ᱵᱷᱟ.ᱞᱟ.ᱭ ᱟ.ᱠᱷᱨᱤᱧ

(ᱨᱩᱛᱤ ᱠᱟ.ᱦᱱᱤ)

ᱵᱷᱟ.ᱞᱟ.ᱭ ᱟ.ᱠᱷᱨᱤᱧ

ᱜᱳᱯᱮᱥᱣᱚᱨ ᱢᱟ.ᱱᱰᱤ

ᱜᱤᱨᱤᱰᱤ ᱟᱛᱳ ᱫᱚ ᱟ.ᱰᱤ ᱢᱟᱨᱟᱝ ᱜᱮᱭᱟ । ᱮᱭᱟᱭ ᱜᱚᱴᱟᱝ ᱠᱩᱞᱦᱤ ᱢᱮᱱᱟᱜ-ᱟ । ᱚᱱᱟ ᱟᱛᱳ ᱨᱮᱱ ᱜᱮ ᱞᱮᱫᱮᱢ ᱵᱟᱨ ᱯᱮ ᱫᱷᱟᱣ ᱯᱚᱧᱪᱟᱭᱮᱛ ᱵᱷᱳᱴ ᱨᱮ ᱡᱤᱛᱠᱟ.ᱨ ᱠᱟᱛᱮ ᱥᱚᱦᱮᱫ(ᱢᱮᱢᱵᱟᱨ) ᱠᱚ ᱵᱮᱱᱟᱣ ᱮ ᱠᱟᱱ ᱛᱟ'ᱦᱮ ᱠᱟᱱᱟ । ᱩᱱᱤ ᱫᱚ ᱠᱤᱥᱟ.ᱲ ᱧᱚᱜ ᱜᱮᱛᱮᱭ ᱴᱟᱠᱟ ᱯᱚᱭᱥᱟ,ᱡᱤᱞ ᱪᱟᱠᱷᱱᱟ,ᱦᱟ:ᱰᱤ ᱯᱟ.ᱣᱨᱟ. ᱛᱮ ᱵᱷᱳᱴ ᱠᱤᱨᱤᱧ ᱠᱟᱛᱮ ᱫᱟᱲᱮᱜ ᱠᱟᱱ ᱛᱟ'ᱦᱮ ᱠᱟᱱᱟᱭ । ᱟᱛᱳ ᱨᱮᱱᱟᱜ ᱵᱷᱟ.ᱞᱟ.ᱭ ᱫᱚ ᱵᱟᱝ,ᱟᱭᱟᱡ ᱵᱷᱟ.ᱞᱟ.ᱭ ᱵᱮᱜᱚᱨ ᱪᱮᱫ ᱜᱮ ᱵᱟᱝ ᱮ ᱵᱩᱡᱟ । ᱥᱚᱨᱠᱟᱨᱤ ᱱᱚᱞᱠᱩᱯ ᱟᱭᱟᱡ ᱚᱲᱟᱜ ᱨᱮᱭ ᱵᱟ.ᱭᱥᱟ.ᱣ ᱟᱠᱟᱫᱟᱭ । ᱜᱟ.ᱰᱭᱟ.,ᱠᱩᱧ ᱟᱭᱟᱜ ᱠᱷᱮᱛ ᱵᱟ.ᱫ ᱨᱮ ᱥᱚᱨᱠᱟᱨᱤ ᱴᱟᱠᱟᱛᱮᱭ ᱵᱮᱱᱟᱣ ᱡᱚᱝ ᱟᱠᱟᱱᱟ । 

