সিঁগি মাহা রেনাঃ সাকাম ‘চেরেচ্ আড়াং’ লেখা- ৯০

“ আবোওয়াঃ কাথা ” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com ।

 

তেহেঞাঃ আখড়ারে যাঁহায় কো সেলেদ্‌ আকান-  ᱥᱩᱵᱩᱫᱤᱭᱟᱹᱢᱩᱨᱢᱩ, ᱠ ᱤ ᱥ ᱠ ᱤ ᱱ ᱫ ᱷ ᱟ  ᱢ ᱩ ᱨ ᱢ ᱩ, ᱯᱚᱨᱤᱢᱚᱞ  ᱦᱟᱸᱥᱫᱟ, ᱜᱳᱯᱮᱥᱣᱚᱨ ᱢᱟ.ᱱᱰᱤ, বাড়াতাং সরেন, সুচাঁদ হাঁসদা,  দুগাই টুডু, সিতেন মান্ডি, সনাতন টুডু।

 

১।।

ᱱᱟᱜᱟᱢ

 ᱥᱩᱵᱩᱫᱤᱭᱟᱹ  ᱢᱩᱨᱢᱩ

ᱦᱤᱦᱤᱲᱤ ᱯᱤᱯᱤᱲᱤ
ᱦᱳᱦᱳᱞᱳ ᱯᱳᱯᱳᱞᱳ
ᱦᱳᱦᱳᱞᱳ    Holand
ᱯᱳᱯᱳᱞᱳ   Poland  ᱾

ᱥᱟᱶᱟᱭ ᱥᱚᱠᱲᱟ
ᱯᱟᱲᱟ ᱯᱟᱸᱧᱪᱮᱛ
ᱥᱟᱜᱟᱫ  ᱫᱷᱚᱸᱛ  ᱫᱚ
ᱥᱩᱭᱡᱟᱨ    Land ᱾

ᱥᱤᱨᱤᱡᱚᱞ  ᱥᱤᱨᱤᱡᱟᱞᱟ
ᱴᱟᱹᱴᱤᱡᱷᱟᱹᱨᱤ ᱫᱚ ᱥᱤᱛᱟ.ᱱᱟᱞᱟ
ᱥᱩᱸᱬᱟ ᱱᱟᱹᱭ ᱫᱚ ᱥᱤᱱᱫᱷᱩ ᱢᱟᱥᱮ
ᱜᱟᱝ ᱱᱟᱹᱭ  ᱫᱚ  ᱜᱚᱝᱜᱟ  ᱾

ᱦᱟᱨᱟᱛᱟ ᱢᱟ ᱦᱟᱨᱟᱨᱟᱛᱟ
ᱠᱟᱸᱭᱰᱮ ᱜᱮᱥᱮ ᱠᱟᱱᱫᱟᱦᱟᱨ
ᱦᱚᱞᱚᱝ ᱜᱟᱰᱟ ᱠᱤᱸᱫᱽᱨᱤ ᱜᱟᱲ
ᱢᱚᱦᱮᱱᱡᱚᱫᱟᱲᱳ  ᱠᱟᱹᱞᱤᱵᱚᱝᱜᱟ ᱾

ᱥᱩᱸᱬᱩᱠᱩᱪ  ᱵᱤᱨ
ᱠᱷᱟᱸᱰᱮᱨᱟᱭ ᱵᱤᱨ
ᱫᱟᱨᱠᱟ ᱫᱟᱞᱮ ᱫᱤᱞᱞᱤ ᱾

ᱥᱤᱧ ᱫᱩᱣᱟᱹᱨ
ᱵᱟᱹᱭ  ᱫᱩᱣᱟᱹᱨ
ᱥᱤᱨ ᱥᱤᱠᱟᱹᱨ  ᱵᱟᱫᱳᱞᱤ  ᱾

===== ᱞ ᱧ =======

২।।

ᱫᱩᱞᱟᱹᱲ ᱥᱟᱱᱟ  ᱢᱤᱨᱩᱛᱤᱧ

ᱠᱤᱥᱠᱤᱱᱫᱷᱟ   ᱢᱩᱨᱢᱩ

ᱟᱞᱮᱨᱮᱱ   ᱥᱚᱱᱟ   ᱛᱟᱞᱮ
ᱠᱚᱭᱚᱜ  ᱜᱚᱫ ᱢᱮᱞᱮᱢᱮᱞᱮ ;
ᱦᱮᱢᱮ ᱠᱟᱭᱟ ᱥᱟᱨᱟ ᱜᱷᱟᱲᱤ
ᱨᱟᱜ  ᱠᱟᱛᱮ  ᱡᱚᱢᱮ  ᱟᱹᱲᱤ ᱾
          
