ᱪᱟᱞᱟᱜ

ᱫᱷᱩᱲᱤ  ᱨᱮᱠᱤᱱ ᱜᱷᱚᱞᱴᱟᱜ᱿

 

ᱟᱞᱮ ᱟᱛᱩ ᱨᱮᱱᱴᱟ

ᱠᱟᱢᱤ ᱛᱟᱭ  ᱩᱞᱴᱟᱹ ᱯᱟᱞᱴᱟ

 ᱩᱱᱤ ᱥᱟᱸᱣ ᱫᱚ ᱟᱞᱚ ᱯᱮ ᱜᱟᱛᱮᱜ

ᱟᱲᱟᱜ ᱟᱯᱮᱭᱟᱭ  ᱠᱚᱱᱴᱟ ᱿

========== ᱞ ᱧ ===========

৩।।

ᱨᱮᱵᱮᱫ ᱫᱚᱦᱚᱭ

ᱠᱤᱥᱠᱤᱱᱫᱷᱟ   ᱢᱩᱨᱢᱩ

 

 ᱟᱸᱡᱚᱢ ᱯᱮᱭᱟ ᱢᱟᱹᱭ ᱵᱟᱵᱩ ᱠᱚ

                      ᱟᱸᱡᱚᱢ ᱯᱮᱥᱮ ᱠᱟᱛᱷᱟ ,

ᱟᱭᱳ ᱵᱟᱵᱟ ᱟᱜ ᱢᱟᱱᱟ ᱫᱚᱵᱚᱱ

                   ᱵᱮᱠᱟᱨ ᱟᱞᱚᱯᱮ ᱢᱮᱛᱟᱜ᱾

 

ᱵᱟᱹᱲᱤᱡ ᱦᱚᱨᱛᱮ ᱟᱞᱚᱯᱮ ᱥᱮᱱᱚᱜ

                  ᱵᱮᱥᱟᱜ ᱵᱩᱡᱷᱟᱣ ᱛᱟᱯᱮ ,

ᱟᱹᱠᱷᱤᱨ ᱫᱤᱱ ᱱᱟᱯᱟᱭ ᱦᱳᱭᱳᱜ

                       ᱠᱩᱲᱟᱹᱭ ᱫᱚ ᱧᱟᱢᱟᱯᱮ  ᱾

  

ᱪᱩᱨᱤᱛ ᱟᱨ ᱥᱚᱵᱷᱟᱵ ᱛᱟᱯᱮ

                             ᱟᱞᱚᱯᱮ ᱟᱫ ᱟᱯᱮ ,

ᱦᱚᱲᱠᱚ ᱛᱟᱞᱟ ᱨᱤᱞᱟᱹᱢᱟᱞᱟ

                     ᱢᱟᱹᱱᱛᱮ ᱛᱟᱸᱦᱮᱱᱟᱯᱮ  ᱾

  

ᱵᱮᱣᱦᱟᱨᱨᱮ ᱥᱟᱹᱜᱟᱹᱭ ᱟᱛᱮ

                     ᱟᱞᱚᱯᱮ ᱨᱚᱲᱟ ᱡᱩᱫᱟᱹ  ,

ᱵᱟᱝᱠᱷᱟᱱ ᱩᱱ ᱠᱚᱭᱚᱜ ᱠᱟᱛᱮ

               ᱢᱮᱛᱟᱯᱮᱭᱟ ᱠᱚ ᱫᱩᱸᱫᱷᱟ  ᱾

  

ᱚᱞᱚᱜ ᱟᱠᱤᱞ ᱞᱟᱥᱮᱨ ᱦᱚᱫᱟ

                      ᱚᱠᱚᱛ ᱥᱟᱞᱟᱜ ᱛᱮᱜᱮ ,

ᱚᱞᱚᱜ ᱵᱮᱜᱚᱨ ᱡᱤᱭᱚᱱ ᱟᱰᱤ

                    ᱠᱟᱲᱟᱝ ᱧᱩᱛᱟᱹᱛ ᱨᱮᱜᱮ  ᱾

  

ᱫᱷᱟᱨᱛᱤ ᱛᱟᱞᱟ ᱡᱤᱣᱭᱮᱫ ᱛᱟᱸᱦᱮᱱ

                ᱛᱤᱱᱟᱜ ᱟᱯᱷᱟᱜᱮ ᱧᱟᱢᱚᱜ ,

ᱨᱮᱸᱜᱮᱡ ᱨᱮᱦᱚᱸ ᱛᱮᱛᱟᱝ ᱨᱮᱦᱚᱸ

                        ᱟᱞᱚᱯᱮ ᱯᱟᱹᱪ ᱥᱮᱱᱚᱜ ᱾

 

