সিঁগি মাহা রেনাঃ সাকাম ‘চেরেচ্ আড়াং’ লেখা- ৭৮

 

“আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com । 

 

তেহেঞাঃ আখড়ারে যাঁহায় কো সেলেদ্‌ আকান- বিমলা কিস্কু, বরেন্দ্রনাথ কিস্কু, রিলৗমালা মুরমু, ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ, ᱥᱩᱵᱩᱫᱤᱭᱟᱹᱢᱩᱨᱢᱩ, ᱜᱳᱯᱮᱥᱣᱚᱨ ᱢᱟ.ᱱᱰᱤ, ᱜᱟᱛᱮ  ᱴᱩᱣᱟ.ᱨ ᱨᱟᱢᱞᱟᱞ ᱴᱩᱰᱩ, ᱠᱤᱥᱠᱤᱱ ᱫ ᱷ ᱟ   ᱢ ᱩᱨᱢ ᱩ,  ᱥᱤᱛᱮᱱ  ᱢᱟᱱᱰᱤ, দুর্গাচরণ মুরমু, দুগাই টুডু,ভৗবরৗই সরেন, ঠ্যেন্টা মুরমু, নিকোলাস মারান্ডি, সমর লাল টুডু, বাবলু সরেন, বাড়তাঙ সরেন, সুচাঁদ হাঁসদা, বাড়াতাং সরেন, বিভূতি ভূষন সরেন ।  

  

বিমলা কিস্কু, ক্লাস-LKG
জেলা - পূর্ব সিংভূম

বরেন্দ্রনাথ কিস্কু, ক্লাস- I
জেলা - পূর্ব সিংভূম

রিলৗমালা মুরুমু, ক্লাস- V
জেলা - পুরুলিয়া

১।।

ᱦᱮᱸᱫᱮ  ᱨᱮᱜᱮ  ᱯᱳᱸᱰ ᱫᱚ  ᱢᱮᱱᱟᱜ

ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ

 

ᱡᱮᱸᱫᱮ ᱴᱩᱠᱩᱡ     ᱦᱮᱸᱫᱮ ᱪᱮᱞᱟᱝ
           ᱦᱮᱸᱫᱮ ᱪᱩᱞᱦᱟᱹ ᱮᱞᱟᱝ
ᱮᱱᱛᱮ ᱨᱮᱦᱚ      ᱥᱟᱹᱛᱚᱜ ᱜᱮᱭᱟ
           ᱯᱳᱸᱰᱜᱮ  ᱤᱥᱤᱱ ᱵᱟᱥᱟᱝ ᱾

 

ᱟᱯᱮ ᱛᱤᱨᱮ      ᱢᱟᱰᱣᱟ ᱵᱤᱪᱟᱹᱨ
            ᱡᱟᱹᱛᱤ  ᱥᱚᱢᱟᱡ ᱥᱩᱥᱟᱹᱨ
ᱪᱮᱫᱟᱜ  ᱱᱤᱛᱦᱚᱸ    ᱧᱮᱞᱚᱜ ᱦᱟᱱᱮ
           ᱨᱤᱴᱷᱟ ᱧᱩᱛᱟᱹᱛ ᱪᱤᱛᱟᱹᱨ ?

 

ᱵᱟᱪᱚᱝ ᱵᱟᱛᱟᱜ     ᱵᱟᱯᱮ ᱦᱮᱸᱛᱟᱜ

            ᱛᱤᱥ ᱟᱫᱚᱯᱮ ᱪᱮᱛᱟᱜ?
ᱩᱥᱩᱞ ᱠᱟᱸᱛ ᱯᱮ     ᱵᱷᱤᱸᱫᱟᱹᱬ ᱦᱚᱪᱚᱭ
            ᱮᱱᱦᱚᱸ ᱵᱟᱯᱮ ᱜᱚᱛᱟᱜ ᱾
ᱦᱚᱯᱚᱱ ᱵᱟᱹᱵᱩᱭ   ᱨᱟᱹᱯᱩᱫᱽ ᱞᱮᱠᱷᱟᱱ
          ᱵᱟᱹᱲᱤᱡ ᱜᱮᱯᱮ ᱢᱮᱛᱟᱜ ᱾