ᱥᱤᱧ ᱧᱤᱫᱟᱹ ᱡᱟᱯᱤᱫ ᱪᱮᱴᱷᱟ
ᱠᱚᱭᱚᱜ ᱧᱮᱞ  ᱥᱟᱢᱟᱝ ᱜᱚᱴᱟ ;
ᱵᱟᱭ  ᱠᱚᱭᱚᱜ  ᱧᱟᱢᱞᱮ  ᱟᱞᱮ
ᱨᱟᱜᱮ  ᱩᱱ  ᱦᱮᱢᱮ  ᱭᱮᱭᱟᱞᱮ ᱾


ᱨᱟᱜ ᱞᱟᱱᱫᱟ ᱜᱚᱫᱟ ᱡᱩᱫᱤ
ᱥᱩᱨᱩᱜ ᱫᱚᱞᱮ ᱚᱫᱟᱵᱟᱹᱫᱤ ;
ᱪᱚᱜ  ᱪᱮᱨᱮᱪ    ᱮᱢᱟᱭᱟᱞᱮ
ᱠᱷᱟᱜ ᱠᱷᱟᱜ ᱞᱟᱱᱫᱟ ᱟᱞᱮ ᱾


ᱫᱩᱞᱟᱹᱲ ᱥᱚᱱᱟ  ᱢᱤᱨᱩᱛᱤᱧ
ᱥᱚᱦᱟᱜ   ᱠᱟᱛᱮ  ᱨᱟᱜ  ᱤᱧ ;
ᱫᱟᱱᱟᱝ ᱡᱩᱫᱤ ᱛᱤᱜᱩᱜ ᱤᱧ
ᱞᱤᱴᱷᱩᱨ ᱟᱰᱤ ᱠᱚᱭᱚᱜ ᱛᱤᱧ ᱾


ᱦᱮᱢᱮ ᱠᱟᱛᱮ ᱦᱚᱵᱚᱨ ᱠᱟᱛᱮ
ᱪᱚᱜ  ᱠᱟᱛᱮ  ᱪᱮᱨᱮᱪ  ᱠᱟᱛᱮ ;
ᱵᱟᱹᱣᱞᱤᱜ  ᱟᱭ   ᱫᱚ  ᱥᱚᱱᱟ
ᱫᱩᱞᱟᱹᱲᱛᱮ   ᱞᱟᱴᱩᱜ  ᱠᱟᱱᱟ ᱾


ᱨᱚᱲ   ᱟᱲᱟᱝ  ᱪᱮᱨᱚᱵᱮᱨᱚ
ᱥᱚᱦᱟᱜ   ᱫᱩᱞᱟᱹᱲ  ᱚᱨᱚᱜ ;
ᱫᱩᱞᱟᱹᱲ  ᱥᱚᱱᱟ ᱢᱤᱨᱩᱛᱤᱧ
ᱵᱟᱹᱜᱤ  ᱜᱮᱵᱟᱝ ᱥᱟᱱᱟ ᱤᱧ ᱾

===== ᱞ ᱧ =======                  

৩।।

ᱵᱟᱹᱭᱥᱟᱹᱛ ᱪᱟᱸᱫᱳ

ᱯᱚᱨᱤᱢᱚᱞ ᱦᱟᱸᱥᱫᱟ

 

ᱡᱚᱠᱷᱮᱡ ᱡᱟᱨᱟᱞ ᱡᱟᱨᱟᱞ ᱥᱤᱛᱩᱝ

ᱦᱚᱲᱢᱚ ᱦᱟᱨᱛᱟᱨᱮᱭ ᱛᱟᱯᱤᱧ

ᱠᱟᱰᱟ ᱰᱟᱝᱨᱤ ᱵᱷᱤᱰᱤ ᱢᱮᱨᱚᱢ

ᱵᱟᱝᱠᱚ ᱧᱟᱢᱟ ᱢᱚᱡᱽᱛᱮ ᱟᱛᱤᱧ

ᱮᱱᱠᱷᱟᱱᱫᱚ ᱫᱤᱥᱟᱹ ᱫᱚᱦᱫᱚᱭᱢᱮ

ᱥᱮᱴᱮᱨᱟᱠᱟᱱᱟ ᱵᱟᱹᱭᱥᱟᱹᱛ ᱪᱟᱸᱫᱳ᱾

 