ᱱᱚᱣᱟ ᱠᱚ ᱧᱮᱞ ᱠᱟᱛᱮ ᱢᱚᱬᱮ ᱥᱮᱨᱢᱟ ᱛᱟᱭᱚᱢ ᱥᱤᱵᱩ ᱥᱮᱪᱮᱫ ᱨᱮ'ᱜᱮᱡ ᱜᱤᱫᱨᱟ. ᱡᱤᱣᱤ ᱟᱞᱟᱭ ᱠᱟᱛᱮ ᱨᱟ.ᱜᱤ ᱛᱮ ᱟᱛᱳ ᱦᱚᱲᱟᱜ ᱵᱷᱟ.ᱞᱟ.ᱭ ᱞᱟ.ᱜᱤᱫ ᱵᱷᱳᱴ ᱨᱮ ᱞᱮᱫᱮᱢᱟᱜ ᱵᱤᱨᱩᱫ ᱨᱮ ᱮᱴᱟᱜ ᱫᱚᱞ ᱠᱷᱚᱱ ᱮ ᱛᱤ'ᱜᱩᱭ ᱮᱱᱟ । ᱞᱮᱫᱮᱢ ᱫᱚᱭ ᱢᱟᱱᱟ ᱞᱮᱫᱮ ᱜᱮᱭᱟ,ᱟᱞᱚᱢ ᱛᱤ'ᱜᱩᱱᱟ ᱡᱟ'ᱦᱟᱢ ᱢᱮᱱ,ᱚᱱᱟᱜᱤᱧ ᱮᱢᱟᱢᱟ । ᱢᱮᱱᱠᱷᱟᱱ ᱥᱤᱵᱩ ᱞᱳᱵᱷ,ᱞᱟᱞᱚᱪ,ᱵᱚᱛᱚᱨ ᱫᱮᱭᱟ ᱠᱟᱛᱮ ᱟᱛᱳ ᱵᱷᱟ.ᱞᱟ.ᱭ ᱞᱟ.ᱜᱤᱫ ᱵᱷᱳᱴ ᱨᱮᱭ ᱛᱤ'ᱜᱩᱭᱮᱱ ᱜᱮᱭᱟ । ᱥᱤᱵᱩᱭᱟᱜ ᱫᱚ ᱴᱟᱠᱟ ᱯᱚᱭᱥᱟ,ᱦᱟ:ᱰᱤ ᱯᱟ.ᱣᱨᱟ. ᱛᱮ ᱵᱷᱳᱴ ᱠᱤᱨᱤᱧ ᱞᱮᱠᱟ ᱫᱟᱲᱮ ᱵᱟᱝ ᱛᱟ'ᱦᱮ ᱠᱟᱱ ᱛᱟᱭᱟ । ᱚᱱᱟᱛᱮ ᱩᱱᱤ ᱫᱚ ᱵᱷᱳᱴ ᱨᱮ ᱵᱟᱝ ᱮ ᱫᱟᱲᱮᱜ ᱠᱟᱱ ᱛᱟ'ᱦᱮ ᱠᱟᱱᱟ । ᱩᱱᱤ ᱫᱚᱭ ᱢᱮᱱᱮᱫ ᱛᱟ'ᱦᱮ ᱠᱟᱱᱟ ᱚᱲᱟᱜ ᱫᱩᱣᱟ.ᱨ,ᱧᱩ ᱫᱟᱜ,ᱜᱟ.ᱰᱭᱟ.,ᱠᱩᱧ ᱰᱟ.ᱰᱤ,ᱰᱟᱦᱟᱨ ᱮᱢᱟᱱ ᱞᱟ.ᱜᱤᱫ ᱵᱷᱳᱴ ᱮᱢᱟ.ᱧ ᱯᱮ । ᱤᱧ ᱟᱵᱚ ᱥᱟᱱᱟᱢ ᱟᱛᱳ ᱦᱚᱲ ᱞᱟ.ᱜᱤᱫ ᱡᱩᱲᱩ ᱚᱨ ᱟ.ᱜᱩ ᱠᱟᱛᱮ ᱵᱷᱟ.ᱞᱟ.ᱭ ᱨᱮᱱᱟᱜ ᱯᱟ.