 

★★★★★★★★★★★★

 ২।।

ᱪᱟᱸᱫᱚ  ᱵᱮᱲᱟ

ᱥᱩᱵᱩᱫᱤᱭᱟ.  ᱢᱩᱨᱢᱩ

ᱤᱯᱤᱞ ᱠᱷᱚᱱᱟᱜ ᱵᱮᱲᱟᱭ ᱢᱟᱨᱟᱝ
ᱥᱮᱨᱢᱟ ᱨᱮᱢᱟ  ᱫᱟᱨᱟᱝ ᱫᱟᱨᱟᱝ ᱾

ᱪᱟᱸᱫᱚ ᱤᱯᱤᱞ ᱜᱟᱛᱮ ᱜᱟᱛᱮ
ᱵᱮᱲᱟ ᱜᱮᱥᱮ ᱵᱟᱭ ᱯᱟᱱᱛᱮ ᱾

ᱪᱟᱸᱫᱚ ᱛᱮᱨᱫᱮᱡᱽ ᱞᱩᱭᱩᱢ ᱞᱟᱹᱵᱤᱪ
ᱵᱮᱲᱟ ᱢᱟᱨᱥᱟᱞ ᱤᱥᱤᱲ  ᱦᱟᱹᱵᱤᱪ ᱾

ᱠᱩᱱᱟᱹᱢᱤ ᱪᱟᱸᱫᱚ ᱢᱩᱞᱩᱪ ᱢᱩᱞᱩᱪ
ᱛᱮᱨᱫᱮᱡᱽ ᱢᱟᱨᱥᱟᱞ ᱤᱯᱤᱞ ᱛᱩᱞᱩᱪ ᱾

ᱠᱷᱤᱞᱰᱩ ᱟᱛᱮ ᱧᱤᱫᱟᱹᱠᱚ  ᱟᱸᱜᱟᱭ
ᱢᱮᱱᱟᱜ ᱛᱟᱠᱚ ᱥᱩᱞᱩᱠ ᱥᱟᱹᱜᱟᱹᱭ ᱾

ᱟᱹᱪᱩᱨ ᱵᱤᱦᱩᱨ ᱤᱯᱤᱞ ᱮᱸᱜᱮᱞ
ᱥᱮᱯᱮᱧ ᱠᱟᱛᱮ  ᱡᱳᱞᱳᱜ ᱥᱮᱸᱜᱮᱞ ᱾

ᱚᱴᱟᱝ ᱚᱜᱠᱚ ᱦᱚᱭᱟᱝ ᱦᱚᱭᱟᱝ
ᱥᱟᱡᱟᱣ ᱟᱠᱟᱛᱠᱚ  ᱱᱚᱣᱟ  ᱚᱣᱟᱝ ᱾

★★★★★★★★★★★★

৩।।

ᱨᱟᱵᱟᱝ

ᱜᱳᱯᱮᱥᱣᱚᱨ ᱢᱟ.ᱱᱰᱤ

  

ᱥᱮᱛᱟᱜ ᱨᱮ ᱠᱩᱶᱟ.ᱥ ᱛᱮ
ᱫᱤᱥᱳᱢ ᱯᱮᱨᱮᱡ ᱟᱠᱟᱱ,
ᱨᱟᱵᱟᱝ ᱡᱟᱞᱟ ᱢᱟ.ᱱᱢᱤ ᱠᱚ
ᱩᱭᱩ ᱮᱥᱮᱫ ᱟᱠᱟᱱ ।

 

ᱜᱤᱫᱟ.ᱨ ᱯᱤᱫᱟ.ᱨ ᱦᱟᱲᱟᱢ ᱵᱩᱰᱦᱤ
ᱥᱮ'ᱜᱮᱞ ᱠᱚ ᱡᱩᱨᱩᱜ,
ᱟᱯᱚᱱ ᱫᱟᱲᱮ ᱡᱚᱛᱚ ᱦᱚᱲ
ᱞᱚᱜᱚᱱ ᱠᱚ ᱥᱩᱨᱩᱜ ।

 

