কুনৗমি সহরায়রে "ঠেঙ্গা এনেচ"

  কুনৗমি সহরায়রে "ঠেঙ্গা এনেচ"

সাগুন শিকৗরিয়ৗ

 সানতাড় হপন ঠেন সৗরি সহরায় রেনাঃ অসাম্ভেড় এনেম মেনাঃ আকাদা। মনে জিউয়িরে মেশা আকানা জানাম খন। সৗরি সহরায় দ আদম কদ দিশম হড় সাঁওতে ,আদম কদ আতো গাঁওলা মঁড়ে হড়াঃ নেডা গটাবুটৗ কাতে ,আর আদম কদ সহরায় চাঁনদো কুনৗমিরে ।

 মড়ে সিঞ মড়ে ঞিদৗ দিশম মুলুকরে এনেচ সেরেঞ তালাতে রৗসকৗ কো চেপেচ হৗটিঞ জং কানা । সুর দিনগে কুনৗমি সহরায় পুরুলিয়ৗ জেলা রেনাঃ আযোদিয়ৗ বুরুরে মেনাঃ তেলিয়াভাসা আতোরে জাকজমক সহরায় কো মানাও পালাও কেদা। নিয়ৗ অকত দেলাদেলি রেগে বুরুচট রেনাঃআয়মা আতো টোলারেগে সহরায় লাসাড়হেঁৎতে এনেচ সেরেঞ কাতে সহরায় কো মানাও কেদা।                      

সানতাড় হপন কওয়াঃ লাকচার আডি লেকান এনেচ সেরেঞতে হৗটিঞ মেনাঃ আকাদা। আডি লেকান নেয়াম নেমাচার আরিচালিতে তল উরিচ মেনাঃ আকাদা। নওয়া লাকচার তালা রেগে সহরায় মানাও রেনাঃ খুনটৗউ মাহা হিলোঃ ঞেল ঞামেনা মৗঝি আখড়ারে "ঠেঙ্গা এনেচ " অকা করেদ ‘পাইক দন’ হঁক মেনা। । আতো গাঁওলা হন হপন ডাংরা  খুনটৗউ রুয়ৗড় তায়নম ঞুহুম তরা মৗঝি আখড়ারে ।                                

 পোইলো তেদ আতো মৗঝি বাবা সৗগুন লটা দাঃ আতে ঠেঙ্গা হেরমেৎ কাতেৎ মৗঝি আখড়ারে উডুক দহ কেদা । ইনৗ তায়নম ঠেঙ্গা হালাং রাকাব কেদায়, টামাক তুমদৗঃ রু তালাতে ঠেঙ্গা হুরলৗ কাতেৎ ঠেঙ্গা এনেচ দয় এতহব কেদাত। তায়ম দারাম আতো গাঁওলা রেন হপন কদ মিৎ মিৎতে ঠেঙ্গারে জহার কাতে আপান আপিন হরা হরাতে ঠেঙ্গা এনেচ কো আড়তি কেদা । পোইলো তেদ মিৎ হড়তে রেহঁ তায়নম তেদ বার হড়তে ঠেঙ্গা এনেচ আড়তিয়েনা।  টামাক তুমদৗঃ রু তালাতে ঠেঙ্গা সাপাপ্ আতে এনেচ আড়তিতে মৗঝি আখড়ারে সেটের আকান ঞেঞেলিয়ৗ আডি রৗসকৗ সালাঃ কুসি রৗসকৗ কো চেপেজ হৗটিঞ আনা। নতে ঠেঙ্গা খেলোডিয়ৗ হঁ রৗসকৗ সালাঃ ঝারমাট হড়ম দাড়েতে খেলোড এ আড়তি উদুঃ কেদা। খেলোডিয়ৗ ঠেঙ্গা এনেচ উদুঃ তায়ম বাজিঃ রেনাঃ হঁ চল ঞেল ঞামেনা নাসেনাঃ। নংকা কাতেগে আয়মা অকত খেমাওয়েনা ।                       

বাড়ায় ঞামেনা , খেলোড লৗগিৎ ঠেঙ্গা দ গুপি গিদৗরক বেনাও আ গুপি টৗনডিরে আর মৗঝি বাবা অড়াঃরে আগু কাতে ক এমায়া। আর বাংখান মৗঝি বাবাগে বাংমা অড়াঃ অড়াঃ সেনকাতে ঠেঙ্গা দয় তুলাউ আগুয়া। আর খেলোড হিলোঃ সানাম ঠেঙ্গা ক মিৎ ধাওতে হবর ওডোকতে খেলোড আড়তি লৗগিৎএ এতহব আকোওয়া ।          

             

বাংমা, ননংকান রৗসকৗ সালাঃ খেলোড হেপেরাও দ নিতঃ খন দ বাং হানে সেদায় হাপড়াম করে খনগে চালাও হিজুঃ কানা। ঠেঙ্গা মত দ বাং আদম করে দ বাংমা ঠেঙ্গা বাদালতে তারওয়াড়ে কৗপি আতেৎ হঁ খেলোড হেপেরাও হুয়ুঃ গেয়া সহরায়রে ।                       

 সানতাড় হপনাঃ এনেচ সেরেঞ আডি আতো দিশমরে বৗগিয়াঃ কানা,আডি লেকান এনেচ সেরেঞ চাবা মুচৗৎ আকান হররে । আদম টঠা করে দ নঃনংকান খেলোড এনেচ বাং ঞেল ঞামঃগেয়া। কেরমে কেরমে তেগে তেঁহেঞ ধৗবিচ্ হঁ বানচাও মেনাঃআ ।