ᱡᱚᱠᱷᱮᱡ ᱵᱟᱹᱫᱽ ᱵᱟᱹᱭᱦᱟᱹᱲ ᱜᱟᱰᱟ ᱢᱩᱰᱩ

ᱫᱟᱜ ᱵᱮᱜᱚᱨ ᱨᱚᱦᱚᱲᱛᱮ ᱠᱷᱟᱰᱟᱜ ᱠᱷᱩᱰᱩᱜ

ᱞᱤᱯᱤ‌ ᱪᱮᱬᱮ ᱫᱟᱭᱟᱜᱮᱠᱚ ᱦᱚᱢᱚᱨ

ᱮᱱᱦᱚᱸ ᱵᱟᱝᱮ ᱫᱟᱜ ᱡᱷᱚᱢᱚᱨ ᱡᱷᱚᱢᱚᱨ

ᱮᱱᱠᱷᱟᱱᱫᱚ ᱵᱩᱡᱽ ᱠᱟᱜᱢᱮ

ᱚᱱᱟᱜᱮ ᱠᱟᱱᱟ ᱵᱟᱹᱭᱥᱟᱹᱛ‌ ᱪᱟᱸᱫᱳ᱾

 

ᱡᱚᱠᱷᱮᱡ‌ ᱦᱮᱸᱫᱮ ᱨᱤᱢᱤᱞ ᱦᱚᱭᱫᱟᱜ

ᱟᱫᱚᱢ ᱦᱚᱲᱟᱜ ᱡᱚᱨᱚᱭᱟᱭ ᱢᱮᱫᱫᱟᱜ

ᱵᱟᱜᱽᱣᱟᱱᱨᱮ ᱩᱞ ᱞᱤᱪᱩ ᱵᱮᱹᱞᱮᱹ

ᱧᱮᱞᱚᱜ ᱞᱟᱞᱦᱟᱣᱜᱮ ᱢᱮᱞᱮᱢᱮᱞᱮ

ᱮᱱᱠᱷᱟᱱᱫᱚ ᱩᱭᱦᱟᱹᱨ ᱫᱚᱦᱚᱭᱢᱮ

ᱱᱚᱝᱠᱟᱱ ᱜᱮᱭᱟ ᱵᱟᱹᱭᱥᱟᱹᱛ ᱪᱟᱸᱫᱳ᱾

 

===== ᱞ ᱧ =======

৪।।

ᱜᱮᱰᱮ

 ᱜᱳᱯᱮᱥᱣᱚᱨ ᱢᱟ.ᱱᱰᱤ

  

ᱦᱟ.ᱱᱠᱩ ᱛᱚᱨᱟ ᱜᱮᱰᱮ
ᱫᱟᱜ ᱛᱟᱞᱟ ᱨᱮ
ᱩᱠᱩᱡ ᱰᱩᱵᱩᱡ ᱡᱚᱢᱟᱜ
ᱛᱚᱞᱟᱥ ᱟᱠᱟᱫ ᱨᱮ।

 