ᱢᱤᱫ ᱡᱚᱠᱷᱟᱡ ᱟ.ᱰᱤ ᱨᱟᱵᱟᱝ
 ᱵᱟᱝ ᱥᱟᱦᱟᱜ ᱜᱮ,
ᱨᱮ'ᱜᱮᱡ ᱚᱨᱮᱡ ᱦᱚᱲ ᱠᱚᱣᱟᱜ
ᱟ.ᱰᱤ ᱡᱟᱞᱟ ᱜᱮ ।

 

ᱫᱮᱞᱟ ᱡᱚᱛᱚ ᱢᱤᱫ ᱠᱟᱛᱮ
ᱨᱟᱵᱟᱝ ᱞᱟᱜᱟᱭ ᱟᱵᱚᱱ,
ᱯᱤᱪᱷᱟ.ᱲᱤ,ᱥᱩᱣᱟ.ᱴᱟᱨ ᱦᱚᱲᱢᱚ ᱮᱥᱮᱫ
ᱦᱟ.ᱴᱤᱧ ᱡᱚᱱᱚᱜ ᱟᱵᱚᱱ ।

★★★★★★★★★★★★

৪।।

ᱵᱮᱲᱟ ᱜᱟᱛᱮ

ᱜᱟᱛᱮ  ᱴᱩᱣᱟ.ᱨ

 

ᱦᱟ.ᱱᱤ ᱛᱚᱨᱟ        ᱯᱩᱵᱨᱮ ᱵᱮᱲᱟ
ᱥᱮᱛᱟᱜ ᱛᱚᱨᱟ        ᱱᱟᱣᱟ ᱯᱮᱲᱟ
ᱟᱜᱩ ᱠᱮᱫᱟᱭ       ᱱᱟᱣᱟ ᱠᱷᱚᱵᱚᱨ
ᱢᱟᱨᱥᱟᱞ ᱠᱮᱫᱟᱭ    ᱟᱛᱳ ᱥᱚᱦᱚᱨ᱾

 

ᱥᱮᱛᱟᱜ ᱠᱷᱚᱱᱟᱜ   ᱵᱮ.ᱨᱫᱚ ᱛᱤᱠᱤᱱ
ᱡᱷᱟᱨᱱᱟ ᱫᱟᱜᱦᱚᱸ      ᱟᱛᱩ ᱞᱤᱸᱡᱤᱱ
ᱚᱠᱚᱭᱜᱮ ᱵᱟᱝ            ᱛᱤᱸᱜᱩ ᱛᱷᱤᱨ
ᱢᱮᱱ-ᱟᱭ ᱞᱟᱦᱟᱜ      ᱯᱟ.ᱣᱲᱤ ᱜᱷᱤᱲ ᱾

 

ᱛᱤᱠᱤᱱ ᱠᱷᱚᱱᱟᱜ   ᱛᱟᱨᱟᱥᱤᱧ ᱦᱟᱸᱥᱩᱨ
ᱪᱷᱩᱴᱟ.ᱜ-ᱢᱮ ᱠᱟ.ᱢᱤ    ᱟᱸᱫᱩᱨ ᱢᱟᱸᱫᱩᱨ
ᱟᱞᱚᱢ ᱢᱮᱱᱟ                 ᱠᱟ.ᱢᱤᱫᱚ ᱩᱠᱩᱨ
ᱫᱤᱱᱟ.ᱢ ᱵᱮᱲᱟ              ᱫᱟᱲᱮᱭ ᱩᱥᱠᱩᱨ ᱾

 

ᱫᱤᱱᱟ.ᱢ ᱫᱤᱱᱟᱜ        ᱚᱠᱟ ᱠᱟ.ᱢᱤ
ᱚᱠᱛᱚ ᱨᱮᱜᱮ             ᱟ.ᱰᱤ ᱫᱟ.ᱢᱤ
ᱵᱮᱲᱟ ᱚᱠᱚᱭ        ᱜᱟᱛᱮ. ᱠᱟᱭᱟᱭ
ᱞᱟᱦᱟᱜ ᱩᱱᱤ.      ᱞᱟᱦᱟᱜ ᱜᱮᱭᱟᱭ ᱾

 

