ᱥᱳᱦᱟᱜᱤ

(ᱦᱩᱰᱤᱧ ᱢᱟᱪᱷᱟ ᱠᱟ.ᱦᱱᱤ)

ᱥᱳᱦᱟᱜᱤ

ᱜᱳᱯᱮᱥᱣᱚᱨ ᱢᱟ.ᱱᱰᱤ

ᱵᱮᱱᱟᱰᱤ ᱟᱛᱳᱨᱮᱱ ᱢᱟᱪᱮᱫ ᱥᱟᱜᱮᱱ ᱴᱩᱰᱩ ᱪᱤᱛᱨᱤ ᱜᱷᱩᱴᱩ ᱦᱟ'ᱥᱫᱟᱜ ᱵᱟᱠᱷᱳᱞ ᱨᱮ ᱥᱳᱦᱟᱜᱤ ᱵᱟᱯᱞᱟ ᱤᱫᱤᱭᱮ ᱞᱟ.ᱜᱤᱫ ᱮ ᱧᱮᱞ ᱤᱫᱤ ᱠᱮᱫᱮᱭᱟ | ᱠᱷᱩᱥᱤ ᱦᱚ'ᱭ ᱠᱷᱩᱥᱤ ᱪᱟᱞᱟᱣ ᱮᱱᱟ | ᱢᱮᱱᱠᱷᱟᱱ ᱥᱟᱜᱮᱱᱟᱜ ᱩᱢᱟ.ᱨ ᱫᱚ ᱯᱮᱜᱮ ᱢᱚᱬ ᱥᱮᱨᱢᱟ ᱥᱳᱦᱟᱜᱤ ᱠᱷᱚᱱ ᱟ.ᱰᱤ ᱵᱟ.ᱲᱛᱤ ᱜᱮ ᱛᱟ'ᱦᱮ ᱠᱟᱱ ᱛᱟᱭᱟ | ᱚᱱᱟᱛᱮ ᱥᱳᱦᱟᱜᱤ ᱫᱚ ᱵᱟᱯᱞᱟ ᱠᱟᱛᱮ ᱡᱤᱣᱤ ᱡᱩᱨᱤ ᱵᱮᱱᱟᱣ ᱞᱟ.ᱜᱤᱫ ᱨᱟ.ᱡᱤ ᱫᱚ ᱵᱟᱝ ᱛᱟ'ᱦᱮ ᱠᱟᱱ ᱛᱟᱭᱟ | ᱚᱲᱟᱜ ᱦᱚᱲᱟᱜ ᱪᱟᱯ ᱛᱮ ᱢᱩᱪᱟ.ᱫ ᱨᱮ ᱵᱟᱯᱞᱟ ᱮ ᱨᱟ.ᱡᱤ ᱮᱱᱟ | ᱚᱲᱟᱜ ᱦᱚᱲᱟᱜ ᱢᱮᱱ ᱫᱚ ᱱᱟᱦᱟᱜ ᱡᱩᱜ ᱨᱮ ᱢᱟᱪᱮᱫ ᱡᱟᱢᱟᱭ ᱴᱷᱮᱱ ᱫᱚ ᱪᱮᱠᱟᱛᱮᱢ ᱢᱮᱱᱟ ᱵᱟᱝ ? ᱡᱟᱢᱟᱭᱟᱜ ᱩᱢᱟ.ᱨ ᱫᱚ ᱵᱟ.ᱲᱛᱤ ᱜᱮ ᱛᱟᱭ ᱨᱮ'ᱦᱚ ᱪᱟ.ᱠᱨᱤ ᱢᱮᱱᱟᱜ ᱛᱟᱭᱟ | ᱟᱵᱚᱨᱮᱱ ᱠᱩᱲᱤ ᱜᱤᱫᱨᱟ. ᱜᱮ ᱦᱟᱯᱮᱱ ᱡᱚᱢ ᱧᱩ ᱥᱟᱱᱟᱢᱟᱜ ᱛᱮ ᱵᱟᱝ ᱮ ᱠᱚᱥᱴᱚᱜ-ᱟ | ᱟ.ᱰᱤ ᱱᱟᱯᱟᱭ ᱡᱤᱭᱚᱱ ᱮ ᱠᱷᱟ'ᱰᱟᱣ ᱫᱟᱲᱮᱭᱟᱜ-ᱟ |