ᱣᱲᱤᱧ ᱞᱟᱦᱟᱭᱟ । ᱢᱮᱱᱠᱷᱟᱱ ᱱᱩᱭ ᱨᱮ'ᱜᱮᱡ ᱦᱚᱲᱟᱜ ᱠᱟᱛᱷᱟ ᱚᱠᱚᱭ ᱮ ᱟ'ᱡᱚᱢᱟ ? ᱴᱟᱠᱟ ᱯᱚᱭᱥᱟ,ᱦᱟ:ᱰᱤ ᱯᱟ.ᱣᱨᱟ.,ᱡᱤᱞ ᱪᱟᱠᱷᱱᱟ ᱵᱟᱝ ᱮ ᱮᱢ ᱫᱟᱲᱮᱭᱟᱜ-ᱟ ।

ᱜᱤᱨᱤᱰᱤ ᱟᱛᱳ ᱦᱚᱲ,ᱮᱴᱟᱜ ᱟᱛᱳ ᱥᱮᱱ ᱠᱟᱛᱮ ᱧᱮᱞ ᱟᱠᱚ ᱚᱲᱟᱜ ᱚᱲᱟᱜ ᱥᱚᱨᱠᱟᱨᱤ ᱠᱷᱚᱱ "ᱚᱲᱟᱜ" ᱟᱨ ᱟᱛᱳ ᱨᱮᱱ ᱦᱚᱲ ᱞᱟ.ᱜᱤᱫ ᱦᱟᱲᱟᱢ ᱵᱩᱰᱷᱤ,ᱨᱟ:ᱰᱤ ᱯᱮᱱᱥᱮᱱ, ᱯᱩᱠᱷᱨᱤ,ᱠᱩᱧ,ᱰᱟ.ᱰᱤ,ᱰᱟᱦᱟᱨ ᱮᱢᱟᱱ ᱠᱚ ᱧᱟᱢ ᱟᱠᱟᱫᱟ । ᱢᱮᱱᱠᱷᱟᱱ ᱟᱞᱮ ᱟᱛᱳ ᱨᱮᱫᱚ ᱢᱤᱫ ᱵᱟᱨ ᱦᱚᱲ ᱚᱲᱟᱜ ᱠᱚ ᱧᱟᱢ ᱟᱠᱟᱫᱟ । ᱢᱟᱱᱮ ᱡᱟ'ᱦᱟᱭ ᱞᱮᱫᱮᱢ ᱨᱮᱱ ᱫᱟᱞᱟᱞ ᱩᱱᱠᱩ ᱥᱩᱢᱩᱝ ᱜᱮ । ᱚᱱᱠᱟ ᱞᱮᱠᱟᱛᱮ ᱟᱛᱳ ᱦᱚᱲ ᱠᱚ ᱵᱩᱡ ᱛᱤᱭᱳᱜ ᱠᱮᱫᱟ,ᱴᱟᱠᱟ ᱯᱚᱭᱥᱟ,ᱦᱟ:ᱰᱤ ᱯᱟ.ᱣᱨᱟ. ᱛᱮ ᱵᱷᱳᱴ ᱟ.ᱠᱷᱨᱤᱧ ᱞᱮᱠᱷᱟᱡ ᱵᱟᱝ ᱦᱩᱭᱩᱜ-ᱟ,ᱟᱵᱚ ᱟᱛᱳ ᱨᱮᱱᱟᱜ ᱵᱷᱟ.ᱞᱟ.ᱭ ᱵᱚᱱ ᱟ.ᱠᱷᱨᱤᱧ ᱮᱫᱟ । ᱡᱟ'ᱦᱟᱭ ᱟᱵᱚ ᱟᱛᱳ ᱞᱟ.ᱜᱤᱫ ᱫᱟᱭᱟ ᱫᱩᱞᱟ.