আবোওয়াঃ ডিজিটাল ডেস্ক- হলা ১১ জুলাই, আযোদিয়ৗ বুরু বাঞ্চাও দরদিয়ৗ পাহটা খন, হহয়েদায় আযোদিয়ৗ মিৎ ওয়েবনার আখড়ারে ডেমোক্রেটিক ভাবতে লৗড়হৗই রেনাঃ কাথা রাকাব এনা। কাথা রাকাব এনা সানাম আদিবাসী কো জুমিদ্ কাতে আযোদিয়ৗ বুরু বাঞ্চাও রেনাঃ আঁদোড়।
আযোদিয়ৗ বুরু রেন আদিবাসী কো নিৎ মুহিম অকতরে কো পাড়াও আকানা। মেৎ সামাং রেকো ঞেল ঞাম এদা আযোদিয়ৗ বুরু রেনাঃ তিনাঃ হাজার হাজার দারে মাঃ কাতে ড্যাম কো বেনাও এদা, যাঁহা খন ‘জল বিদ্যুৎ’ সারভারঃ আ। লৗইগানঃ আ মিৎ হাহাড়াঃ চিতৗর বির-বুরু মাঃ ধৗসুড় কাতে ড্যাম ! কুকলি রাকাব কানা আর চেৎ অকারেহঁ জায়গা বাং ঞাম লেনা ? সে নোওয়াদ নিছক আদিবাসী কো লাগা-ডিগলৗও রেনাঃ পানথা কানা। অনাতে নিৎ আযোদিয়ৗয় রারাঃ কানা, দিশম হড় ঠেন এ নেঁহরঃ কানা হৗড়িয়ৗর বির-বুরু বাঞ্চাও দহয় লৗগিৎ।
নোওয়া ওয়েবনার আখড়ারে গালচিয়ৗ লেকাতে সেলেদ কো তাঁহেকানা মানতান গুলান মুরমু, মানতান সুপেন হেম্ব্রম, মানতান শ্যামসুন্দর মান্ডি, মানতান রাজেন টুডু আর প্রফেশর শশীকান্ত মুরমু।
আখড়া এহবরে মানতান সুপেন হেম্ব্রম আয়াঃ বাঁখেড় তালাতে মাড়াং রে বেনাও আকান পাওয়ার প্রজেক্ট তে আদিবাসী কোওয়াঃ চেৎ চেৎ খুতিয়াকানা অনাকোগেয় সাব রাকাব কেদা। উনিয়াঃ কাথা খন গে বাডায় ঞাম এনা বাংমা মাড়াং প্রজেক্ট রে ৮০ গটাং সিকিউরিটি মুদ্রে এলাকারেন দ মাত্র ৪ হড় গে দাও কো ঞাম আকাদা। মেনখান প্রজেক্ট মাড়াং রে কাথা তাঁহেকানা বাংমা অড়াঃ পিছু মিৎটাং কাতে চৗকরি। অনা সাঁওতে আরহঁয় লৗই তরা কেদা বাংমা নঁডে বেনাও আকান দাঃ খন বিজলি বৗতি দ নঁডে রেন হড়দ অকয়গে বাংকো ঞাম আকাদা। নঁডেদ লৗই গানঃ আ রেঁগেচ্-নাচার হড় বিরুধরে সরকার এ লৗড়হৗই কানা মেনতেহঁ মানতান হেম্ব্রম গোমকে আডি দুখ সালাঃ এ লৗই সদর আকাদা।
মানতান গুলান মুরমু দ বির-বুরু রেনাঃ দারে-নৗড়ি সাঁওতে চেঁড়ে –চিপরুৎ নানাহুনৗর জিবজিয়ৗলী কো রাঃ হমর এদা বুরু গাজাড় বাংতে। মানতান মুরমু গোমকে দারে নৗড়ি রেনাঃ এনেম কাথা ক হঁয় লৗই তরা কেদা। অনা সাঁওতে গল বুনুম, সুতৗন টাঁডি, ঠুড়গৗ নালা এমান ক রাঃ হমর এদা মেনতেহঁয় বাঁখেড় তরা কেদা। অনাবেগর গৗহির দুখ সালাঃ এ লৗই তরা কেদা বাংমা নিৎ আয়মা হড়গে আযোদিয়ৗ বুরু রেনাঃ তলাশ বাংক হাতাওয়া।