ᱥᱳᱦᱟᱜᱤ ᱟᱨ ᱥᱟᱜᱮᱱ ᱥᱚᱝᱥᱟᱨ ᱜᱷᱟ'ᱨᱚᱡ ᱨᱮ ᱠᱤᱱ ᱵᱚᱞᱚᱭ ᱮᱱᱟ | ᱥᱳᱦᱟᱜᱤ ᱦᱚᱨᱚᱜ ᱵᱟ'ᱫᱮ ᱡᱚᱢ ᱧᱩ ᱛᱮᱭ ᱯᱮᱨᱮᱡ ᱮᱱᱟ | ᱡᱟ'ᱦᱟ ᱜᱮᱭ ᱢᱮᱱ,ᱚᱱᱟᱜᱮᱭ ᱧᱟᱢᱟ | ᱢᱮᱱᱠᱷᱟᱱ ᱥᱳᱦᱟᱜᱤᱭᱟᱜ ᱦᱟ.ᱞᱤ ᱡᱩᱣᱟ.ᱱ ᱦᱚᱲᱢᱚ ᱨᱮᱱᱟᱜ ᱫᱟᱜ ᱛᱮᱛᱟᱝ ᱫᱚ ᱯᱩᱨᱟ.ᱯᱩᱨᱤ ᱵᱟᱝ ᱢᱮᱴᱟᱜ ᱠᱟᱱ ᱛᱟᱭᱟ | ᱥᱳᱦᱟᱜᱤᱭᱟᱜ ᱛᱮᱛᱟᱝ ᱢᱮᱴᱟᱣ ᱩᱛᱟ.ᱨ ᱫᱷᱟ.ᱵᱤᱡ ᱥᱟᱜᱮᱱᱟᱜ ᱩᱱᱟ.ᱜ ᱫᱟᱜ ᱵᱟᱝ ᱛᱟ'ᱦᱮ ᱠᱟᱱ ᱛᱟᱭᱟ | ᱟᱭᱟᱜ ᱫᱩᱠᱷ ᱚᱠᱚᱭ ᱴᱷᱮᱱᱮ ᱞᱟ.ᱭᱟ | ᱯᱟ'ᱡᱟ ᱛᱮ ᱵᱟᱝ ᱮ ᱧᱟᱢᱟ | ᱩᱱᱤᱭᱟᱜ ᱢᱚᱱ ᱫᱚ ᱰᱟ:ᱜᱣᱟ. ᱞᱮᱠᱟ ᱜᱮ ᱩᱰᱟ.ᱭ ᱵᱟᱲᱟᱭ ᱠᱟᱱ ᱛᱟᱭᱟ | ᱢᱚᱱᱮ ᱦᱩᱭᱩᱜ ᱛᱟᱭᱟ ᱚᱠᱚᱭ ᱴᱷᱮᱱᱤᱧ ᱪᱟᱞᱟᱜ-ᱟ ? ᱪᱟᱞᱟᱣ ᱞᱮᱱ ᱠᱷᱟᱱ ᱡᱩᱶᱟ.ᱱ ᱨᱮᱱᱟᱜ ᱫᱟᱜ ᱛᱮᱛᱟᱧ ᱤᱧ ᱢᱮᱴᱟᱣ ᱩᱛᱟ.ᱨᱟ | ᱱᱚᱝᱠᱟ ᱟ.ᱦᱤ ᱵᱷᱟ.ᱵᱤ ᱨᱮᱭ ᱛᱟ'ᱦᱮᱱᱟ | ᱢᱮᱱᱠᱷᱟᱱ ᱥᱟᱦᱚᱥ ᱜᱮ ᱵᱟᱝ ᱮ ᱧᱟᱢᱟ | ᱪᱮᱫᱟᱜ ᱥᱮ ᱱᱤᱛ ᱫᱚ ᱢᱤᱫ ᱜᱷᱟ'ᱨᱚᱡ ᱠᱤᱥᱟ.