★★★★★★★★★★★★

৫।।

ᱠᱟᱺᱰᱷᱩᱢ ᱵᱷᱮᱰᱟ

ᱨᱟᱢᱞᱟᱞ ᱴᱩᱰᱩ

 

ᱢᱟᱺᱡᱷᱤ ᱠᱚᱨᱮᱱ ᱠᱟᱺᱰᱷᱩᱢ ᱵᱷᱮᱰᱟ
              ᱵᱚᱦᱚᱜ ᱞᱚᱞᱚ ᱜᱮᱛᱟᱭ ᱾
 ᱞᱟᱜᱟ ᱞᱟᱜᱟᱛᱮᱭ ᱠᱩᱴᱟᱹᱢ ᱠᱚᱣᱟ
              ᱡᱟᱸᱦᱟᱭ ᱢᱟᱱ ᱛᱟᱸᱦᱟᱭ ᱿

 

 ᱵᱟᱹᱥᱭᱟᱹᱢ ᱚᱠᱛᱮ ᱥᱟᱺᱡᱽᱞᱤ ᱦᱟᱛᱚᱢ
               ᱡᱚᱡᱚᱜ ᱠᱟᱱᱟᱭ ᱨᱟᱪᱟ ᱾
 ᱠᱟᱺᱰᱷᱩᱢ ᱵᱷᱮᱰᱟ ᱟᱪᱠᱟ ᱦᱮᱡᱛᱮ
               ᱠᱩᱴᱟᱹᱢ ᱛᱟᱭᱟᱭ ᱢᱚᱪᱟ ᱾᱾

 

 ᱵᱷᱸᱫᱟᱹᱲᱮᱱᱮ ᱥᱟᱺᱡᱽᱞᱤ ᱦᱟᱛᱚᱢ
               ᱨᱟᱹᱯᱩᱫ ᱮᱱ ᱛᱟᱭ ᱠᱟᱴᱟ ᱾
 ᱵᱮᱨᱮᱫ ᱠᱟᱛᱮᱠᱚ ᱧᱮᱞᱛᱟᱭ ᱟᱨᱡᱚᱸ
               ᱵᱟᱹᱱᱩᱜ ᱛᱟᱭᱜᱮ ᱰᱟᱴᱟ ᱿

 

 ᱡᱟᱺᱡᱷᱤ ᱦᱟᱲᱟᱢ ᱨᱟᱹᱜᱤ ᱡᱟᱞᱟᱛᱮ
                ᱛᱚᱞ ᱠᱮᱫᱮᱭᱟᱭ ᱵᱷᱮᱰᱟ ᱾
 ᱜᱟᱯᱟᱭ ᱨᱚᱯᱚᱜᱮ ᱦᱟᱹᱱᱤ ᱥᱟᱸᱣᱛᱮ
                ᱢᱮᱱᱟᱭ ᱵᱟᱭᱟᱨ ᱠᱟᱰᱟ ᱿

 

 ᱫᱚᱥᱟᱨ ᱦᱤᱞᱳᱜ ᱵᱟᱲᱮ ᱜᱚᱰᱟᱨᱮ
               ᱨᱚᱯᱚᱜ ᱠᱟᱰᱟ ᱵᱷᱮᱰᱟ ᱾
 ᱵᱟᱭᱟᱨ ᱠᱟᱰᱟᱫᱚᱭ ᱦᱟᱨᱮᱞ ᱮᱱᱟ
               ᱡᱤᱛᱠᱟᱹᱨᱮᱱᱮ ᱵᱷᱮᱰᱟ ᱾᱾

 

 ᱦᱟᱲᱟᱢ ᱟᱠᱟᱱᱮ ᱠᱟᱺᱰᱷᱩᱢ ᱵᱷᱮᱰᱟ
              ᱱᱮᱛᱟᱨᱫᱚ ᱵᱟᱭ ᱨᱚᱯᱚᱜ ᱾
 ᱵᱩᱨᱩᱢ ᱠᱚᱜ ᱟᱭ ᱯᱟᱸᱰᱮᱨ ᱵᱩᱴᱟᱹᱨᱮ
               ᱵᱚᱦᱚᱜ ᱚᱛᱨᱮ ᱡᱚᱯᱤᱜ ᱿

