আবোওয়াঃ ডিডিটাল ডেস্ক – ভারত জাকাত সানতাড় পৗঠুওয়ৗ গাঁওতা আঃ মিৎ বেড়া রেনাঃ ওয়েবনার তালাতে ফেক এসটি সার্টিফিকেট লৗইতে রড়দারাম আখড়া হলা ২৫ জুলাই হুয় পারমেনা। ঞেল এনা নোওয়ারে সেলেদ্ লেন পৗঠুওয়ৗ গাঁওতারেন গৗখুড়িয়ৗকো নিতরেন পৗঠুওয়ৗ আর যুওয়ৗন কো লৗগিৎ জিউয়ি-মায়াং হেডেজঃ লেকান দিশ-হুদিশ কো চাল আৎ কোওয়া। অনা সাঁওতে ফেক এসটি সার্টিফিকেট কেলেঙ্কারী লৗইতেহঁ অড়ে-অড়পাৎ কো গালচ্ কেদা মেনতেগে বাডায় আকানা।
গাপালমারাও এহব রেগে মানতান মহেন্দ্র সরেন এ লৗই কেদা বাংমা নাহাঃ পৗঠুওয়ৗ কো তেহেঞ বাডায় অচো লৗগ্তি কানা ফেক এসটি সার্টিফিকেট চেদ্ কানা আর নোওয়া রেনাঃ হাপেন নোওয়া লৗইতে চেৎ বৗড়িচ্ অরসং হেচ্ দাড়েয়াঃআ। মানতান সরেন গোমকে পৗঠুওয়ৗ কো দিশৗতে মিত মুড়ুৎ কাথায় রড় তরা কেদা-“সেচেদঃ মে, সামটাঃমে, লৗড়হৗই মে”।
আখড়ারে সেটের তাঁহেকান মানতান শৈলেন বেসরা দ নিতৗ কোভিড সাঁও নোওয়া ফেক এসটি সার্টিফিকেট এ তুলুজ রাকাব আকাদা। হাপেন কোভিড লেকাগেকো সাঁগে চালাঃ কানা ফেক এসটি সার্টিফিকেট অৗমরৗও এৎ অ-আদিবাসী কো। মানতান বেশরা গোমকে রড় রাকাব কেদায় বাংমা নোওয়া ফেক এসটি সার্টিফিকেট লৗইতে তেহেঞ চৗকরি জীবি কো যাঁহা লেকাকো লৗড়হৗই কানা অনকালেকাদ পৗঠুওয়ৗ কো বাংকো লাহা হিজুঃ কানা। নোওয়াদ আডি দুখ মেনতেয় মনেয়াকাদা মানতান বেশরা।
পৗঠুওয়ৗ গাঁওতা রেন ফাউন্ডার প্রেসিডেন্ট মানতান সুশান্ত সরেন এ রড় কেদা- আইএস, আইপিএস লেকান আপিসার কহঁ তেহেঞ কো ফেকঃ কানা। এনখান ওনকো গেতো ফেক এসটি সার্টিফিকেট কো ইস্যুয়েদা। মানতান সরেন গোমকে কুকলি রাকাব আকাদায় বাংমা আদিবাসি তালাখন গে ফেক সানতাড়, ফেক মুডৗ, ফেক ওঁরাও এমান ওনকোগে ফেক আদিবাসী বাংকো বেনাঃ কানাতো ? অনাবেগর আর হঁয় বাঁখেড় কেদা- পছিম বাংলারে নুনৗ এসসি এসটি এম.এল.এ., এম.পি তাঁহেন তুলুজ্ বিধান সভারে ফেক এসটি সার্টিফিকেট লৗইতে ওনকোওয়াঃ মিৎ টাং হঁ রড় বাং আঁজমঃ কান তাকোওয়া। এনখান নংকারেদ চিকৗলেকারে ফেক এসটি সার্টিফিকেট অৗমরৗও কদক কমঃ আ মেনতেহঁ কাথায় রাকাব আকাদা।
নঁতে নৃপেন চন্দ্র মান্ডি দ ভারত জাকাত সানতাড় পৗঠুওয়ৗ গাঁওতা আঃ নানাহুনৗর কৗমি আগুওয়াদ দিন করেনাঃ কাথাকোয় সাব রাকাব কেদা আয়াঃ বাঁখেড় তালাতে। অনাবেগর আয়মা লেকান সাঁওতা কৗমি রেহঁ পৗঠুওয়ৗ গাঁওতায় লাহা হেচ্ আকানা। মানতান মান্ডি গোমকে রড় তরা কেদায় বাংমা নানাহুনৗর ইউনিভার্সিটি রে যাঁহাতিনৗ ফেক এসটি কো ঞেলঃ কানা উনকু বিরুধরে লাড়াওনা গাঁওতায় এহব আকাদা মেনতেহঁয় সদর আকাদা।
মুচৗৎরে সানাম গালচিয়ৗ আঃ মচা খনগে বাডায় ঞাম এনা বাংমা নোওয়া ফেক এসটি সার্টিফিকেট লৗইতে পৗঠুওয়ৗ কো আর জুওয়ৗন কো আরহঁ বৗড়তি কায়তে লাহা হিজুঃ হোয়োঃ তাকোওয়া। অনা সাঁওতে আদিবাসী এম.এল.এ., এম.পি কঁহ বিধানসভারে কডরা রড়দারাম লৗগতি কান তাকোওয়া। অনাবেগর ফেক এসটি সার্টিফিকেট অৗমরৗও আকাদ কোওয়াঃ শাসেৎ ঞাম রেনাঃ বন্দেজ হাতাও হোয়োঃ আ।
নোওয়া ওয়েবনার আখড়া চাচালাও ইচ্ লেকাতে এহব খন মুচৗৎ হৗবিচ্ তাঁহেকানায় মানতান লালচাঁদ সরেন। মানতান সরেন গোমকেদ ভারত জাকাত সানতাড় পৗঠুওয়ৗ পাহটা খন সাপড়াও লেন ওয়েবনার আখড়া ঞেল আর আঁজম সাঁগে লৗগিৎ সানাম ঞেঞেলিয়ৗ কো গুনাওমানাও সারহাও এ চাল আকাৎ কোওয়া।
.webp)
.webp)
