আবোওয়াঃ ডিজিটাল ডেস্ক- পুরুলিয়া জেলা আড়শা থানারে মেনাঃ ভ্রমরবেড়া আতোরেন পরমেশ্বর মাঝি (কিস্কু) দ আর বৗনুগেয়া। বাডায় আকানা পারমেন ৩ জুলাই আচকাগে বঁগা তালায়েনায়। বঁগা তালারেনাঃ অজেদ নিৎহঁ বাং বাডায় আকানা। উমের দ হুয় লেন তায়া ৪২ বছর লেকা। অড়াঃরে আচ্রেন অড়াঃ গমকে সাঁওতে মিৎ কড়া আর মিৎ কুড়ি গিদৗর এ বৗগি হট আদ্ কোওয়ায়।
বাডায় আকানা পরমেশ্বর মাঝি (কিস্কু) দ আপাসুলঃ লেকাতে মধ্যপ্রদেশ রে আইটিবিপি লেকাতে বাহালে তাঁহেকানা। মাড়াং দিন মেনেৎ ২ জুলাই অড়াঃরেন অড়াঃ গমকে আর গিদৗর-পিদৗর সাঁও ফোনতে নাপায় গেয় রপড় লেন তাঁহেকানা। মেনখান দশার দিন ৩ জুলাই আচ্কাগে বাডায় কেদাকো পরমেশ্বর মাঝি আর বৗনুগেয়া।
উনি লৗইতে বাডায় আকানা বাংমা উনিদ আতোরেনাঃ ‘আড়দু উনুইহৗর গাঁওতা’ মিৎ গিদ্রৗ লেকাগেয় দুলৗড় আৎ তাঁহেকানা। গাঁওতা আর সাঁওতা রেনাঃ সানাম লেকানা কৗমিরে গড়-সপহৎ এ এম চাল এৎ তাঁহেকানা। সুসৗরিয়ৗ মন গটা হড়ম মায়াং রে মেশা তাঁহেলেন তায়া মেনতেহঁ বাডায় আকানা।
তেহেঞ ৭ জুলাই সেনাবাহিনী আঃ অৗরি লেকাতে কফিন বন্দি কাতেৎ জানাম আতোতে উনিয়াঃ হড়ম সেটের এন তায়া। আতো হড় খন এহব কাতে পেড়া-পৗরবৗ সোর-সোপোর রেন আয়মা হড় গে উনিয়াঃ মুচৗৎ হড়ম ঞেল লৗগিৎ কো দৗড় সেটের লেনা। ‘আড়দু উনুইহৗর গাঁওতা সাঁওতে ভ্রমরবেড়া আতো মিৎ বীর সেনাঃ কো আদ্ কেদে খৗতির গটা আতো হড় তালারেগে গৗহির দুখ উমুল চিতৗর ঞেল এনা।
