ফুরগৗল লৗড়হৗই রেন বীরবান্টা কো
কিস্কিন্ধ্যা মুরমু
চেদাঃ দরে সিধু
মায়াম তেদম নুমেন ?
চেদাঃ দরে কানহু ,
হুল হুলেম মেমেন ?
জৗত ভায়ক লৗগিৎ হায়রে
মায়াম তে দঞ নুমেন,
সুদ খোর মহাজন হায়রে
দিসম দক সিবড় চাবা কেৎ ।
নাহাচার কচলন সাসেৎ যে হিলোঃ খন এতহব আকানা। উন খনগে রৗগি তৗপিস্ হালা হাতাও রেনাং তেতাংতে হড়ম সির টাটাও আকানা। সিঞঅৎ (ভারত ) দিসমরে ইংরেজ ব্রিটিষ রাজ লেদাক আয়মা দিন। ধন-মৗন অৎ-হাসা গৗয় ডাংরা মিহু মেরম সানাক ক সিবোড় ইদিয়েৎ তাঁহে। বাক ঞামলেখান সান্তাড় চেতান নাহাচার কচলন এতহব তাঁহে। ব্রিটিষ তিরে শাসন তাঁহে কানতে যাঁহা লেকা মনে অনকা করাও আকাদা ।
হড় হপন তিরলৗ গিদৗর পিদৗর ঞেল সাহাও আকাদা। মেনখান সাসেৎ আদ বাং সাহাঃ কানা ইংরেজাঃ রাজ বিরুদরে লৗড়হৗই রেনাং অকত সেটের আকানা হুল রেনাং....হুলসৗই রেনাং। মিৎ মিৎতে উপেল এনাক হুলগৗরিয়ৗ বীরবান্টা তিলকৗ মুরমু ( মৗঝি),সাম পারগানা ,সিধু মুরমু ,কানহু মুরমু ,চাঁদ মুরমু ,ভৈরব মুরমু ,ফুল ,ঝান ,গারভু মৗঝি ,লক্ষন,চাঁদরায়,বীরবান্টা বৗজৗল,হাড়মা দেশ মৗঝি, চৗমপৗয়,বিরসৗ মুন্ডৗ এমান ।
মায়াম লল আকান তাকওয়া ইংরেজ সাসেৎ বিরুদরে।
তিলকৗ মুরমু (মৗঝি) উন জহঃ কোম্পানি আমলা কওয়াঃ সাতাও আর কচলন খন সাধিন ঞাম লৗগিৎ তিলকৗ ঠেন ক'নেহর লেনা।
তিলকপুর রেন মৗঝি লেকাতেয় বাহাল লেনতে "তিলকৗ মৗঝি "হঁ ক মেতায় কান তাঁহেকানা। আতো আতো দাঁড়া কাতে কোম্পানী আমলা কওয়া কাথা আদিবাসী কওয়াঃ হক রেয়াঃ কাথা পাসনাও লেদা।
১৭৮১ সালরে বৗনিয়ৗজড় খন ব্রিটিষ রাজ বিরুদ লৗড়হৗই লৗগিৎ ঢৗওরৗ লেদা।
ভাগলপুর আর দৗমিনরে ব্রিটিষ ফৗদ সাঁওতেয় লৗড়হৗয় কেদা। ১৭৮৪ জানুয়ারী চাঁন্দো ব্রিটিশ ফৗদ সাঁওতেয় তুপুৎ এনা। ইনৗ সাল রেনাংগে গেলপে জানুয়ারী হিলোঃ তালেদারে দানাংখন কালেক্টর কিলিবলেন্ড সাহেব তুঞ কেদেয়া। সাহেব দয় গজ উতৗর রেনা। নিয়ৗ ঞিদৗগে আয়ারকুট আর সেনাপতি জারাওয়া আযুরতে ঞিদৗ ব্রিটিশ ফৗদ ক সেটেরেনা। লৗড়হৗইরে তিলকৗ দয় সাব হচয়েনা। তি-জাঙগা তল কেদেতে পোনয়া সাদম সাঁওতে তল কাতে গটা ভাগলপুর আচুর কেদেয়া। বায় গজ লেনতে বাড়ে দারে রেক পৗসি কেদেয়া ।
লৗড়হৗইগে বানচাউ তাঁহেন রেনাং হর ডাহার।' সাম টুডু ' দ আতু তল হাটরেন পারগানায় তাঁহেকানা।
হড় হপন সুদখোর কঠেন আলক এড়ে হচঃমা নওয়ায় খজ তাঁহে।
পারগানা অৗকিলান আর গৗহির হুদিসান কানতে লৗড়হৗই রে চেৎ চিকৗঃআ আটকার দাড়েয়াৎ তাঁহে কানা।
পিয়ালপুর লৗড়হৗইরে গুলি বাজাও আদেতে কৗহিলেনা নওয়া রেগে জিউয়ী বৗতিহঁ ইড়িজ এনতায়া ।
