আবোওয়াঃ ওয়েব পেজ- দারায় কান বিধান সভা ভোট রেনাঃ সাজাও সাপড়াও নেঃগে এহব গৎ আকানা, নঁতে হলা মাহদের গে ভোট রেনাঃ ঢাক কাঠি সাডে গৎ আকানা। আর অনা তালা রেগে তাল কাটাও এনা পুরুলিয়া জেলা রেনাঃ আযোদিয়ৗ বুরু চটরে। কুকলি হিজুঃ গেয়া চেৎরে চিকৗয়েনা?
ভোট হিজুঃআ, ভোট চালাঃআ। তালা মালারে কিছু এড়ে কাথা রেনাঃ খেলোড হোয়ো আ। রেঁগেচ্ নাচার হড়াঃ আঁজম তেৎ গে। সানাম রাজআরি দল কোওয়াঃগে মিৎ লেকান গে কাথা, আয়মা সেরমা খন কো আঁজম আগু আকাদা। মেনখান আদ বাং। অনাতে নিয়ৗবার দ ভোট বাং এম কাতে, ভোট বয়কট রেনাঃ কাথা কো রড় কেদা।
বাডায় আকানা বাঁধঘুটু, বাড়য়াজারা আর দুলগুবেড়া আতোরেন তামাম হড়গে নোওয়া ভোট বয়কট রেক সামিল আকানা। ওনকোওয়াঃ আডি দিন রেনাঃ দাবি- ১) এলাকারে প্রাইমারী বিরদৗগাড় বেনাও, ২) আই.সি.ডি.এস. রেনাঃ অড়াঃ বেনাও, ৩) বির-বুরু হাসা রেনাঃ আইদৗর খন নিশড়ৗও বাং গানঃ আ, ৪) হর-ডাহার আর ব্রীজ বেনাও, ৫) বাঘমুন্ডি খন আযোদিয়ৗ অঞ্চল রে সেনেলেদ্ হোয়োঃ মা আর ৬) ঞু দাঃ রেনাঃ আনাট মেটাও হোয়োঃ মা। বাডায় আকানা নওয়া কো দাবী ইদিকাতে ২০১২ সাল খন প্রশাসনিয়ৗ আঃ অফিস দুয়ৗর দুয়ৗররে অল বেল তালাতে বাডায় অচো কাতেহঁ চেৎ সুরাহা বাংকো ঞাম আকাদা। আর অনাতেগে নিয়ৗবার নোওয়া কো দাবী বাং পুরুন লেনখান ভোট বয়কট রেনাঃ গে সিদ্ধান্ত কো হাতাও আকাদা। নোওয়া কো ইদিকাতে ৩ মার্চ বাঘমুন্ডি বি.ডি.ও আর ৪ মার্চ ঝালদা মহকুমা প্রশাসনিয়ৗ হঁকো বাডায় অচো আকাৎ কিনা। নিত নোওয়া ইদিকাতে রাজআরি মহল রে আডি মারাং সোরগোল পাড়াও গৎ আকানা। বিরুধী দল কঁহ নংকান ইস্যু তি-খন বাং কো পুচুজ্ লৗগিদঃ কানা। আয়মা হড়াঃ মেৎ নিৎ অনা পেয়া আতো সেনগে লঁড লঁড কয়ঃ কাতে ঞেল আকো অনা দাবীকো পুরুন এনা সে বাং ?
.webp)