 

★★★★★★★★★★★★

৬।।

ᱜᱟᱛᱮ ᱜᱟᱯᱟᱛᱮ

ᱠᱤᱥᱠᱤᱱᱫᱷᱟ ᱢᱩᱨᱢᱩ

       

       ᱠᱩᱞᱦᱤ ᱵᱟᱞᱤ ᱫᱟᱠᱟ ᱩᱛᱩ
           ᱫᱮᱞᱟ ᱜᱟᱛᱮ ᱜᱟᱯᱟᱛᱮ,
               ᱮᱱᱮᱪ ᱠᱷᱤᱞᱳᱰ ᱟᱵᱳ
         ᱡᱚᱛᱚ ᱠᱚᱛᱮᱜᱮ ᱯᱟᱱᱛᱮ ᱾

  

              ᱫᱟᱹᱲ ᱫᱚᱱ ᱮᱱᱮᱪ ᱟᱵᱳ
                ᱥᱟᱱᱟᱢ ᱡᱚᱛᱚ ᱠᱚᱛᱮ,
     ᱮᱥᱠᱟᱨ ᱚᱠᱚᱭ ᱵᱟᱵ ᱪᱟᱞᱟᱜ
             ᱡᱷᱩᱲ ᱜᱟᱡᱟᱲ ᱦᱟᱱᱛᱮ ᱾
  

      ᱢᱤᱫᱛᱮ ᱟᱵᱳ ᱚᱞᱚᱜ ᱪᱟᱞᱟᱜ
              ᱪᱮᱫ ᱥᱮᱸᱲᱟᱭ ᱯᱟᱲᱦᱟᱣ ,
 ᱢᱤᱫᱛᱮ ᱢᱚᱡᱽᱜᱮ ᱛᱟᱸᱦᱮᱱ ᱟᱰᱤ
                  ᱚᱞᱚᱜ ᱵᱟᱵᱚᱱ ᱮᱲᱟᱣ

 

★★★★★★★★★★★★

৭।।

ᱚᱠᱟᱞᱮᱠᱟᱢ ᱯᱟᱲᱦᱟᱣ-ᱟ( ᱓)

ᱥᱤᱛᱮᱱ ᱢᱟᱱᱰᱤ

 

ᱳᱼ ᱠᱳᱞᱠᱟᱛᱟ ᱢᱟᱨᱟᱝ ᱱᱟᱜᱟᱨ.

 

ᱴ--ᱴᱟᱠᱟ ᱯᱩᱤᱥᱟ ᱡᱚᱛᱚ ᱠᱳᱭᱟᱜ ᱰᱚᱨᱠᱟᱨ.
ᱵ -ᱵᱤᱨ ᱵᱩᱨᱩ ᱵᱟᱵᱚᱱ ᱢᱟᱜᱟ.
ᱶ -ᱥᱟᱶᱦᱮᱫᱽ ᱵᱚᱱ ᱦᱟᱨᱟ ᱵᱩᱨᱩᱭᱟ.
ᱷ--ᱵᱷᱮᱜᱮᱫᱽ  ᱵᱟᱵᱚᱱ ᱛᱟᱦᱮᱱᱟ.
•- ᱞᱟ•ᱫᱟ ᱞᱟ•ᱫᱟ ᱢᱚᱪᱟᱭ ᱢᱮ.
•- ᱠᱚ•ᱧ-ᱠᱚ•ᱧ ᱵᱟᱜᱤ ᱢᱮ.
~  ᱛᱟ`ᱦᱟ ᱨᱮᱛᱟ ᱱᱟᱱᱟᱛᱟᱨᱱᱟ.
- ᱥᱮᱨᱮᱧ ᱨᱮ ᱦᱤᱡᱩᱜ-ᱟ.
ᱽ ‌ ᱜᱚᱨᱚᱡᱽ ᱵᱟᱝ ᱵᱷᱟᱜᱤᱭᱟ.