মানতান শ্যামসুন্দর মান্ডি আয়াঃ গালচ্ তালাতে লৗই সদর কেদায় বাংমা নিৎ যাঁহা চেতান ড্যাম আর লাতার ড্য্যাম কো মেতাঃ কানা অনা দ গৗহির বুরু গাজাড় সে ‘গভীর অরণ্য’ তাঁহেকানা। যাঁহারে দিন বেড়াহঁ চালাঃ বতর গে বুঝাঃ কান তাঁহেকানা। মান্ডি গোমকে আর হঁয় লৗই তরা কেদা বাংমা বুরু রেন জিব-জিয়ৗলি কো যাঁহা তিনরে রোগ-আজার রেকো পাড়াও লেনখান অনা গৗহির বুরু গাজাড় সেন কাতেৎ আকো তেগেকো রানঃ কান তাঁহেকানা। মানতান মান্ডি গোমকে নোওয়া হঁয় লৗই তরা কেদা বাংমা অনা গৗহির বুরু গাজাড় খন কাঠ অডক আগু হঁ মুশকিল তাঁহেকানা। বাংমা অনকান বুরু গাজাড়রে নিৎ ড্যাম বেনাও আকানা।
প্রফেশর শশীকান্ত মুরমু আয়াঃ গালচ্ তালাতে বির-বুরু রেনাঃ নানাহুনৗর আইন রে আদিবাসী কোওয়াঃ চেৎ চেৎ হক-আইদৗর মেনাঃ আকাদা অনাকো লৗইতে অড়ে অড়পাত এ সাব রাকাব আকাদা। মানতান মুরমু গোমকে সাফা সাঁহিচ্ এ লৗই সদর আকাদা বাংমা গ্রাম সভা রেনাঃ সম্মতি বেগর অকা প্রজেক্ট গে বাং হোয়োঃ আ। মেনখান আইন রেনাঃ বুড়হৗ কৗটুব উদুঃ কাতে আদিবাসি গাঁতাত রেন হড় লাগা-ডিগলৗও রেনাঃ মিৎটাং চক্রান্ত চালাঃ কানা মেনতেহঁয় মনে আকাদা। নঁতে সিঙ্গুর নন্দীগ্রাম জমি আন্দোলন লৗড়হৗইরে জেলেকা অনলিয়ৗ, বুরধিজীবি খন এহব কাতে সিনেমারেন সেলিব্রিটি কো লাহাহেচ্ লেনা আর ক রড়দারাম লেদা, অনকাগে যুদি সানতাড় সাঁওতারেন অনলিয়ৗ, বুরধিজীবি, সেলিব্রিটি কহঁ কো লাহা হিজুঃ আ এনখান আযোদিয়ৗ বুরুরে ঠুড়গৗ প্রজেক্ট দ টেকাও দারামঃ গেয়াঃ মেনতেহঁয় রড় তরা কেদা।
মুচৗৎ রে সাঁওতা সুসৗরিয়ৗ মানতান রাজেন টুডুয় লৗই কেদা বাংমা আদিবাসী কোওয়াঃ ভৗলৗই ঞুম কাতে সরকার, কর্পোরেট, রাজআরি এমান হড় গে আদিবাসি ক লাগায়েৎ কওয়া মেনতে দাবীয় রাকাব আকাদা। ফেসবুক রে সিধু-কানু, হুলমাহা, গুরুগোমকেয়াঃ জানাম মাহা এমান আয়মা পোস্ট ঞেল ঞামঃ আ, মেনখান সিধু-কানু চেৎ লৗগিৎ কিন লৗড়হৗই লেদা অনা কাথা আয়মা হড়াঃ গে বাডায় বৗনুঃ আ মেনতেহঁ মানতান টুডু দুখ এ সদর আকাদা। নঁতে আযোদিয়ৗ বুরু বাঞ্চাও লৗগিৎ সানাম সংগঠন সাঁওতে অনলিয়ৗ, সুসৗরিয়ৗ, ডাকতার,ইঞ্জিনিয়ার সানাম কোওয়াঃ গড় লৗগতি মেনাঃ আ মেনতেহঁ আরদাস এ দহ আকাদা।
তবে সানাম কোওয়াঃ কাথারেগে ডেমোক্রেটিক ভাবতে লৗড়হৗই রেনাঃ কাথা রাকাব হেচ্ আকানা। তেহেঞ ১২ জুলাই ঠুড়গৗ প্রজেক্ট রেনাঃ রায় অডকঃ রেনাঃ কাথাহঁ গালচিয়ৗ কোওয়াঃ কাথা খনগে বাডায় আকানা।
হহয়েদায় আযোদিয়ৗ নোওয়া ওয়েবনার আখড়া দ আরশাল বৗতি পতব ঘাঁরঞ্জ পাহটা খন সাপড়াওলেনা। নোওয়ারে গড় লেকাতে তাঁহেকানাকো মানতান বিশ্বনাথ হেম্ব্রম, স্বপন কুমার হাঁসদা, অর্পন মুরমু এমান গোমকে কো।