========== ᱞ ᱧ ===========

৪।। 

ইকা

বাড়তাং সরেন

 

আতো হড় দ ছিতির বিতির 

                    বোমা অটেচ পাসির

দিশম খনাং এটাঃ দিশম 

                   রেঙ্গেচ জ্বালা খাতির ।

 

দিল্লী নাগার দলান চেতান 

                 বানিজ নাগার  মুম্বাই

তালা ডাহার ইটা দিপিল 

                   পুনে কাশ্মীর চেন্নাই ।

 

জায়গা জমি বাইদ বায়হাড়

                     গড়ম বাবা বিদাল 

একেন খাদান ধিরি হাঙর 

                 অকর নাহাঃ বিদাল !

 

ঝাক্ ঝাকাঃআ নাপায় বাখোল

                    আতো বাড়গে লাতার

লাংটা গিদার হড়মো ভুটুং 

                    গোটা আতো আতার।

 

হাসা বানুঃ দাকা বানুঃ 

                     চেকা তেকো বাঞ্চাঃ 

কামি বানুঃ খাতির তেগে

                 নালহা তেকো বাঞ্চাঃ ।

 

ধরম রেনাঃ পরবপালি

                  চেকা তেকো পালাও

ভিটে হাসা এড়ে খাতির

                হুড়ু চেকায় আরজাও !

 

 এরা উরু আয়োবাবা 

                       রুয়া রেঁহেঁ রেঁহেঁ

সাঙ্গিঞ দিশম বাবু দ হায়

                     হিজুঃ মেনেৎ তাঁহেঁ।

 

অড়াঃ ভিটা মিহু মেরম

                     মি-মিৎ তেকো চাবাঃ 

যথাথ কাথা লাই লেখানে 

                     বান্দুক টুটিয় হাবাঃ ।

 

ফুরগাল আকান জানাম দিশম

                     তিস্ রে হানে সেদায়

বাবু কওয়াঃ জাঙ্গা লাতার

                অকয় বাঞ্চাও কওয়ায় ?

 

মিৎদিন হালে আচুর গেয়া 

                      মলং রেনাঃ চাকা

রেঙ্গেচ হড়াঃ তিরে চাবুক 

                   ঞিরেম আম দ অকা !

 

হাজার হাজার সেরমা রেনাঃ

                  বাড়িচ আঙ্গজ কাতে    

উন দ ইকাম খজঃগেয়া 

                     কাটা হাড়ুপ কাতে !

========== ᱞ ᱧ ===========

৫।।

ইদৗল বাহা

সনৎ কুমার হাঁসদাঃ

              বাড়গি সিমৗ ইদৗল দারে;
              বাহা আনাম হারে - ফারে!

              ঞেল তে মাসে তিনৗঃ মজ;
              দাঃ দাকা হঁ বাং এম খজ!

            সাজাও মেনাম লাফাং ডৗররে;
              আরাঃ গেচ থারে - থারে!

                 ফাগুন রেনাঃ হিঁসিৎ হয়তে;
                বাং এম মহ্কাঃ সঁধাড় সতে!

               এনতে রেঁহ চেঁড়ে চিপ্ রুঃ;
               হিজুঃ আক রাসা সিড়ুপ্!

             সেতাঃ বেড়া ক চের  - বেরঃ ;
             রাসাক চেপেজা ঘাড়িক এগেরঃ!

               বানুঃ তামা আসকেৎ উসুঃ;
               সদর আকয়াম আমাঃ সুক!

             আম ঞেলতে ইদৗল বাহা;
              ইংহ সানাঞ হরতে লাহাঃ!

        সাজাও ক-আঞ ধারতি তালারে;
               দিশম হড়াঃ মন মুদরি রে!

========== ᱞ ᱧ ===========

৬।।

জাহের  আয়ো

সমরলাল টুডু

 

ছাতিক    করেন    দুরগা   প্রতিমা

খেরোওয়াল  করেনদ  পুতুল্,

জটেদ্   কাতেৎ   জাঁগারে   জহার্

সানতাড়   কোওয়াঃদ   বাতুল্   ।

 

হুডিঞ   বিদাল্   লেটকা   লিটকি

খেলেৎ   কোওয়াক   উনকু,

মারাং   কাতেদ্   সানাম   হড়গে

চাপাৎ   গিডিয়েৎক   হানকু   ।

 

