আবোওয়াঃ ডিজিটাল ডেস্ক- সনগিরি হেম্ব্রম দ ভারত জাকাত মাঝি পারগানা মহল বাঁকুড়া জেলা পাহটা খন জেলা পারানিক পাটা খন জিরৗও কো এমাদেয়া মেনতে বাডায় ঞাম এনা।
বাডায় আকানা পারমেন ২ জুলাই হিলঃ বাঁকুড়া জেলা কুমুট আঃ মোবাইল কনফারেন্স তালাতে সনগিরি হেম্ব্রম দ জেলা পারানিক পাটা খন জিরৗও কো এমাদেয়া। অজে লেকাতে বাডায় আকানা বাংমা জেলা পারানিক সনগিরি হেম্ব্রম হপন ডাঃ সরন হেম্ব্রম আঃ বে-সাঁওতা আরি কৗমি মেনেৎ ছৗতিক কুড়ি সাঁও বাপলা খৗতির গে নংকান কাথা কো ঠাড় গটা কেদা। চেদাঃসে সনৎ-সৗরি সৗরয়ৗড়ান সানতাড় সাঁওতা কলসা লটম কাতে নিরঘিন বে-সাঁওতা আরি কৗমি দ মহল তিস হঁ বায় এ সায় এমঃ আ মেনতে ভারত জাকাত মাঝি পারগানা মহল বাঁকুড়া জেলা পাহটা খন গে বাডায় আকানা। আর সাঁওতা গানাডি তালম পারম লেকান কৗই রেনাঃ বিচৗর দ ডাঃ সরন হেম্ব্রম রেন আতো মাঝি বাবা গেকো লাদেয়েদা মেনতেগে বাডায় আকানা।
নঁতে শোস্যালমিডিয়ারে নাঁহা শিখনৗৎ কড়া-কুড়ি ছৗতিক কুড়ি-কড়া সাঁও সৗগৗই দহ কাতে বাপলা কান খৗতির আয়মা সাঁগে হড় গে সান্তাড় সমাজ বৗড়িজঃ কান কাথা গেকো রড় রাকাব আকাদা। নোওয়া ইদিকাতেৎ আদম কদ নাঁহা শিখনৗৎ কড়া-কুড়ি গেকো দৗয়িয়েৎ কোওয়া আদম কদ ওনকো কড়া-কুড়ি রেন গ-বাবা, আদম কদ আরহঁ সাঁওতারেন খাম খুন্টি মাঝি বাবা, পারগানা সে সাঁওতা বেবসথা হঁক দৗয়িয়েদ্ গেয়া।
লৗই গানঃ আ সেদায় হঁ নংকান ঘটন হাঁডে নাঁডে ঞেল আকান রেহঁ নাহা দ আরহঁ বৗড়তি চালাঃ কানতে সাঁওতারেন আয়মা গ-বাবা গে নিৎ মলং রেকো চাপো গৎ আকানা। অকয় হঁ জোরতে বাংকো লৗই দাড়েয়াঃ কানা হাপেন ফানলা রেন হপন সে হপন এরা তিসহঁ বায় অডক চালাঃ আ মেনতে? বাং শিখনৗৎ আন কো মুদ্রেদ নংকান ঘটন দ বাং লেকাগে ঞেল আকানা। তবে চেৎ নাঁহারেন শিখনৗৎ কড়া-কুড়ি সে বাবু-মৗই তাকো শিখনৗৎ বৗড়তি কান তেগে নংকা কো কৗমিয়েদা সে সাঁওতারেনাঃ যথাৎ শিখনৗৎ অনকা মাছা বাংকো ঞাম এদা মেনতে নংকা কো কৗমিয়েএদা ? নংকান কুকলি দ আয়মা হড়াঃ বহরেগে নিৎ আচুরঃ কানা।
শোস্যালমিডিয়ারে নংকান ঘটনরে হৗনি-নুয় দোষ গিডি কায় রেনাঃ কাথা কোগে বৗড়তি ঞেল ঞামঃ কানা। নোওয়া রেনাঃ সলহে ডাহার লৗইতেদ অনকা মাছা রড় বাং লেকাগে ঞেলঃ কানা। তবে চেৎ নিয়ৗবেড়ারে আপনার রেন বাং কান খৗতির গে আয়মা হড় আপনার হড়ম সে সনমান কো বাঞ্চাও এদা? নংকান কুকলি হঁ হিজুঃ কান গেয়া। বাডায়ঃ আ মিৎ টাং মাচেৎ, মিৎ টাং ইঞ্জিনিয়ার, মিৎ টাং ডাকতার সে মিৎ টাং আপিসার বেনাও তায়মরে গ-বাবা আঃ অসাম্ভেরড় এনেম মেনাঃ আকাদা। যাঁহারে সাঁওতারেনাঃ এনেম হঁ জনড়াও মেনাঃ আ। লৗই গানঃ আ অনাতেগে সাঁওতা হঁ গরব এ আটকারা। আর যখন মিৎ মিৎতে নংকান ডাকতার, ইঞ্জিনিয়ার, আপিসার, মাচেৎ কো সাঁওতা রেনাঃ বে-বৗড়িচ্ কো কৗমিয়া উনদ সাঁওতা হঁ অনা দুকতে দুকঃ আয়।
অনাতে নিৎ আয়মা হড়গে নোওয়া রেনাঃ সলহে কো পাঁজায়েদা। আর বাংখান ঞেল ঞেলতে মিৎ দিন রিলৗমালা সাঁওতা অগম দরয়া দাঃরে বুহেলঃআ। উনদ ঞেলঃ গঃ আ আয়মা হড় গে বহঃ তুল কাতে বাংকো তাঁহে দাড়েয়াঃ কানা। উনদ নুনৗ গরবান সাঁওতা গে অকয় লৗইতে গরবে আটকারা ? আয়মা হড়ঠেন গে নংকান কুকলি দ নিৎ লাখ লাখ টাকা রেনাঃ গে কানা।