ᱫᱟᱜ ᱪᱮᱛᱟᱱ ᱛᱮᱠᱚ
ᱫᱟᱬᱟ ᱵᱟᱬᱟᱭ ᱠᱟᱱ
ᱮᱱ ᱨᱮ'ᱦᱚ ᱵᱟᱝ ᱠᱚ
ᱰᱩᱵᱩᱡᱚᱜ ᱠᱟᱱ।

 
ᱮᱛᱟᱝ ᱪᱟᱢᱵᱲᱟ ᱛᱮ
ᱠᱟ.ᱴᱩᱵ ᱛᱚᱞ ᱢᱤᱫ
ᱚᱱᱟ ᱫᱟᱬᱮ ᱛᱮ
ᱫᱟᱜ ᱠᱚ ᱠᱟᱴᱟᱣ ᱠᱟᱱ ।

 
ᱫᱤᱱᱳᱢ ᱦᱤᱞᱳᱜ ᱥᱮᱛᱟᱜ 
ᱯᱩᱠᱷᱨᱤ ᱠᱚ ᱪᱟᱞᱟᱜ
ᱟ.ᱭᱩᱵ ᱯᱚᱦᱚᱨ ᱛᱮᱫᱚ
ᱨᱩᱣᱟ.ᱲ ᱟᱠᱚ ᱚᱲᱟᱜ ।

 ===== ᱞ ᱧ =======

৫।।

মারাং দৗই

বাড়তাং সরেন

 
মারাং দৗইকো ইদি কেদে
                      মড়ে বুরু পারম
রাজন বাজন রাঙ্কি আতে
                সোনা রূপৗ সাকম।

 
বাখোল রাচা নিশুনেনা
                  বাচঞ আজম আড়াং
অকয় তেহেঞ চেরেজিঞা
                    ইঞ দ টাড়াং টাড়াং !

 
তোওয়া দারে জানাম দাতা
                  মনে জিউয়ী বৗড়িচ
কোড়াম তালা জুলুঃ সেঙ্গেল 
                অকয় তেহেঞ ইঁড়িচ !

 
অকয় আতেঞ সেনঃ নায়ো
                     কুঁঞডি বিলি হালাং
অকয় আতেঞ গাতেঃ তেহেঞ
                    সারজম উমুল দানাং !

 
অকয় আতেঞ সেনঃ নায়ো
                     মামা হাতম অড়াঃ
অকয় তেহেঞ সিদ্ আগুয়া
               চাতম উলিঞ আড়াঃ !

 
অকয় আতেঞ রপড় তাপাম
                 সেতাঃ সিগাঁড় তিকিন
মেৎদাঃ ইঞাঃ অকয় জদা
                    দায়াগে দিনৗম দিন !

 
চেদাঃ দবেন গং কেদেয়া
                      মড়ে বুরু পারম
অকয় ইঞ দ দুঃ দারামিঞ
                 দুলৗড় উমুল চাতম  ?

 

===== ᱞ ᱧ =======

৬।।

গুলে মালে

সুচাঁদ হাঁসদা

 
হড়-দ আডিয় হুডিঞ গেয়া ,
পুতলি বাঁদে বানুঃ সায়া ,
রড় তায়হঁ গাড়মাত গেয়া,
পতুল বিটিয় হেবে কায়া ৷

 
সেঁড়া আয়ালে নেনে পেতে ,
কামি কাজহঁ সেতে পেতে ,
বানুঃ আড়ি মচা গতে ,
হেঁও হারায়ে জত কতে ৷

 
বায় আড়ি বায় বালেঃ ,
ইসকুল আদয় চালাঃ তালে ,
হড় লেকায় হড়ঃ তালে ,
হারা কায়ালে গুলে মালে ৷

 ===== ᱞ ᱧ =======

৭।।

ঠাকুর প্রসাদ মুরমু

দুগাই টুডু

 
আঁজম আকান হানে কাথায়
       মারাং অনড়হিঁয়ৗ,
লৗইয়ৗকো সানাম আরহঁ অনে
     লৗটু অনলিয়ৗ।

 
ঞুতুম ঠাকুর প্রসাদ মুরমু
      বাডায় জত অনে,
ভৗলৗই কৗমি উইহৗর লেনায়
      ভাগে লৗগিৎ হানে।

 
জানাম তায়গে লুয়াডি আতো
       পটমদা-গে থানা,
 নাহাঃ পুরুব সিংভূম জেলা
       ঝাড়খন্ড পনৎ কানা।

 
আপাৎ ঞুতুম ছোটরায় মুরমু
       এঁগাৎ রুক্‌মিনি,
বি.এ. অনার্স পাসগে আনা
       রাঁচি খনাঃ উনি।

 
এ.জি. অফিস রেগে চৗকরি
     অনা রাঁচি রেদ,
পৗরসি সাঁওহেৎ হুদিস লেদায়
     উৎনৗও লৗগিৎ লেদ।

 
‘সহরায় রৗস্কৗ’ উছৗন কেদায়
      ‘হড় সম্বাদ’রে গেদ,
সেরেঞ অনড়হেঁ অনল কৗহনি
      অলগে আকাৎ আদ।

