বাডায় আকানা নিৎ বামনী ফলস রে রিপেয়ারিং কৗমি চালাঃ কানা। অনা
ইদিকাতে বির-বুরু দপ্তর পাহটা খনহঁ মিৎ আরদাশ সাকাম কো জৗরি আকাদা বাংমা অনা হরতে হিজুঃ-সেনঃ
মানা গেয়া মেনতে। নওয়াহঁ বাডায় আকানা বাংমা নিৎ বামনি ফলস বাডুয়াজারা,বাঁধঘুটু, দুলগুবেড়া
এমান এলাকাকো বির-বুরু কুমুট আঃ আঁগিভার রে মেনাঃ আকাদা। অনা করেনাঃ জায়গা দখল হঁ আইন
বিরুধ কৗমি আর শাসেৎ ঞাম আনাঃ কানা। মেনখান অনা তাকরেগে বামনী ফল্স এলাকারে আয়মা অ-আদিবাসী
কো হেচ্ কাতে রম্রমা দকান-পাট রেনাঃ বেবসা-বৗনিজ চালাঃ কানা মেনতে অভিযোগ কো আগু
কেদা ভারত জাকাত মাঝি পারগানা মহল। নোওয়া দ বনাধিকার আইন বিরুদ্ কৗমি কানা মেনতেহঁ
মহল পাহটা খন দাবী কো রাকাপ আকাদা। মহল পাহটা খন নোওয়া হঁক রড় আকাদা বাংমা নংকা কাতেগে
আদিবাসী কোওয়াঃ জায়গারে অ-আদিবাসী কো হেচ্ হেচ্তে সানাম আদিবাসী কো এড়ে-ভুড়ুচ্ অচো
কানা।
অনাতেগে হলা ২৬ জুন, ভারত জাকাত মাঝি পারগানা মহল পুরুলিয়া
জেলা চাঁগা পাহটা খন বাঘমুন্ডি রেঞ্জ আপিসার মিৎ টাং মেমোরেন্ডাম কো চাল আদেয়া। মেমোরেন্ডাম
তালাতে দৗবি কো দহওয়াকাদা- ১) ২০০৬ বনাধিকার আইন লেকাতে বাঘমুন্ডি রেঞ্জ রেনাঃ আযোদিয়ৗ
বুরু এলাকা বিশেষ কায়তে বামনী ফলস্ পর্যটন তালমা এলাকারে মিৎ মাত্র আদিবাসী কোওয়াঃ
রুজি-রজগার রেনা সানাম লেকান সুযুগ-সুবিধা এম হোয়োঃ মা, ২) আদিবাসীয়াঃ বির-বুরু আইন
লটম কাতে অ-আদিবাসী কো যাতে বামনী ফলস্ চত্তর রে দাঃ-হাসা-বির-বুরু দখল কাতে যাঁহান
কারবার আলকো দাড়েয়াঃমা অনা নাপায় তে ঠাড় গটাঃ মা, ৩) বাঘমুন্ডি রেঞ্জ রেনাঃ আযোদিয়ৗ
বুরুরে যাঁহা করে ৩৩% খন কম জায়গারে দারে সাকাম মেনাঃ আ, অঁডে আডি লগন গে সাঁগে ভাবতে
দারে রহয় রেনাঃ কৗমিহরা হাতাওয়মা, ৪) বাঘমুন্ডি রেঞ্জ রেনাঃ আযোদিয়ৗ বুরুরে সোর-সোপোর
আদিবাসী হড় লৗইতে এফ.আর.সি. আইন লেকাতে লগন মাছা বুরু-কুমুট বেনাও কাতে বুরু নাপায়
দহয় রেনাঃ বন্দেজ হাতাওয়মা।
আদিবাসী কোওয়াঃ নোওয়াকো দৗবী বাং পুরুন লেনখান আডি লগনগে দৗবী
আদায় লৗগিৎ মিৎ মারাং আন্দোড় তে বাধ্য ক তাঁহেনা মেনতেহঁ ভারত জাকাত মাঝি পারগানা মহল
পাহটা খন হুঁশিয়ৗরী কো এম আকাদা।
.webp)