দিসমরেন মানওয়াক ফুরগৗল আগু আকো লৗগিৎ সিধু আর কানহু মুরমু হঁ তায়নম রেদ বৗকিন তাঁহে লেনা। আঃ সার,কৗপি ,তারওয়াড়ে সাপাপ আতে হুলসৗই কিন এতহব কেদা ১৮৫৫ সালরে। লাড়াওনা এতহব কেদা ইংরেজ বিরুদরে। সিধু দ আজ বয়হা তাক সেলেৎ ফৗদ আতে সিপৗহি ক সাঁগে ১৫.৭.১৮৫৫ হিলোঃ লৗড়হৗই এনা। সাগারামপুর লৗড়হৗই রেদ জিৎকৗর এনা।
পেয়ালামপুর রেহঁ ফৗদ সাপড়াও ইদিকেৎ কওয়া ঘাটামার লৗড়হৗই এনা । সিধু দ ১৯.০৮.১৮৫৫ মৗহিৎ হিলোঃ ক সাব কেদেয়া।
রাজ বিরুধ লৗড়হৗই , লুট, দারগা মহেশ লাল গজ লেদে রেয়াঃ দুসি কেদেয়া। গটায়েনা পৗসি এয়া ,বীরবান্টা লেকা জিউয়ীয় আলায় কেদা। কচলন আর সিবড় অচঃ লৗগিৎ হুলসৗই উদগৗউ রাকাব লেনা ।
হুলসৗই লেতাড় ইদিরে কানহু হঁ জিওয়ী মনে আলায় কাতে এনায়। সিধু অৗডি লেকান কৗমিরে সপহৎ লেদেয়া। লৗড়হৗই রেন ফৗদক অৗচু বাতলাও লেৎ কওয়ায়।
সুদখোর মাহাজন আর পুলিস দারোগা কওয়াঃ কচলন বিরুদ তিগু দারাম লেনা কিন বানার মিৎতে। 'দারোগা হাকিম সরকার জত কওয়াঃ একতিয়ৗরি চাবায়েনা হড় হপনাঃ রাজ হেজ এনা' - বীরবান্টা মনে লেদাকিন।
চাঁদরায়ে গজ গুরেন তায়নম কানহু হুদিস হেজ আদেয়া। তারওয়াড়িয়ে সাব কেটেজ কেদা পালটন ক ভিঁদৗড় কেৎ কওয়া।
সিপৗহি গুলি ক আড়াঃ কেদা কানহুগে পাড়াও আদেয়া, ঘৗল এনায় । নংকা কাতেগে মিৎটাং বীরবান্টা জিউয়ী নাসাও এনা। ফুরগৗল লৗড়হৗই রেনাং নাগামরে হুলগৗরিয়ৗ লেকাতে যাযুগ জিয়ৗড়ে তাঁহেয়েনা ।
কচলনতে জালে থালে চাবা আকান চাঁদ (চাঁদ মুরমু ) বুঝৗও তেবাঃ লেদা। সান্তাড় হুলরে ফৗদ ক চাচলাও লেৎ কওয়া।
সিধু কানহু তৗকিন ১৮৫৫ রেনাং হুলরে সহৎ লেৎকিনা।
ইংরেজ সাবকেদেতে হাজতরেক ভরাও কেদেয়া ।
সিধু কানহু চাঁদ সাঁওতেগে ভৈরব (ভৈরব মুরমু) হঁ হুল লৗড়হৗই রেয় সাঁওতে লেনা। ঞেল এদায় ইংরেজ ঠিকৗদার আতো ফেড করে গেক ডেরাঃ কানা।
অৗত ঞাম লেখান সিম মেরম গেডে ক ইদিয়েৎ তাঁহে কানা।
তিরলৗ হপন কহঁ ছিনগৗউ ইদিয়েৎ তাঁহে কানা। নাহাচার কচলন রেনাং সিমৗ যখজ সারেড়ঃ কানা হুলগৗরিয়ৗ হুলে সালগাও লেদা ।
গৗরভু মৗঝি দ বিনৗ দোষ তেয়ে সাব কেদেয়া।
সাসেতঃ কাথা দিসৗ কাতে উসৗরা কৗপিতে কেনারাম হুবাঃ ভিদৗড় কেদেয়া।
দারোগা হঁয় মাঃ ভিদৗড় কেদেয়া।
সিধু কানহু হুলকিন হহ সাডে কেদা - "হুলদ এহব এনা। দারোগা হাকিম সরকার জত কওয়া একতিয়ৗরি দ চাবায়েনা। হড় হপন কওয়াঃ রাজ হেজ এনা ।"
'লক্ষণ 'দ পারানিক তাঁহে কানা।
হাড়মা মৗঝি রেন ঞেঞেলিয়ৗ কানায়। হাড়মা বাতলাও কৗমি লক্ষণ গেয়ে পুরৗও কেয়া।
ফৗদ কহঁয় অৗয়ুর লেৎ কওয়া।