ᱲ ᱢᱮᱱᱟᱜ ᱟᱠᱟᱫ ᱛᱟᱭᱟ,ᱚᱱᱠᱟᱱ ᱦᱚᱲ ᱜᱮ ᱵᱷᱳᱴ ᱨᱮ ᱛᱤ'ᱜᱩ ᱠᱟᱛᱮ ᱵᱚᱱ ᱡᱤᱛᱠᱟ.ᱨᱮᱭᱟ । ᱡᱟ'ᱦᱟ ᱞᱮᱠᱟ ᱢᱮᱱ,ᱚᱱᱠᱟ ᱜᱮ ᱠᱟ.ᱢᱤ । ᱞᱳᱵᱷ ᱞᱟᱞᱚᱪ ᱫᱮᱭᱟ ᱠᱟᱛᱮ ᱟᱛᱳ ᱵᱷᱟ.ᱞᱟ.ᱭ ᱞᱟ.ᱜᱤᱫ ᱥᱤᱵᱩ ᱵᱷᱳᱴ ᱮᱢ ᱠᱟᱛᱮ ᱟ.ᱰᱤ ᱫᱤᱱ ᱑᱐(ᱜᱮᱞ) ᱥᱮᱨᱢᱟ ᱛᱟᱭᱚᱢ ᱠᱚ ᱡᱤᱛᱠᱟ.ᱨ ᱠᱮᱫᱮᱭᱟ । ᱥᱤᱵᱩ ᱫᱚ ᱟᱛᱳ ᱵᱷᱟ.ᱞᱟ.ᱭ ᱞᱟ.ᱜᱤᱫ ᱫᱟᱣ ᱮ ᱧᱟᱢ ᱠᱮᱫᱟ । ᱟᱫᱚ ᱯᱚᱧᱪᱟᱭᱮᱛ ᱨᱮᱱᱟᱜ ᱵᱟᱠᱷᱨᱟ ᱡᱩᱲᱩ ᱞᱟ.ᱲᱦᱟ.ᱭ ᱛᱟᱞᱟᱛᱮ ᱦᱟᱲᱟᱢ ᱵᱩᱰᱷᱤ ᱯᱮᱱᱥᱮᱱ,ᱠᱩᱧ,ᱰᱟ.ᱰᱤ,ᱱᱚᱞᱠᱩᱯ,ᱰᱟᱦᱟᱨ ᱟᱨ ᱚᱲᱟᱜ ᱮ ᱚᱨ ᱟ.ᱜᱩ ᱠᱮᱫᱟᱭ । ᱵᱟᱨ ᱥᱮᱨᱢᱟ ᱛᱮᱜᱮ ᱟᱛᱳ ᱨᱮᱱᱟᱜ ᱟᱢᱫᱟ ᱩᱛᱟ.ᱨ ᱵᱷᱟ.ᱞᱟ.ᱭ ᱠᱟ.ᱢᱤ ᱮ ᱩᱫᱩᱜ ᱠᱮᱫᱟ । ᱟᱫᱚ ᱟᱛᱳ ᱦᱚᱲ ᱵᱷᱳᱴ ᱨᱮᱱᱟᱜ ᱜᱚᱱᱚᱝ ᱠᱚ ᱩᱭᱦᱟ.ᱨ ᱛᱤᱭᱳᱜ ᱫᱟᱲᱮᱣ ᱟᱫᱟ । ᱚᱱᱠᱟ ᱜᱮ ᱦᱟᱥᱟ,ᱯᱟ.ᱨᱥᱤ,ᱡᱟ.ᱛᱤ ᱫᱷᱚᱨᱚᱢ ᱮᱢᱟᱱ ᱞᱟ.ᱜᱤᱫ ᱞᱳᱵᱷ,ᱞᱟᱞᱚᱪ ᱫᱮᱭᱟ ᱠᱟᱛᱮ ᱵᱷᱳᱴ ᱮᱢ ᱡᱟᱨᱩᱲᱟ ।