★★★★★★★★★★★★

৮।।

ডিঁডৗড়ী বিলি

দুর্গাচরণ মুরমু

 

পুস মাগ রাবাং বঙ্গা
হুডিঞ সাঁহিচ্‌ সিঞ বেড়া,
গাদা হোড়ো দাল আকো
গিদরৗ কহঁ কৗমি সেড়া।

 

বাড়গে গডা জৗনুম দারে
ডিঁডৗড়ী জঃ থরে থপে,
গোলাট চুইলু গাদার বিলি
মজগে সিবিল চপে রপে।

 

আংগা তরা গিদরৗ হাড়াম
ছুটৗঃ আকো ডিঁডৗড়ী রুকু,
হালাং কাতে বিলি ডিঁডৗড়ী
ফৗতিয়ৗ রেক দহো উকু।

 

অড়াঃ ছাটকা মাড়ম চেতান
ডিঁডৗড়ী বিলি তাসে রহড়,
দাঃ তেতাং ডিঁডৗড়ী  লুবুঃ
জমাকো সিতুং কৗমি জহড়।

 

রহড় ডিঁডৗড়ী উতু সিবিল
সিড়ুব সিড়ুব তেম জমা,
বেনাও লেখান চৗটনী হুনাং
সিপ্‌ কাটুব্‌ হঁম হৗব্‌রুগা।

 

★★★★★★★★★

৯।।

বাবুরাম বেঞ্জামিন সরেন

দুগাই টুডু

 

সানাম কোগে লৗইয়ৗ কাথায়
          গোটা টাঁডি গেদ,
বাবুরাম বেঞ্জামিন সরেন
          ঞুতুম গেতায় আদ।

 

হাজারিবাগ ডুমুরিয়ৗ আতো
     জানাম লেনায় হানে,
অল বেলরে মনে মুরুক
         অৗডিয় হুদিস আনে।

 

মারে সেরেঞ গিদরৗ বৗউলি
        আয়মায় তুমৗল লেদা,
সান্তাড়ি সাঁওহেৎ হারা-বুরুরে
        মনেয় লাগাও লেদা।

 

বি.বি. সরেন বাহনা আতে
     সাঁওহেৎ এ চারচাও লেদা,
অনা ঞুতুম তেগে জৗসতি
       হড়কো বাডায় কেদা।

 

‘হড় হপনরেন পেড়া’ আরহঁ
       ‘পেড়া হড়’গে হেনাঃ
অনড়হেঁ অনল অলঃ গেচো
       ধুরৗও এ তাঁহে লেনা।

 

‘বুদ্‌ গৗরিয়ৗ’ ‘দিল গৗরিয়ৗ’
       বানার গে পতব কানা,
গিদরৗ সিলেবাসরে সেলেৎ
       পাড়হাও বাড়া লেকা।

 

‘মার্শাল রাকাব পুঁথি’ ভাগে
        ‘মার্শাল দিশম অনা,
‘ভাগে নমুনা’ ‘নাওয়া দিনগে’
         নাপায় পুঁথি মেনাঃ।

সান্তাড় সাঁওতা তালা রেদ
     এনেম কৗমি আনাঃ,
নাহাঃ নেতার হড়কো উনি
     উইহৗ্র ইদিয়ে কানা।

 

★★★★★★★★★★★

১০।।

খেল উতু দাকা

ভৗবরৗই সরেন(মেসকচ্)

 

জজ বূটৗ হেমাল উমুল
জারাল সিতুং নিরোন দিন,
আলে চুনুচ্, চুনকি বুডহি
দাকা উতু ইসিনাকিন।

 

বেনাও অৗকিন অড়াঃ দুয়ৗর
গৗই বিৎকিল কাডা গড়া,
বাপলা কওয়াকিন কান্ঠাড়
সাকাম বৗহু জাওয়ায় কড়া।

 

রৗপুৎ কেলহাৎ টুকুচ্ চেলাং
ইসিনঃ  জজ সাকাম দাকা,
নালহা তুমৗল কৗমি কুড়ৗয়
ঢালকা ঢেলা সাকাম টাকা।

 

তাঁহেন দক গড়া পেরেচ্
কঁন্দরি জ মেরম ভেড়া,
আরহঁ কঁড়বে লৗঠু দেরেঞ
বেনাও ঝিঁগৗ জ ডাংরি কাড়া।

 