সাম পারগানা সাঁওতেয় তাঁহে কানা। ফৗদ ক অৗয়ুর সুতুঃ কাতে সিপৗহি বিরুদ লাড়াও লেনায়।
'হুল ' লৗড়হৗইরে সিধু কানহু তৗকিন দ দিলগৗরিয়ৗ,সিকৗরিয়ৗ ' চাঁদরায়' অৗয়ুরিয়ৗ কিন বাছাও কেদেয়া।
ফৗদ আতে লিল চাসা সাহেব সাঁও তে লৗড়হৗই কোল কেদেয়া। অকালেকান লৗড়হৗই লেনখান দাঃড়েয়া আডি বেসে বাড়ায় তাঁহে কানা। আডি কম কুড়ৗয়তে লিল চাস কৗমিক কৗমি অচোয়েৎ তাঁহেকানা।
বাক কৗমি লেখান কচলন তাঁহে ।
হপন এরা মিসরৗক ঞেল তেক কাঁড়াঃ কান তাঁহে।
চাঁদরায় দ পেয়ালপুর লৗড়হৗইরে ঠু কেদেতে জিউয়ী নাসাও এনতায়া ।
কচলন সিবড় আর বে হক বিরুদ রে বীরবান্টা বৗজৗল তিগু দারাম আকানা।
আডি সড়া হড়ে তাঁহে কানা।
মাহাজন রুপুসিং তাঁবলি তুলুজ সুদ কারবার তাঁহেকানায় আজ আপাৎ। সুদ দায়তে জুমি জায়গা ,ধন মিহু মেরম সানাম রেজ চাবালেৎ তায়া।
গৗয় গুপি বাড়া তুলুজ হেডেজ রাকাব আয়া মানওয়া লৗগিৎ দুখৗলি আড়াং। তিরয়ৗ রেনাং ঞঁহড় সাডেতে মনেয় মুহনিয়েৎ তাঁহে।
মারাং বৗসকৗরিয়ৗ বেনাও লেনা। মাহাজনাঃ বাবায়াঃ রিন বাকি গেতে গৗয়ে কয় লেদেয়া তওয়া জম।
এমঃ রৗজিলেন রেহঁ তায়নমতে মাহাজন হেলেজ লেদেয়ায়।
তায়মতে দারোগা ঠেন সাব অচোয়েনায়।
জিওয়ীরে কৗটিজ হঁ বাং বতর কাতে তিরয়ো অরংতে হাজত তেয় সেনলেনা ।বৗজৗল দ নিয়া তায়নম চিকৗয়েনা অকয়ে বাড়ায়....হাড়মা দেস মৗঝি দ হৗনওয়ায় খন হেজ কাতে সিলিঙ্গি 'য় বান্ধাও লেদা।
মিৎ দিন হাড়মা রেন গৗই কাডা কেনারাম মাহাজনাঃ হুকুমতে কৗমিয়ৗ ক তল ইদিলেৎ কওয়া খান ঞেঞেল সেন কাতে সাব ঢুঁবৗ কেদেয়া । দারগা আর কেনারাম হাড়মা তাক এটাঃতেকি ইদিয়েৎ তাঁহে । সিধু কানহু পাঁচকৗটিয়ৗ হর ক এসেৎ কেদাকিন মাঃ গজ কেদ কওয়া।
হাড়মা ছৗড় এনা।
হাড়মা হঁ হুলগৗরিয়ৗ ফৗদ ক আয়ুরলেৎ কওয়া।
সিধু কানহু আয়ুর সুতুঃতে তিরলৗ ক চেতান নাহচার বিরুদ রে ফুল ঝান হঁ তিরলৗ বির কিন তাঁহে কানা। ফুরগৗল লৗড়হৗইরে দিসম লৗগিৎ জিউয়ী কিন আলায় লেদা।
জানাম দিসম ফুরগৗল লৗগিৎ বীরবান্টা কো জিউয়ী আলায় লেদা। মায়ামতে গাবাও লেনা অৎ হাসা কচলন নাহাচার খন রাড়াঃ লৗগিৎ। দিসম রে ফুরগৗল আগুয় লৗগিৎ হুলগৗরিয়ৗ হুল হুলসৗই লেদা।
মেনখান,১৯৪৭ সালরে ভারত দিসম ফুরগৗল আকানা। সান্তাড় মানওয়া সৗরিগে ফুরগৗল মেনাবনা? কুকুলি তাঁহেয়েন গেয়া……!
এভেন পেসে সান্তাল বয়হা
তিনৗঃ দিনপে তায়নম কঃ ?
জৗতি সমাজ লেগ আচার জানামদিসম
চেদাঃ হায়রেম হিড়িঞেদ?
চেদাঃ হায়পে ঢিলৗও এদ কান ?
কুড়ি হপন দেকো তিরে
কড়া হপন হাঁডি ঞু রে
এ বে-সরম অকাজিয়ৗ
জৗতি দপে গাবাও কেদ
সমাজ দপে ডামাডোল কেদ ।