যাঁহাতে   হড়মোরে   আজার্   সারসাঃ

অনাদ   আলোম্   তগজ্,

কিবিড়্   কিবিড়্   তিজু    বাংখান্

লাচ্   পটাক   বগজ্   ।

 

দুরগা   আয়োদ   গজেদ্   কোওয়ায়

লাতার্   গাঁতাক্   মানমি,

সমান্   মেৎতে   বাংএ   ঞেঁলেৎক

মেতাক   কানায়   দানমি   ।

 

যাঁহায়    আয়োদ   দুলাড়   বদলতে

হিরখা   আবন   কানায়,

মেমেন্    কানাম   খেরোওয়াল   আমদ

উনি   আয়োগে  সিবিলানায়্   ।

 

হপন্   গিদরাক   বেঁগেৎ   আয়পে

নাপায়   চেহরা   চরখ,

আবুরেন   জাহের    আয়ো   সাঁওদ

আকাশ   পাতাল   ফরখ   ।

 

জহার   আয়পে    জাহের   আয়োগে

আশিষ্   দুলাড়ে   নেমাপে,

মারাং   কাতেদ্   উনিয়াঃ   আশিষতে

দাকা   দাকাগে   জমাপে   ।

 

খেরোওয়াল   করেন্   বঁগাওয়াঃ   মুঠান্

সানাম্   কোওয়াঃ   সমান্,

লাড়কা   সানতাড়   মাহলে   মুনডা

বুরু   বিরহড়্   এমান্   ।

 

ছাতিক্    কোওয়াঃ   পরব্   পাতারে

বানুঃ   খেরোওয়াল  পরব্,

বাহা    সহরায়   মাঃমড়ে    জানথাড়্

সানতাড়   কোওয়াঃ   গরব্।

========== ᱞ ᱧ ===========

৭।।

আতো পারম

সুরেন্দ্রনাথ হেমব্রম

 

আতো পারম কাতে বৗদ বৗইহৗড়

অনা পারম রে বির,

কয়োঃ লেখানেম অনতে

ঞেলাম ঝতোগে তিঁগুথির |

 

লৗই আকো বাংমা মেনাঃ কো

অনাকরে তুয়ু খিকড়ি হাডগার,

অৗয়ুব অনতে  অকয়হঁ বাকো চালাঃ

নিসুনঃআ অকতো হরডাহার থিরথার |

 

বির তালারে অৗয়ুবতরা তালা ঞিঁদৗ

আঁজমঃ আ রাঃ হাঁডরুং হাঁডরুং,

হৗতি ঠাকুর কো হেঁজ আকান

গটা পাকাড় কো দাঁড়ান চুলং চুলুং

 

আতো সেনরে হড় জুল আকো সেঁগেল

রুয়াকো তুমদাঃ টামাক এমান তেয়াঃ,

গটা পাকাড়গে নোংকা মিৎলেতাড়

বতোর জালা বেঁগেদ লাঁগা ঞিঁদৗ আঁগাঃ |

========== ᱞ ᱧ ===========

৮।।

রঘুনাথ টুডু (এভেন চেঁড়ে )

দুগাই টুডু

 

লাইকো ভাগে অনড়হিঁয়া দ

     কাথায় তাঁহে কানে,

লাকচার সেরেঞ বাডায়িচ্‌ মেনতে

    উনি ওরোম লেনে।

 

ইং ১৯৩৯ সালরে জানাম

   চাঁদান আতো রেদ,

পুরুব সিংভূম ঝাড়খন্ড পনতরে

    নাহাঃ পাড়াও গেদ।

 

টিস্কো রেদ উনদ অনে

    চাকরি লেৎগে ভালা,

অলগে বেলরে ঞুতুম মুচাৎ

  ‘এভেন চেঁড়ে’য় অলা।

 

মারে সেরেঞ রাহা করে

   আডি রুসিকা কানা,

সেরেঞ অনড়হেঁ আয়মা গেচো

   অল বারাও আনা।

 

সান্তাড়ি পাথাম তালা মালা

    আয়মা সদর লেনা,

নিয়া গেচো একাল অকচ্‌

    জতকো তেবাঃ আনাঃ।

 

‘সাঁওতা আরসাল’ অনড়হেঁ পুথি

    উছান বাড়া কেদায়,

সমাজ পারসি লাহায় লাগিৎ

     নাপায় কামি লেদায়।

 

সাঁওহেৎ চারচা খাতির তেগে

    এনেম মেনাঃ তায়া,

অনা থেড়ং হড়কো নেতার

    উইহার ইদিয় গেয়া।

========== মুচৗৎ ===========