ᱲ ᱚᱲᱟᱜ ᱨᱮᱱ ᱢᱤᱫ ᱵᱟ.ᱦᱩ ᱠᱩᱲᱤ | ᱯᱟᱲᱟ ᱯᱩᱲᱥᱤ ᱟᱛᱳ ᱦᱚᱲ,ᱟᱯᱟ ᱵᱟᱨᱮ ᱢᱚᱱᱮᱭ ᱟᱠᱚ ᱟ.ᱰᱤ ᱥᱩᱠᱷ ᱨᱮ ᱢᱮᱱᱟᱭᱟ | ᱩᱱᱤᱭᱟᱜ ᱚᱱᱛᱚᱨ ᱵᱷᱤᱛᱟ.ᱨ ᱨᱮ ᱢᱚᱜᱚᱫ ᱢᱚᱜᱚᱫ ᱡᱩᱞᱩᱜ ᱵᱩᱨᱥᱤ ᱥᱮ'ᱜᱮᱞ ᱫᱚ ᱚᱠᱚᱭ ᱜᱮ ᱵᱟᱝ ᱠᱚ ᱧᱮᱞ ᱧᱟᱢ ᱫᱟᱲᱮᱭᱟᱜ ᱠᱟᱱᱟ | ᱚᱱᱠᱟ ᱚᱱᱠᱟ ᱛᱮᱜᱮ ᱵᱟᱨ ᱥᱮᱨᱢᱟ ᱛᱟᱭᱚᱢ ᱮ ᱜᱤᱫᱟ.ᱨ ᱮ'ᱜᱟᱛ ᱮᱱᱟᱭ | ᱜᱤᱫᱟ.ᱨ ᱮ ᱦᱟᱨᱟ ᱩᱢᱮᱨ ᱮᱱᱟ | ᱩᱢᱟ.ᱨ ᱦᱚ" ᱪᱟᱞᱟᱣ ᱤᱫᱤᱭᱮᱱ ᱛᱟᱭᱟ | ᱚᱱᱟᱛᱮ ᱜᱳᱴᱟ ᱡᱩᱶᱟ.ᱱ ᱩᱢᱟ.ᱨ ᱢᱚᱜᱚᱫ ᱢᱚᱜᱚᱫ ᱥᱮ'ᱜᱮᱞ ᱛᱮᱭ ᱞᱚᱣ ᱟᱠᱟᱱᱟ | ᱚᱱᱟ ᱢᱚᱜᱚᱫ ᱥᱮ'ᱜᱮᱞ ᱤᱲᱤᱡ ᱪᱟᱵᱟ ᱩᱛᱟ.ᱨ ᱞᱟ.ᱜᱤᱫ ᱥᱟᱜᱮᱱᱟᱜ ᱩᱱᱟ.ᱜ ᱫᱟᱜ ᱵᱟᱝ ᱛᱟ'ᱦᱮ ᱠᱟᱱ ᱛᱟᱭᱟ| ᱚᱱᱟᱛᱮ ᱥᱳᱦᱟᱜᱤ ᱯᱩᱨᱟ. ᱡᱩᱶᱟ ᱱ ᱩᱢᱟ.ᱨ ᱵᱩᱨᱥᱤ ᱥᱮ'ᱜᱮᱞ ᱞᱮᱠᱟ ᱚᱱᱛᱚᱨ ᱠᱚᱲᱟᱢ ᱵᱷᱤᱛᱟ.ᱨ ᱞᱚᱣ ᱟᱠᱟᱱ ᱛᱟᱭᱟ | ᱚᱱᱟ ᱞᱚᱜ ᱨᱮᱱᱟᱜ ᱥᱟᱥᱮᱛ ᱫᱚ ᱟᱡ ᱜᱮᱭ ᱟ.ᱭᱠᱟ.ᱣ ᱟᱠᱟᱫᱟ |