তিনৗঃ বাংচং সিবিল হেড়েম
চাখা তরায় তৗকিন মেসে,
বিন বুলুং উতু লটপট
আরাঃ জজ কুদরুম রাসে।

★★★★★★★★★★

১১।।

কুনুওয়াঃ কুক্‌লী

ঠ্যেন্টা মুর্মূ

 

 

দুলৗড় রিনিজ্ বৗবু তালে
মেতা'য়ালে কুনু
নানা হুনৗর কুক্ লী ক'তায়
মু'রেমা তায় সুনূজ্ ।

  

অকারে য়োঞ তাহে কানা
চিকৗ কাতেঞ হেচ্ এন
বেড়া রাকাব্ সাঁওতে ইপিল
অকাতেক ছান্ এন ?

  

সিঞ দ চেদা সিতুং আ য়ো
ঞিন্দৗ চেদাঃ বাং
তোওয়া চেদাঃ পোন্ড গে ঞেলঃ
আরাঃ চেদাঃ মায়াং ?

  

গুড়দ চেদাঃ হেড়েম গেয়া
নিম খান্ দ হাড়হাৎ
বাড়গে কচা পেন্ডে মান
উতু চেদাঃ গারগাৎ ?

  

হাতম চেদাঃ হুডিঞ রেহঁ
হ হ আঞায় হাড়াম
অড়াঃ কাঁত'রে চেরচেটেজ্ দ
চিকৗ কাতেয় তাড়াম ?

  

ডুংরি চেদাঃ উসুল গেয়া
সেরমা চেদাঃ লীল
ঞিন্দৗ চান্দ চিকৗ কাতেয়
ঞামান গাতে  ইপিল?

  

আয়োয় মেতায় চেরেজ্ আতে
এ-য়া বৗবু কুনু
সোর তে হিজুঃ মেসে দেলা
জৎ কাতাম গিঞ সুনুজ্

 

নাপায় লেকা অলঃ মেসে
হারা হদঃ মেসে
সানাম কুক্ লী রেনাঃ তেলা
ঞামাম তবে রেসে ।

 

★★★★★★★★★

১২।।

পুশি

নিকোলাস  মারাণ্ডি

 

আলে অড়াঃরে লুতু পুশি
    মেনায় তালে আসুল ,
জম লৗগিৎ সানাম অকতে
    খজঃ আকুল বৗকুল ।

  

আড়াঃ সাকাম বায় জমা
    বায় জমা নিরৗমিস ,
সানাম অকতে উনিয় খজঃ
    জেল হাকো পিস ।

 

অকারেদম ঞামা দিনৗম
    জেল হাকো উতু ,
কৗমি খৗটুওয়ৗ বাং তায়
    ভাকায়ায় লৗটু লৗটু ।

★★★★★★★★★

১৩।।

জেঁগেদ্ জেঁগেদ্

সমরলাল  টুডু

 

মুরুৎ  বাহা এদেল বাহা
তিনাঃ চরক্  ঞেঁলঃ আহা
অনা খনহঁ  চরক্  যাঁহা
ফৗগুন  বঁগা  মুলুঃ  মাহা   ।

 
যাঁহা  ঞেঁলঃ  জেঁগেদ্  জেঁগেদ্
অনতে গেত  হড়ক বেঁগেদ্
লাসের ধিরিতে জাঁগা গেগেদ্
থপা খনাং কৗটুবে  ভেগেদ্   ।

 

চরক্  ঞেঁলতে  আলম্  লাহাঃ
এদেল  বাহাতে  নালোম  বাহাঃ
সানাম  বৗবু  মৗইতাক   নাহাঃ
আম  ঞেঁলতে  সাঁগিঞতেক  সাহাঃ  ।

 

সারজম  বাহা  মাতকম  গেলে
তারাল  বাসাল  তেরেল বেলে
বহঃ  উব্  রেমা সি তেলে
আদোম লৗইয়া  জমিঞকানক চেলে।

 

জেওয়েৎ  বঁগা  মাতকম  সারজম
নুকুওয়াঃ  কাথা  বাচম  আঁজম
যাঁহায়  মৗনমি গাডারেয় খাঁজম
উনকু  হড়গেত ডৗন  নাজম  ।