 
‘এভেন আড়াং’ সেরেঞ পতব
     অৗডি মঁজগে আনা,
‘সিসিরজন রৗড়’ অনড়হেঁ পুঁথি
     নাপায় গেকো মেনা।

 
বৗনুয় রেহঁ তেহেঞ উনি
     এনেম দহ আনায়,
সাঁওতা তালা নেতার হঁচ
    দিসৗ গেচো হেনায়।

  ===== ᱞ ᱧ =======

৮।।

এড়ে কাথাতেম এড়েঃ আ

সীতেন মাণ্ডি

 
মিৎ টান গুপি গিদৗর
দিনৗম গুপি টাঁডিরে
মেরম ডাংরি গুপি কোওয়ায়
বির বুরু ধারে রে।

 
চিকৗতেচং হেজ্ আদে এড়ে
কাথা মেন আয়াঃ বহঃ রে
তৗরুপ তৗরুপ জমিঞ কানায়
অকয় অকারে হিজু্ঃপে দেলা লগন।

 
যাঁহায় কক কৗমি কান তাঁহেৎ
    অনা সুর সুপুর রে
আজঁম কাতে দৗড় হেচ এন ক
   উনি বাঞ্চাও লাগিৎ।

 
হেচ কাতে ক ঞেলে কান দ
তৗরুপ ক মা বৗনুঃ ক
এড়ে কাথা মেন কাতেৎ
গুপি গিদৗরে লান্দা জং কান।

 
দশার হিলোঃহঁ অনকাগে
বাঞ্চাও ইঞ পে আডি জোরে গুলৗ
আজম কাতে আডি হড় গে
সেটেরেনাক গট টাঁডি রেমা।

 
গুপি গিদৗরে লান্দা জং আ
উন কু ঞেলতে এন হিলোঃ হঁ।
কুলিয়েয়াক চেদাঃ বাবু নংকা
দিনৗম দিনৗমএড়ে কাথাম রড়াঃ?

 
এড়ে কাথা আজম তরা দৗড় হিজুঃ আপে
তিনাঃ রৗস্কৗ তিনাঃ মজিঞ বুজা।
তেসার হিলোঃ দ সৗরি সৗরিগে
গট টাঁডিতে তৗরুপ এ হেচ এনা।

 
ডাংরি জমে ধুরৗও এন রে
বাঞ্চাও লৗগিৎ গুপি ইচ্ মা
বতর তে আডি জোরে গুলৗ
 উনি গুপি গিদৗর মা।

 
বাঞ্চাও ইঞ পে বাঞ্চাও ইঞ পে
অকয় অকারে মেনাঃ পেয়া
আঁজম কাতে হঁ এন হিলোঃ দ
অকয় হঁ বাং ক সেটেরলেনা।

 
দায়া গে গুপি গিদৗর
তৗরুপ ঠেনে জম হচয়েনা।।
 

===== ᱞ ᱧ =======

৯।।

হেঁদে রিমিল ঞেলতে

সনাতন টুডু

 
হেঁদে রিমিল ঞেলতে হাড়াম
রাট পাটেয় তাড়াম,
বায় আঁজমা চেদ কাথাহঁ
মিদ মনেতেয় তাড়াম ।

 
গড়ম কড়া সাঁগিঞ খনা:
জুর জুরতেয় হহয়,
"এয়া গড়ম ঞুরেন হৗনি
ঘেঁট রিনিচ ফড়য়" ।

 
বায় আঁজমা গড়ম হাড়াম
জুর জুরতেয় তাড়াম,
সেটের তরা বুডহি হৗনি
খাড়য় আতেয় দারাম ।

 
গড়ম হাড়াম লাঁদা আতেদ
ঘেঁটেয় রাড়া গদা ,
ঞেলায় বুডহি ঘেঁটরে মেনাঃ
এখেন রহড় আদা ।

 
রৗগি কাতেদ বুডহিয় মেনা
অকায়েনাকো হৗকু ,
চপজ গেয়াম দাকা সালাঃ
এমা মালাং ঠৗবু ।

 
গড়ম কড়া হেজ কাতেদ
গড়ম বুডহিয় মেতায় ,
আলম রৗগিঃ ঞেলে মেসে
তিন মারাং ফড়য়।

=O=O=O মুচৗৎ O=O=O=