 

বির  গাজাড়  উজৗড়  কাতে
কোম্পানিদয় বলন  কানা রৗস্কৗতে
আমদ আদিম উডৗরেনাম ফাঁকাতে
ভুলৗও  হচয়েনাম  লাচ্ দাকাতে  ।

 

★★★★★★★★★★

১৪।।

চেঁড়ে

বাবলু সরেন

 

পতাম চেঁড়ে কুকু ডুবুর
পাওরা চেঁড়ে বাঃ বাকুর
কুইলি মাতয় কুহু কুহুই
কৗহু মাতয় কাঃ কাঃ
গিদরৗ ক আজম আকা দাপে
চেঁড়ে কওয়াঃ নংকা গে রাঃ ৷৷

 

★★★★★★★★★★★

১৫।।

গিদৗর  বৗউলী

সুচাঁদ  হাঁসদা

                     (১)

 

হাঁতি  ঠৗকুর  হাঁতি  ঠৗকুর ,
হড়ম  তামদ  লুকুর. ফুকুর ,
হাটাঃ  লেকা  আমাঃ  লুতুর ,
মু- তামদ  উকুর ?

 

                 (২)

 

পতাম  পতাম  পতাম ,
গাতেঃ  বাং  আতাম ,
তুকৗদ  অকা  রেতাম ,
গিদৗর দ উকুর  কতাম ৷

 

               (৩)

লিড়য়ং  লড়য়ং  লেঁডেত ,
অকাতে  কাঁডেত  মাডেত ,
বৗড়সি সৗনৗঞ আম আতেত ,
বতর  আমৗঞ  জটেত  ৷

 

          (৪)

 

আলেরেন  সাঁডি ,
রৗগিয়ায়  আডি ,
বৗনুঃ তায়া ইডি ,
চুপি তায়হঁ বাঁডি ৷

 

★★★★★★

১৬।।

ফুরগৗল

বাড়তাঙ সরেন

 

 শিকড়ি তেহেঞ তপাঃ এনা
       বৗনুঃ অকা বেড়া
রৗস্কৗ মনে রাড়াং রাড়াং
      ইস্কুল এহপ তরা।

 

মোবাইলরে অলঃ আকিল
     একাল বাচো সড়ম
সারা ঘৗড়িচ অড়াঃ তালা
      তাঁহেন মেসে দড়ম।

 

গাতে তেহেঞ গাদেল গাদেল
     খেলড গোডা তালা
অলঃ তালা ঘানে ঘানে
      রৗস্কৗ রিলৗমালা।

 

আয়মা লেকান মাচেৎ তালা
     নানা হুনৌর সাতাম
রৗস্কৗ আতে সেঁড়ায়ালে
    অটাঃ আতে সাকাম।

 

ইস্কুলরেগে মাজান দাকা
      মিৎ তেগেলে জম
সেচেৎ রেদ সানাম সরেস 
     একাল বালে কম।

 

রৗস্কৗ আতে পাড়হাঃ আলে
     হামেট আলে অৗকিল
পৗচীর সানাম সাহায়েনা
     আলে আডি তৗসিল ।

 

মাচেৎ কওয়াঃ দুলৗড় উমুল
     হেনাঃ আডি  বৗড়তি
সৗরি মৗনমী তেয়ার লৗগিৎ
      অনা গেচো লৗগতি।

  ★★★★★★★★★

১৭।।

তওয়া ডাটা

বিভূতি ভূষণ সরেন

 

আলে ছনাঃ হারা কানে
ঢিল আতায় ডাটা,
অকত্ রে বাং রৗপুৎ লেরে
মচারে আয়া সটা।

 

অমন আকাদে গেনেচ্ গেনেচ্
বাং কানা মটা,
বানার থারতে মেনাঃ আকাৎ
চাহাড়ী পেরেচ্ গটা।

 

নে চাঁদ মামা ' তওয়া ডাটা '
গিডিয়া সৗড়িম পারম,
দে চাঁদ মামা নাওয়া ডাটা
অডকায় রৗপুৎ তায়ম।

 

★★★★★মুচৗৎ★★★★★